ފުވައްމުލަކު ސިޓީގެ ނޮވެމްބަރުމަހުގެ ފެނަށް ބިލު ނުކުރާން ފެނަކައިން ނިންމައިފި

މިދިޔަ މަހު ފުވައްމުލަކު ސިޓީއަށް ފެން ފޯރުކޮށްދިނުމަށް ދިމާވި ދަތިތަކާއި ގުޅިގެން އެ މަހުގެ ފެނަށް ބިލް ނުކުރާން ފެނަކައިން ނިންމައިފިއެވެ.

ފެނަކައިން ނެރުނު ނޫސްބަޔާނެއްގައި ބުނީ، ފުވައްމުލައް ސިޓީގައި ދިމާވެފައިވާ ފެނުގެ މައްސަލަ ޙައްލުކުރުމަށާއި، ރަނގަޅު ފެންވަރެއްގައި ފެނުގެ ޚިދުމަތް އަލުން ދިނުމަށްޓަކައި ކުރަންޖެހޭ އެންމެހައި ކަންކަން ހުއްޓުމެއްނެތި ކުރަމުންދާ ކަމަށެވެ.

ފެނަކައިން ފާހަގަކުރި ގޮތުގައި، ވޭތުވެދިޔަ ދުވަސްތަކުގައި ފުވައްމުލައް ސިޓީގެ ފެނުގެ ނެޓްވޯކްގެ މަސައްކަތްތަކެއް ކުރަމުންދިޔައިރު، އެކި ވަގުތުތަކުގައި ފެން ކެނޑުމާއި ފެނުގެ ޕްރެޝަރ ދަށްވުންފަދަ ކަންކަން މެދުވެރިވެފައިވެއެވެ. މިކަމުގެ ސަބަބުން ރައްޔިތުންނަށް ދަތިތަކެއް ކުރިމަތިވިކަން ފެނަކައިން ވަނީ ފާހަގަކޮށްފައެވެ.

އަދި އެ ސިޓީގެ ފެނުގެ ނިޒާމު އަޕްގްރޭޑުކުރުމުގެ މަސައްކަތް މިހާރުވެސް ކުރަމުން އަންނަ ކަމަށާ މި މަސައްކަތުގެ މަޤްސަދަކީ ފުވައްމުލަކުގެ ރައްޔިތުންނަށް ދެމެހެއްޓެނިވި އަދި ފެންވަރު ރަނގަޅު ފެނުގެ ޚިދުމަތެއް ކަށަވަރުކޮށްދިނުން ކަމަށްވެސް އެ ކުންފުނިން ހާމަކުރިއެވެ.

މި ކަންކަމަށް ރިޔާއަތްކޮށް އަދި ފެނުގެ ޚިދުމަތަށް ދިމާވި ދަތިކަމުގެ ސަބަބުން ރައްޔިތުންނަށް ލުޔެއް ދިނުމަށްޓަކައި، ފާއިތުވި ނޮވެންބަރު މަހު ފުވައްމުލައް ސިޓީގެ ފެނަށް ބިލުނުކުރާގޮތަށް ނިންމާފައިވާ ކަމަށް ފެނަކައިން ވަނީ ހާމަކޮށްފައެވެ.

ފެނުގެ ޚިދުމަތް ކެނޑި، ދިމާވި ދަތި ވަގުތުތަކުގައިވެސް ފުވައްމުލަކުގެ ލޮބުވެތި ރައްޔިތުންގެ ފަރާތުން ލިބުނު އެއްބާރުލުމާއި އެހީތެރިކަން ފާހަގަކޮށް، ފެނަކައިން ވަނީ ޝުކުރު ދަންނަވާފައެވެ. އަދި ކުރިޔަށް އޮތްތަނުގައި ފެނުގެ ޚިދުމަތް އިތުރަށް ހަރުދަނާކޮށް، ރައްޔިތުންގެ އިތުބާރު ހޯދުމަށް މަސައްކަތް ކުރަމުންދާނެ ކަމަށްވެސް އެ ކުންފުނިން ބުނެއެވެ.