ރައީސް ނަޝީދަށް ދެވުނު ހަމަލާއަށް 4 އަހަރު، އިންސާފު ލިބިފައިނުވާތީ ކަންބޮޑުވަން: ދަ ޑިމޮކްރެޓްސް

ކުރީގެ ރައީސް މުޙައްމަދު ނަޝީދަށް 6 މޭ 2021 ވަނަ ދުވަހު ދެވުނު ޙަމަލާއަށް މިއަދަށް 4 އަހަރު ވެފަވާކަމަށާއި، އަހަރަކަށް ފަހު އަހަރެއް ފާއިތުވެދިޔަ އިރު މި މައްސަލައިގައި އެމަނިކުފާނަށް އިންސާފު ލިބިވަޑައިގެންފާ ނުވާކަމަށާއި، އެކަމާއި ކަންބޮޑުވާކަމަށް ދަ ޑިމޮކްރެޓްސްއިން ބުނެފިއެވެ.

ދަ ޑިމޮކްރެޓްސްއިން މިހެން ބުނެފައިވަނީ އެކަމާ ގުޅިގެން މިއަދު އެ ޕާޓީގެ ފަރާތުން ނެރުނު ނޫސް ބަޔާނެއްގައެވެ.

އެ ނޫސް ބަޔާނުގައިވާގޮތުން، މި މައްސަލާގައި ކުށަށް އިޢުތިރާފުވި، މީހެއްގެ މައްޗަށް ކުށް ސާބިތުވުން ފިޔަވައި، އިތުރު މީހެއްގެ މައްޗަށް މި ޙަމަލާއާގުޅިގެން ކުށެއް ސާބިތުކުރެވިފައި ނުވެއެވެ. އަދި މިމައްސަލައާގުޅޭ އިތުރު މަޢުލޫމާތު ލިބިވަޑައިގެންފައިވާކަމަށް ދިފާޢީ ވަޒީރު ޣައްސާން މަޢުމޫން ވިދާޅުވެފައިވީނަމަވެސް، މިކަމުގައި ދަޢުލަތުން އެޅުއްވި ފިޔަވަޅެއް މިހާތަނަށް އެނގެން ނެތްކަމުގައިވެސް ފާހަގަކޮށްފައިވެއެވެ.

"މި މައްސަލާގައި ކުށަށް އިއުތިރާފުވި މިހެއްގެ މައްޗަށް ކުށް ސާބިތުވުން ފިޔަވައި، އިތުރު މީހެއްގެ މައްޗަށް މިހަމަލާއާ ގުޅިގެން ކުށެއް ސާބިތުކުރެވިފައިނުވެއެވެ. އަދި މި ޙަމަލާދިނުމުގެ އަޑީގައި އެއްވެސް ފަރާތެއް ވާކަން ވެސް ތަޙުޤީގުން ހޯދިފައިނުވެއެވެ. އަދި މި މައްސަލައާގުޅޭ އިތުރު މަޢުލޫމާތު ލިބިވަޑައިގެންފައިވާކަމަށް މި ސަރުކާރުގެ ޑިފެންސް މިނިސްޓަރ 25 މާރިޗް 2024 ވަނަ ދުވަހު ރައްޔިތުން މަޖިލީހުގައި ވިދާޅުވި ނަމަވެސް، އެއަށްފަހު އެކަމުގައި ދައުލަތުގެ އެއްވެސް މުޢައްސަސާއަކުން އެޅުއްވި ފިޔަވަޅެއް މިހާތަނަށް އެނގެން ނެތްކަން ކަންބޮޑުވުމާއެކު ފާހަގަކުރަމެވެ."

ބަޔާނުގައި ވެއެވެ.

6 މޭ 2021 ވަނަ ދުވަހުގެ ރޭ 8:27 ހާއިރު ގ. ކެނެރީގެ އިން ކުރީގެ ރައީސް ނަޝީދު ބޮޑީގާޑުންނާ އެކު ނުކުމެވަޑައިގެން ކާރުކޮޅާ ދިމާއަށް ވަޑައިގަންނަވަނިކޮށް ދިން ބޮމުގެ ހަމަލާގައި އެމަނިކުފާނަށް ބޮޑެތި އަނިޔާތަކެއް ވެފައިވެއެވެ. ބޮން ފަރުމާ ކޮށްފައިވަނީ އެތެރެއަށް ރޭޒަރު ފުށްތަކެއް އަޅައިގެންނެވެ. މީގެ ސަބަބުން އެމަނިކުފާނުގެ ހަށިގަނޑުގެ ވަރަށް ގިނަ ތަންތަނަށް ހުރީ ރޭޒަރު ފުށް ވަދެ ބޮޑެތި ގެއްލުންތަކެއް ވެފައެވެ.

މި ޒަޚަމްތަކުގެ ސަބަބުން، އެމަނިކުފާނު 16 ގަޑިއިރުގެ ދިގު ސާޖަރީއެއް އޭޑީކޭ ހޮސްޕިޓަލުގައި ކުރަންޖެހުނުކަމަށްވެސް ޑިމޮކްރެޓްސްއިން ނެރުނު ބަޔާނުގައި ފާހަގަކޮށްފައިވެއެވެ.

މިހާތަނަށް އެ މައްސަލާގައި ހުކުމެއް އައިސްފައި ވަނީ ބޮމުގެ ހަމަލާ ދިނުމުގައި އަމަލީ ގޮތުން ބައިވެރިވި އަދި  ބޮން ގޮއްވާލަން ރިމޯޓަށް ފިތާލި، ވ. ތިނަދޫ، ހިޔާ، އަހުމަދު އަދުހަމްގެ މައްޗަށެވެ. އޭނާގެ މައްޗަށް އައިސްފައި ވަނީ 23 އަހަރުގެ ޖަލު ހުކުމެކެވެ.

މި ބަޔާނުގައި، ރައީސް މުހައްމަދު ނަޝީދު އަވަހާރަކޮށްލަން ދިން ބޮމުގެ ޓެރަރިސްޓް ހަމަލާގެ ތަހުޤީޤު ފުންމިނަށް ހިންގައި އެ ކަމުގެ އަޑީގައިވާ ފަރާތްތައް ހޯދުމަށް ޑިމޮކްރެޓްސް އިން ވަނީ ގޮވާލަފައެވެ.