އެމްޑީޕީ ދެން ކޮޅަކަށް ނުޖެހޭނެ، އައު ޕާޓީއެއް އުފައްދަން ގޮވާލަން: ފަލާހް
އިދިކޮޅު މައި ޕާޓީ އެމްޑީޕީ ނަގާ ކޮޅަށް ނުޖެހޭނެ ކަމަށާ އިތުރަށް ސިޔާސީ މަސައްކަތް ކުރަން ބޭނުންނަމަ އައު ޕާޓީއެެއް އުފައްދަން އެ ޕާޓީގެ ލީޑަރުންނަށް ޕީއެންސީގެ ޕީޖީ ގުރޫޕްގެ ލީޑަރު އިބްރާހިމް ފަލާހް ގޮވާލައްވައިފި އެވެ.
ފަލާހް މިކަމަށް ގޮވައިލެއްވީ ތިނަދޫ ސިޓީގެ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މަގާމުތަކަށް ވާދަކުރައްވާ ކެންޑިޑޭޓުންގެ މާލޭ ކެމްޕެއިން އޮފީސް ހުޅުވުމަށް މިރޭ ބޭއްވި ބައްދަލްވުމުގައި ވާހަކަ ދައްކަވަމުންނެވެ. ފަލާހް ވިދާޅުވީ ދެން އެމްޑީޕީ ނަގާ ކޮޅަކަށް ނުޖެހޭނެ ކަމަށެވެ.
އަދި އެންމެ ރަނގަޅު ގޮތަކަށް ވާނީ އައު ޕާޓީއެއް އުފެއްދުން ކަމުގައި ވިދާޅުވި އެވެ. ފަލާހް ވަނީ އިތުރަށް ސިޔާސީ މަސައްކަތް ކުރައްވަން ބޭނުންނަމަ އައު ޕާޓީއެއް އުފައްދަން އެމްޑީޕީގެ ލީޑަރުންނަށް ގޮވާލައްވާ ކަމުގައި ވިދާޅުވި އެވެ.
ފަލާހް ވިދާޅުވި ގޮތުގައި ކައުންސިލް އިންތިހާބުގައި 1352 ގޮނޑީގެ ތެރެއިން 450 ގޮނޑިއަށް އެމްޑީޕީން ކެންޑިޑޭޓުން ނުނެރެ އެވެ. ހަގީގަތަކީ ވާދަކުރާނެ ކެންޑިޑޭޓަކު ނުލިބުން ކަމުގައި ވިދާޅުވި އެވެ. ކައުންސިލް އިންތިހާބުގައި 30 އިންސައްތަ ގޮނޑިއަށް ވާދަކުރާނެ ކެންޑިޑޭޓުން ނުލިބުމުން މިހާރުވެސް އެމްޑީޕީ ބަލިވެފައިވާ ކަމުގައި ފަލާހް ވިދާޅުވި އެވެ.
"އިދިކޮޅު ޕާޓީއެއް މިހާރަކު ނެތް. އަޅުގަނޑުމެންނަށް އެކަން އެނގިގެންދާނެ ލޯކަލް ކައުންސިލް އިންތިހާބުގައި ކެންޑިޑޭޓުން އިލެކްޝަންސް ކޮމިޝަނަށް ކެންޑިޑެސީ އެ ޕާޓީތަކުން ހުށައެޅި އަދަދުތަކަށް ބަލާއިރު. އިދިކޮޅު އެންމެ ބޮޑު ޕާޓީކަމަށް ވިދާޅުވާ އެމްޑީޕީން 450 ގޮނޑި އެބަ އޮތް ވާދަނުކުރައްވާ," ފަލާހް ވިދާޅުވި އެވެ.
އޭނާ ވަނީ ހަމައެކަނި އެކަމަށް ބަލާލުމުން ވެސް އެމްޑީޕީގެ ތާއީދު ދަށަށް ގޮސްފައި އޮތްވަރު ފެންނަ ކަމުގައި ވިދާޅުވެފަ އެވެ. އަދި ވިދާޅުވީ ޒިންމާދާރު ކަމާއެކު މަސައްކަތް ކުރާނެ އިދިިކޮޅު ޕާޓީއެއް އޮތުން މުހިންމު ކަމަށް ނަމަވެސް އެފަދަ ޕާޓީއެއް ނެތް ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
