ޣައްޒާގެ ކޭމްޕަކަށް ޔަހޫދީން ދިން ހަމަލާތަކެއްގައި 210 މީހުން ޝަހީދުކޮށްލައިފި

ޣައްޒާގެ މެދުތެރޭގައި ހުރި ކޭމްޕަކަށް ޔަހޫދީން ދިން ހަމަލާތަކެއްގައި 210 މީހުން ޝަހީދުކޮށްލައިފިއެވެ.

ހަމާސް އިން ނެރުނު ބަޔާނެއްގައި ބުނީ، މި ހަމަލާތަކުގައި 210 މީހުން ޝަހީދުވެފައިވާއިރު، 400 އަށް ވުރެ ގިނަ މީހުން ޒަހަމްވެފައިވާކަމަށެވެ.

ހައްދުފަހަނަ އަޅާފައިވާ އިސްރާއީލުގެ ސިފައިން ޣައްޒާގެ މެދުތެރެއަށް ވައިގެ މަގުންނާއި އެއްގަމު މަގުން ވަރުގަދަ ހަމަލާތަކެއް ވަނީ ދީފައެވެ. މިހަމަލާތަކާއި ގުޅިގެން ޣައްޒާގެ ހެލްތު މިނިސްޓްރީން ބުނީ، އަލް ނޫސެއިރާތަށް ޔަހޫދީ ސިފައިން ދިން ހަމަލާތަކާއި ގުޅިގެން ގިނަ އަދަދަކަށް ކުޑަކުދިންނާއި އަންހެނުންނަށް ޒަހަމްވެ، ޝަހީދުވެފައިވާކަމަށެވެ.

"ހީވަނީ ބިރުވެރި ފިލްމެއްގެ މަންޒަރެއް ފެނުނުހެން. ނަމަވެސް މިއީ ހަގީގަތަށް ލޮލު ކުރިމަތީގައި ހިނގާ ދިޔަ ގަތުލުއާއްމެއް. ރޭގަނޑުގެ ވަގުތުގައި އިސްރާއީލުގެ ހަނގުރާމަ މަތިންދާބޯޓުތަކާއި ޑްރޯންތައް އާއްމުންގެ ގެތަކަށް ދިޔައީ ހަމަލާ ދެމުން. އޭގެ އިތުރުންވެސް، އެ ސަރަހައްދު ދޫކޮށް ދިޔުމަށް މަސައްކަތް ކުރަމުންދިޔަ އާއްމުންނަށް ވެސް އެމީހުން ހަމަލާދިން."

ސިއްހީ އެހީތެރިއެއްކަމުގައިވާ ޒިޔާދު ބުންޏެވެ.

"ރޮއިޓާސް" އިން ރިޕޯޓްކުރި ގޮތުގައި މިހަމަލާތައް އަމާޒުކޮށްފައިވަނީ ޣައްޒާގެ މެދުތެރޭގައި ހުރި މާކެޓަކަށާއި، އަލްއައުދާ މިސްކިތަށެވެ.

" އިސްރާއީލުގެ ހަތަރު މީހުން މިނިވަން ކުރުމަށްޓަކައި އިސްރާއީލުން ޣައްޒާގެ ކުށެއް ނެތް އެތައް ބަޔަކު ޝަހީދުކޮށްލި."

ޒިޔާދު ބުންޏެވެ.

ފާހަގަކޮށްލެވޭ ގޮތުގައި އަލް ނޫސެއިރާތަކީ ޣައްޒާގައި ޔަހޫދީން ހިންގަމުންދާ ގަތުލުއާއްމުގެ ސަބަބުން ގިނަ ދުވަސްތަކެއް ވަންދެން އެތައް ބަޔަކު ބޯހިޔާވަހިކަން ހޯދަމުން އަންނަ ސަރަހައްދެކެވެ. މި ސަރަހައްދަށް ޔަހޫދީ ސިފައިން އަރައި، ލާއިންސާނީ އެތަކެއް އަމަލުތަކެއް ހިންގާފައިވަނީ ހަމާސްގެ ބެލުމުގެ ދަށުގައި ތިބި ޔަހޫދީންތައް ސަލާމަތްކުރުމަށް ކަމަށް ބުނެއެވެ.