އިހުސާސް ކުރެވޭ ފިނިހޫނުމިން 35.6 އަށް ވުރެ މައްޗައް؛ ސަމާލުވުމަށް އެދިއްޖެ

މި ދުވަސްވަރު ދިވެހިރާއްޖޭގެ ފިނިހޫނުމިން 35.6 އަށް ވުރެ މައްޗައް ދާނެކަމަށް ލަފާކުރެވޭތީ ރައްކާތެރިވުމުގެ ގޮތުން ސަލާމަތީ ފިޔަވަޅުތައް އެޅުމަށް އެ.ޗް.ޕީ.އޭ އިން އިލްތިމާސް ކޮށްފިއެވެ.

އެ.ޗް.ޕީ.އޭ އިން އެކްސްގައި ކުރި ޕޯސްޓްއެއްގައި ބުނީ ހޫނުގަދަވުމުގެ ސަބަބުންނާއި އިރުގެ ދޯދިން ތުއްތު ކުދިންނާއި ކުޑަ ކުދިންނަށް ކުރާ އަސަރު ބޮޑު ކަމަށެވެ.

ކުޑަ ކުދިންގެ އިތުރުން، އުމުރުން ދުވަސްވީ މީހުންނާއި، މާބަނޑު މީހުންނާއި، ދާއިމީ ބަލިތަކަށް ބޭސްފަރުވާ ކުރާ މީހުންނާއި އަދި އަލީގައި ގިނަ ވަގުތު މަސައްކަތް ކުރަން ޖެހޭ ފަރާތްތަކަށްވެސް މިކަމުގެ ސަބަބުން ނުރައްކާވާނެ ކަމަށެވެ.

ހޫނުން ރައްކާތެރިވުމަށްޓަކާއި ހޫނުގަދަ ގަޑި ތަކުގައި ބޭރަށް ނުދިޔުމަށާއި، ތުއްތު ކުދިންނަށް ދިޔާ ތަކެއްޗާއި ފެން ދިނުމާއި، ގަޔަށްދޫ ތުނި ހެދުން ލުމާއި އަދި ހޫނު ގަޑި ތަކުގައި ބޭރަށް ދާއިރު ރައްކާތެރިވުމުގެ ގޮތުން ފިޔަވަޅުތައް އެޅުމަށް އެޗް.ޕީ.އޭ އިން އިލްތިމާސްކުރެވެ.

މެޓް އޮފީހުން ބުނީ މާރިޗު އަދި އޭޕްރިލް މަހަކީ މިއަހަރުގެ ތެރޭގައި ރާއްޖޭގެ ސަރަހައްދަށް ހޫނުމިން އެންމެ މައްޗައްދާ ދުވަސްވަރުކަމަށެވެ. މިދުވަސްވަރު ވިލާ މަދުވެފައި ވައިމަޑުވެ އަދި ވައިގެ ތެތްކަމުގެ ނިސްބަތް މަތީގައި ހިފަހައްޓައެވެ.

އަދި ދުވާލު ހޫނުމިން މަތިވެގެންދާވަރާއި ރޭގަނޑު ފިނިކަން ދަށްވެގެންދާވަރާ އަޅާބަލާއިރު، ފަރަގު ކުޑަވުމުގެ ނަތީޖާއަކީ އާންމު ވައިގެ ހޫނުމިނަށްވުރެ އިހްސާސްކުރެވޭ ހޫނުމިން މަތިވެގެން ދިއުންކަން މެޓް އޮފީހުން ފާހަގަކުރެއެވެ. މެޓުން ބުނީ ދުވަހުގެ ހޫނުމިން އާއްމު ގޮތެއްގައި އެންމެ މަތިވެގެން ދާނީ މެންދުރުފަހު 14:00 ހާއިރުކަމަށެވެ.