ރާއްޖޭން ލިބޭ ބޭހުގެ އަގު ސަރަހައްދީ ގައުމުތަކަށްވުރެ 70 ގުނަ ބޮޑު: ވަޒީރު ޑރ. އައިޝަތު ޝިހާމް

ރާއްޖޭގައި ލިބެން ހުރި ބޭހުގެ އަގުތަކަކީ މި ސަރަހައްދުގައި ލިބެން ހުރި ބޭހުގެ އަގުތަކާއި އަޅާ ބަލާއިރު، 70 ގުނަ ބޮޑު އަދަދު ތަކެއް ކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ.އައިޝަތު ޝިހާމް ވިދާޅުވެއްޖެއެވެ.

ވަޒީރު ޑރ.އައިޝަތު ޝިހާމް މިފަދައިން ވިދާޅުވީ މިއަދު ރައްޔިތުންގެ މަޖިލީހުގެ ޖަލްސާ އަށް ހާޒިރުވެވަޑައިގެން މެމްބަރުން ކުރެއްވި ސުވާލަށް ޖަވާބު ދެއްވަމުންނެވެ.

މިގޮތުން އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވަނީ ޔޫއޭއީ އަދި ތައިލެންޑުން އާސަންދައިގެ ހިދުމަތް ދިނުމަށް ރައީސުލްޖުމްހޫރިއްޔާ ނިންމަވާފައިވާއިރު، މި ގައުމުތަކުން އާސަންދަ ލިބޭނީ ކޮން ހިދުމަތްތަކަކުންތޯ އާއި މިހާރު އިންޑިއާ އިން ލިބެމުންދާ ހިދުމަތްތައް އެއަށްވުރެ އަގު ބޮޑުކޮށް ތައިލެންޑާއި ޔޫއޭއީ އަށް ފޮނުވާ ގޮތަށް ހަމަޖެހިފައިވޭތޯ އާއި މިހާރު އޮތް ބަޖެޓުން މިކަމަށް ހަމަޖައްސާނަމަ ހިދުމަތް ދެވޭ މީހުންގެ އަދަދު ކިހާވަރަކަށް މަދުވެގެން ދާނެތޯ ވަޒީރާއި ސުވާލު ކުރައްވާފައެވެ.

މި ސުވާލުތަކަށް ޖަވާބު ދެއްވަމުން ވަޒީރު ޑރ.އައިޝަތު ޝިހާމް ވިދާޅުވީ، އާސަންދަ އަށް މި އަހަރު އެކުލަވާލައިފައިވާ ބަޖެޓްގެ ތެރެއިން މި ސިޔާސަތު އެކުލަވާލުމަށް މަސައްކަތް ކުރަމުންދާ ކަމަށާއި، މި ބަދަލާއި އެކު ވެސް އާސަންދައިގެ ހިދުމަތް ލިބޭ މީހުންގެ އަދަދަށް އުނި ކަމެއް ނާންނާނެ ކަމަށެވެ. އަދި މި ސިޔާސަތާއި ގުޅުން ހުރި މަޝްވަރާތައް ކުރެވެމުންދާ ކަން ވެސް އެކަމަނާ ފާހަގަކުރެއްވިއެވެ.

ވަޒީރު ޑރ.އައިޝަތު ޝިހާމް ވިދާޅުވީ، އާސަންދަ ނިޒާމް މިހާރު ހިނގަމުން އަންނަ ގޮތުން ވަރަށް ބޮޑު އިސްރާފް ތަކެއް ހުރިކަން ފާހަގަކުރެވޭ ކަމަށެވެ. އެގޮތުން މިދިޔަ އަހަރު މުޅި އާސަންދަ ސްކީމަށް 1 ބިލިއަން ރުފިޔާ ބަޖެޓް ކުރި ނަމަވެސް، އަހަރު ނިމުނު އިރު ޖުމްލަ 2.3 ބިލިއަން ރުފިޔާ ހިނގާފައިވާ ކަން ފާހަގަކުރައްވާ އެކަމަނާ ވިދާޅުވީ އޭގެ ތެރެއިން 1 ބިލިއަނަށް ވުރެ ގިނަ ރުފިޔާ ބޭހަށް ހަރަދުކުރެވިފައިވާ ކަމަށެވެ.

"ރާއްޖޭގައި ލިބެން ހުރި ބޭހުގެ އަގުތަކަކީ މި ސަރަހައްދުގެ އެހެން ގައުމުތަކަށް އަޅާބަލާއިރު 70 ގުނަ ބޮޑު އަދަދުތަކެއް. އަދި ދުނިޔޭގެ ބާޒާރުގައި ބޭސްލިބެން ހުންނަ އަގު ތަކަށް ވުރެ ވެސް 1.5 ގުނަ ބޮޑުކަމަށް ވޯލްޑް ބޭންކުން ވެސް ވަނީ ފާހަގަކޮށްފައި."

ވަޒީރު ޑރ.އައިޝަތު ޝިހާމް ވިދާޅުވިއެވެ.

އަހަރަކަށް ވުރެ އަހަރެއް އާސަންދަ އަށް ކުރާ ހަރަދު ބޮޑު ކަމަށާއި، 2023 ވަނަ އަހަރު ނިމުނު އިރު، އާސަންދައިގެ ހަރަދުތައް 2018 ވަނަ އަހަރާއި އަޅާ ބަލާއިރު %40 އިތުރުވެފައިވާ ކަމަށް ވަޒީރު ވިދާޅުވިއެވެ. އަދި ފާއިތުވި ފަސް އަހަރު ތެރޭގައި އާސަންދަ ސްކީމަށް ހިނގި ހަރަދުތައް އެވަރެޖް ކޮށް %61 އިތުރުވެފައިވާކަމަށް ވެސް އެކަމަނާ ވިދާޅުވިއެވެ.

މީގެ އިތުރުންވެސް ވަޒީރު ޑރ.އައިޝަތު ޝިހާމް ވިދާޅުވީ އުފެއްދުންތެރިކަމުގެ ނިސްބަތުން ގައުމުގެ ހޭދަ އަށް ބަލާއިރު ސިއްހީ ދާއިރާއަށް ދައުލަތުން ކުރާ ހޭދަ ހުރީ ތަރައްގީ ވެފައިވާ ގައުމުތަކާއި ދާދި އެއް މިންވަރެއްގައި ކަމަށެވެ. މިއީ ސަރަހައްދީ ގައުމުތަކާއި އަޅާބަލާއިރު ސިއްހީ ހޭދަ ގާތްގަނޑަކަށް 2 ގުނަ މިންވަރެއް ނަމަވެސް ރާއްޖޭގެ ރައްޔިތުން އެދޭ ގޮތަށް ސިއްހީ ފަރުވާ ލިބޭނެ އިންތިޒާމުތައް ހަމަޖެހިފައިނުވާކަން އެކަމަނާ ވަނީ ފާހަގަކުރައްވާފައެވެ.