އެމްޑީޕީ ކޮންގްރެސް ހުޅުވުމުގެ ޖަލްސާގައި ޕީއެންސީ ތަމްސީލުކުރައްވަން ޝިޔާމް

އިދިކޮޅު އެމްޑީޕީގެ ކޮންގްރެސް އިފުތިތާހުކުރުމުގެ ގޮތުން މިރޭ ބޭއްވި ޖަލްސާގައި ވެރިކަންކުރާ ޕީއެންސީ ތަމްސީލުކުރެއްވުމަށް އެ ޕާޓީގެ ނައިބު ރައީސް އަދި ފިޝަރީޒް މިނިސްޓަރު އަޙްމަދު ޝިޔާމް ވަޑައިގެންފިއެވެ.

ޕީއެންސީން އެ ޕާޓީގެ ކޮންގްރެސް ފެށިއިރު އެ ރަސްމިއްޔާތުގައި އެމްޑީޕީ ތަމްސީލުކުރެއްވީ އެ ޕާޓީގެ ޗެއާޕާސަން އަދި ކުރީގެ ރައީސް މުޙައްމަދު ނަޝީދެވެ.

މިރޭގެ އިފުތިތާހީ ޖަލްސާގައި ޗެއާޕާސަން ނަޝީދާއި ކުރީގެ ރައީސް އިބްރާހީމް މުޙައްމަދު ޞާލިޙް ވާހަކަފުޅު ދެއްކެވި އެޗެ. ކޮންގްރެސްގެ ރަސްމީ މަސައްކަތްތައް ފެށުމަށް ތާވަލުކޮށްފައި އޮތީ ހޮނިހިރު ދުވަހަށެވެ. އޭގެ ކުރިން މާދަމާ އިންވެސްޓްމަންޓް ފޯރަމެއް ބާއްވާނެއެވެ.

ކޮންގްރެސްގެ ތެރެއިން އެމްޑީޕީގެ އަސާސީ ގަވައިދަށް އިސްލާހު ގެނައުމާއި ބޮޑު ބަދަލާ ގުޅޭ ގަރާރާއި ލާމަރުކަޒީ ނިޒާމާ ބެހޭ ގަރާރަށް ބަހުސްކޮށް ގޮތެއް ނިންމާނެއެވެ.

އެމްޑީޕީގެ ޑެޕިއުޓީ ޗެއާޕާސަން އިބްރާހީމް ވަހީދު ކުރިން ނޫސްވެރިންނާ ވާހަކަ ދައްކަވަމުން ވިދާޅުވީ ކޮންގްރެސްއަށް ވަރަށް ބޮޑު ތަރުހީބެއް ލިބެމުން އަންނަ ކަމަށާއި 980 އަށް ވުރެ ގިނަ ބައިވެރިން ރަޖިސްޓްރީވެފައިވާ ކަމަށެވެ.

އިލެކްޝަންސް ކޮމިޝަންގެ ދަފްތަރުން ދައްކާ ގޮތުގައި އެމްޑީޕީގައި 55,399 މެންބަރުން ތިބި އިރު އެއީ މިވަގުތު ރާއްޖޭގައި ދެވަނައަށް އެންމެ މެންބަރުން ގިނަ ސިޔާސީ ޕާޓީއެވެ.