"އިންޑިއާ އައުޓް" ވާހަކަ ދައްކަން މިސަރުކާރުން ލަދުވެތިވެ ބިރުގަނޭ: ރައީސް ޔާމީން

"އިންޑިއާ އައުޓް" ވާހަކަދައްކަން މިހާރު މި ސަރުކާރުން ލަދުވެތިވެ ބިރުގަންނަ ކަމަށް ކުރީގެ ރައީސް އަބްދުالله ޔާމީން އަބްދުލް ގައްޔޫމް ވިދާޅުވެއްޖެ އެވެ.

ކުރިއަށް އޮތް ރައްޔިތުންގެ މަޖިލީސް އިންތިޚާބަށް ޕީއެންއެފުން ނެރޭ ކެނޑިޑޭޓުންނަށް ކެމްޕޭން ކުރަން ބާއްވާ ޖަގަހަ ޖަލްސާގައި ބައިވެރިވެވަޑައިގެން ރައީސް ޔާމީން ވިދާޅުވީ، މީގެ ކުރިން "އިންޑިއާ އައުޓް" ޖަހައިގެން ޕީޕީއެމާއި ޕީއެންސީގެ ފަރާތުން މަސައްކަތްތަކެއް ކުރެވުނު ކަމަށެވެ.

"އިންޑިއާ އައުޓް ޖަހައިގެން އިންޑިއާ ސިފައިން މިތާ ތިބެން ނުޖެހޭނެ ކަމަށް ގިނަ ދިވެހި ރައްޔިތުން ގަބޫލު ކުރާތީ ވަރަށް ގިނަ މަސައްކަތްތަކެއް ކުރެވުނު އޭރު ޕީޕީއެމް ގެ ފަރާތުން. އަދި ޕީއެންސީގެ ބޭބޭފުޅުން ވެސް ހިމެނޭ ގޮތަށް. ދެން މިއަދު އެބޭފުުން ލަދުވެތިވޭ ބިރުގަނޭ އެވާހަކަ ދައްކަން. މިއަދު އެއީކީ މައްސަލަ އެއް ނޫންކަމަށް މިވަނީ."

ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ، ރާއްޖޭގައި އިންޑިއާ ސިފައިން ނެތް ކަމަށް ސަރުކާރުގެ ފަރާތުން ރައްޔިތުންގެ މަޖިލީހަށް ކުރިމަތިލާފައިވާ ކެނޑިޑޭޓުން ބުނަމުން އައި ނަމަވެސް އިންޑިއާ ސިފައިން ރާއްޖޭގައި އަދިވެސް އެބަ ތިބި ކަމަށާއި ތިބި އަދަދު މި ސަރުކާރުން ބުނަން ބޭނުން ނުވާ ކަމަށެވެ.

ރައީސް ޑރ.މުއިއްޒު ޗައިނާ އަށް ކުރެއްވި ދަތުރުފުޅު ނިންމަވާލެއްވުމަށްފަހު ބޮޑެތި ގައުމުތަކުން އަވައްޓެރިންގެ ގޮތުގައި ތިބިކަމުގައި ވިޔަސް ރާއްޖެ އަށް ބުލީ ނުކުރެވޭނެ ކަމަށް ވިދާޅުވިކަން ފާހަގަކުރައްވާ ރައީސް ޔާމީން ވަނީ ބައެއް ދިވެހި ދޯނިފަހަރަށް އިންޑިއާ ސިފައިން އެރުން އެއީ ބުލީ ކުރުންތޯ ސުވާލު އުފައްދަވާފައެވެ. އަދި އެކަމާއި ގުޅިގެން ޑިފެންސް މިނިސްޓަރުވެސް އެއީ ބުލީ ކުރުން ކަމަށް ވިދާޅުނުވާ ކަމަށާއި އެއީ ކީއްވެގެން ކުރި ކަމެއް ކަން ވެސް ނޭނގޭ ކަމަށް ރައީސް ޔާމީން ވިދާޅުވިއެވެ.

"ރައީސް މުއިއްޒު ޗައިނާ ދަތުރު ނިންމާލައްވާފައި ވަޑައިން މާލެ އަށް ވަޑައިގަތުމުގެ ކުރިން ވެސް ވިދާޅުވި ނޫންތޯ ބޮޑެތި ގައުމުތަކުން އަދި ތިމަންނަ މެންނާއި ކައިރި އަވައްޓެރިންގެ ގޮތުގައި ތިއްބަސް ތިމަންނަ މެންނަށް ބުލީ އެއް ނުކުރެވޭނޭ. އެހެން ބުނެފަ އޮއްވާ ބައެއް ދިވެހި ދޯނިފަހަރަށް އިންޑިއާ ސިފައިން އަރާ މިކަން ކޮށްލީމާ އެއީ ބުލީ ކުރުންބާ. ބުލީ އެއް ނުކުރެވެއެއް ނޫންތޯ. އެއަށް ޑިފެންސް މިނިސްޓަރު ވެސް ވިދާޅެއް ނުވޭ ބުލީ ކުރީއެކޭ. ނޫނީ އެކީއްވެގެން ކުރި ކަމެއް ނޭނގެ."

ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ، ޕީޕީއެމް ޕީއެންސީ އިދިކޮޅުގައި އޮތްއިރު، ރާއްޖޭގައި އެތައްހާސް އިންޑިއާ ސިފައިންނެއް ރާއްޖޭގައި ތިބި ކަމަށް ބުނަމުން ދިޔަ ނަމަވެސް ވެރިކަމަށް އައުމަށްފަހު މިހާތަނަށް ހާމަ ކުރި އަދަދަކީ، ރާއްޖޭގައި ތިބީ އިންޑިއާގެ 89 ސިފައިން ކަމަށެވެ.

މީގެ އިތުރުންވެސް ރައީސް ޔާމީން ވަނީ، އިންޑިއާ އައުޓުގެ ޝިޔާރު ފާޅުކުރުން ހުއްޓުވުމަށް ކުރީގެ ރައީސް އިބްރާހިމް މުހައްމަދު ޞާލިހު ނެރުއްވި ރިޔާސީ ގަރާރު ބާތިލުކުރަން މަދަނީ ކޯޓަށް ހުށަހަޅާފައިވާ މައްސަލަ މި ސަރުކާރުން އަވަސްކުރުމަށް ނޫޅޭ ކަމަށް ވިދާޅުވެ އެކަމާއި ގުޅިގެން ވެސް ކަންބޮޑުވުން ފާޅުކުރައްވާފައެވެ.