33 އަހަރަށްފަހު، އަރަފާތު ދުވަހު އިރު ގެފުޅާ ސީދާ އޮލަނބުވާނެ: ރިޕޯޓް

ފަލަކީ ގޮތުން ބަލާއިރު ވަރަށް މަދުން ނޫނީ ދިމާނުވާ ހާދިސާއެއް ކަމަށްވާ، އިރު ގެފުޅާ ސީދާ އޮލަނބުވުން މިއަހަރުގެ އަރަފާތު ދުވަހާ ދިމާވާނެ ކަމަށް ފަލަކީ މާހިރުން ހާމަކޮށްފިއެވެ.

ކޮންމެ 33 އަހަރަކުން އެއްފަހަރު ދިމާވާ ގުދުރަތީ މި ހާދިސާ އެންމެ ފަހުން ހިނގާފައިވަނީ 1993 ވަނަ އަހަރުގެ އަރަފާތު ދުވަހުއެވެ.

ފަލަކީ ހިސާބުތަކުން ދައްކާގޮތުގައި، 1447 ވަނަ އަހަރުގެ ޛުލްޙިއްޖާ މަހުގެ 9 ވަނަ ދުވަހު (26 މޭ 2026 ގައި) މައްކާ ގަޑިން މެންދުރު 12:18 ގައި އިރު ހުންނާނީ ގެފުޅުގެ ސީދާ މަތީގައެވެ.

މި ވަގުތަކީ މައްކާއަށް މެންދުރު ނަމާދު ވަގުތު ކަމަށްވާއިރު، އިރު ގެފުޅާ ސީދާ އޮލަނބަށް ހުރުމުގެ ސަބަބުން އެއްވެސް ދިމާލަކުން ހިޔަނި ފެންނާކަށް ނުހުންނާނެއެވެ. އެ ވަގުތު އިރު ދުނިޔެއާ ހުންނާނީ 151 މިލިއަން ކިލޯމީޓަރު ދުރުމިނުގައެވެ.

އާންމުގޮތެއްގައި މައްކާ އޮންނަ ސަރަހައްދުގެ ގޮތުން (ނޯތު ލެޓިޓިއުޑް 21.4 ގައި) އަހަރަކު ދެ ފަހަރު އިރު ގެފުޅާ ސީދާވެއެވެ. އެއީ އިރު، އީކުއޭޓަރާއި ޓްރޮޕިކް އޮފް ކެންސަރާ ދެމެދު ދަތުރުކުރާ ވަގުތުތަކުގައެވެ. ނަމަވެސް އިސްލާމީ ހިޖުރީ ކަލަންޑަރާއި މީލާދީ ކަލަންޑަރުގެ ދުވަސްތައް ދިމާވާގޮތުން، އަރަފާތު ދުވަހާ މި ހާދިސާ ދިމާވަނީ ކޮންމެ 33 އަހަރަކުން އެއްފަހަރެވެ.

މި ހާދިސާއާ ގުޅިގެން ސައުދީ އަރަބިއްޔާގެ ނެޝަނަލް ސެންޓަރ ފޯ މީޓިއޮރޮލޮޖީން ބުނެފައިވަނީ، މިއީ ގުދުރަތީ ފަލަކީ ހާދިސާއެއް ކަމަށާއި، މިކަމުގެ ސަބަބުން ފިނިހޫނުމިނަށް އާދަޔާ ހިލާފު ބޮޑު ބަދަލެއް ނާންނާނެ ކަމަށެވެ.

އެ ސެންޓަރުގެ ތަރުޖަމާނު ޙުސައިން އަލް ގަޙްތާނީ ވިދާޅުވި ގޮތުގައި، ފިނިހޫނުމިން ބިނާވަނީ ވައިގެ ތެތްކަމާއި، ވިލާ ބޯމިނާއި، ވައިގެ ދުވެއްޔާއި އަދި ވައިގެ ބުރަދަނުގެ މައްޗަށެވެ.

އޭނާ އިތުރަށް ވިދާޅުވީ، އިރު މިގޮތަށް ސީދާވުމުން އާދަޔާ ހިލާފު ހޫނެއް ވާނެ ކަމަށް ދެކެވޭ ވާހަކަތަކަކީ ސައިންޓިފިކް ހޯދުންތަކުން ސާބިތުވާ ކަމެއް ނޫން ކަމަށެވެ. އަދި މޫސުމާ ބެހޭ މައުލޫމާތުތައް ހޯދުމުގައި ރަސްމީ އިދާރާތަކަށް އިތުބާރު ކުރުމަށް އޭނާ ވަނީ އާންމުންނަށް އިލްތިމާސް ކުރައްވާފައެވެ.