ތުލުސްދޫ އިސްރަށްވެހިންގެ މަރުކަޒު އެޅުމަށް އެމްޓީސީސީއާ ސައިޓް ހަވާލުކޮށްފި

ކ. ތުލުސްދޫގައި ޤާއިމުކުރާ އިސްރަށްވެހިންގެ ހިޔާވަހި މަރުކަޒުގެ ޢަމަލީ މަސައްކަތް ފެށުމުގެ ގޮތުން މަޝްރޫޢުގެ ސައިޓް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ މިއަދު ރަސްމީކޮށް ހަވާލުކޮށްފިއެވެ.

100 މީހުންގެ ޖާގަ ހިމެނޭ ގޮތަށް ފަރުމާކޮށްފައިވާ މި މަރުކަޒުގައި މުވައްޒަފުންގެ އެކޮމޮޑޭޝަން ބްލޮކެއް ވެސް ހިމެނެއެވެ. މި މަޝްރޫޢު 540 ދުވަހުގެ ތެރޭގައި ނިންމުމަށް ވަނީ ތާވަލުކޮށްފައެވެ. ދާއިމީކޮށް ތިބެގެން ދެވޭ ރެސިޑެންޝަލް ކެއާ އާއި ނާސިން ކެއާގެ އިތުރުން ޑޭ ކެއާ ޚިދުމަތް ވެސް އެއް ފުރާޅެއްގެ ދަށުން މި ތަނުން ލިބޭނެ ގޮތަށް ވަނީ ރާވައިފައެވެ.

މި މަރުކަޒުގައި މެޑިކަލް ވޯޑަކާއި ފިޒިއޮތެރަޕީ ރޫމަކާއި ކޮންސަލްޓޭޝަން ރޫމަކާއި ލައިބްރަރީއެއްގެ އިތުރުން ތަފާތު ޕްރޮގްރާމްތައް ހިންގެވޭނެ މަލްޓި ޕާޕަސް ހޯލްތައް ހިމެނޭނެއެވެ. މި ވަސީލަތްތައް މެދުވެރިކޮށް ދޮށީ ޢުމުރުގެ ފަރާތްތަކަށް ޞިއްޙީ އަދި ނަފްސާނީ އެހީތެރިކަން ވަށާޖެހޭ ނިޒާމެއްގެ ތެރެއިން ދެވޭނެ ކަމަށް ސަރުކާރުން ބުނެފައިވެއެވެ.

ރާއްޖޭގެ ތިން ސަރަޙައްދެއްގައި މިފަދަ "އޭޖްޑް ކެއާ ސެންޓަރު" ތައް ބިނާކުރެއްވުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ. ރާއްޖޭގެ އާބާދީ ދޮށީ ޢުމުރަށް މިސްރާބު ޖަހާފައިވާ ދަނޑިވަޅެއްގައި ދައުލަތުގެ ޚާއްޞަ ރައްކާތެރިކަން ބޭނުންވާ އިސްރަށްވެހިންނަށް ފޯރުކޮށްދޭ ޚިދުމަތްތައް ފުޅާކޮށް އެއްވެސް ފަރުދެއް ބާކީ ނުވާނެ ސިޔާސަތެއް ބައްޓަންކުރުމަކީ ސަރުކާރުން ޚާއްޞަ އިސްކަމެއް ދެއްވާ ކަމެއް ކަމަށް ސަރުކާރުން ބުނެފައިވެއެވެ.