އަނބިމީހާއަށް "ފަލައޭ" ބުނި މީހާއާ ދިމާއަށް ކަތިވަޅިއެއް ހިފައިގެން ދިޔަ މީހަކު ހައްޔަރުކޮށްފި

ސޯޝަލް މީޑިއާގައި އަނބިމީހާއާ ދިމާއަށް "ފަލައޭ" ބުނެ ފުރައްސާރަކުރި ކަމަށް ބުނެ، ތޫނު ހަތިޔާރާއެކު މާރާމާރީ ހިންގަން މަސައްކަތްކުރި މީހަކު ށ. މިލަންދޫން ހައްޔަރުކޮށްފިއެވެ.

މި މައްސަލައިގައި ހައްޔަރުކުރީ 22 އަހަރުގެ ޒުވާނަކާއި 31 އަހަރުގެ މީހެކެވެ.

މިލަންދޫ މެޖިސްޓްރޭޓް ކޯޓުގެ ބަންދު އަމުރުން އެނގޭ ގޮތުގައި، ޒުވާނާ ތޫނު ހަތިޔާރެއް ހިފައިގެން ގޮސްފައިވަނީ އެ ރަށު 31 އަހަރުގެ މީހެއް  ދިރިއުޅޭ ގޭގެ ސަރަޙައްދަށެވެ. އެ ސަރަޙައްދުގައި ޒުވާނާ ކަތިވަޅިއެއް ހިފައިގެން ހުރެ، އެތަނުގައި ހުރި އާންމު ފަރުދަކާ ދިމާއަށް ކަތިވަޅި މަޅައި "ނުފުއްޕައްޗޭ" ބުނެ އިންޒާރުދިންކަން މަންޒަރު ދުށް ހެކިންގެ ބަޔާންތަކުން ވަނީ އެނގިފައެވެ.

އަދި އެ ސަރަޙައްދަށް ފުލުހަކު އަންނަން އުޅުމުން، ޒުވާނާ ގެންގުޅުނު ކަތިވަޅި އޭނާ ދިޔަ ސައިކަލުގެ މަޑިދަށަށް ލައި ފޮރުވި ކަމަށާއި، ފުލުހުން އެ ސައިކަލު ބަލައިފާސްކުރިއިރު މަޑިދަށުން ކަތިވަޅިއެއްގެ އިތުރުން އިތުރު 2 ވަޅި ވެސް ފެނިފައިވާކަން ފުލުހުންގެ ބަހުން އެނގެއެވެ.

ކޯޓުގެ މުއްދަތު މަޖިލީހުގައި ޒުވާނާ ވަނީ އެ ސަރަޙައްދަށް ދިޔަކަމަށާއި، އަޑުގަދަކޮށް ވާހަކަދެއްކި ކަމަށާއި، އަދި އެތަނަށް ދިޔައިރު ހުރީ މަސްތުވާތަކެތި ބޭނުންކޮށްގެން ކަމަށް ބުނެ މައްސަލައިގެ ބައެއް ވާޤިޢާތަކަށް އިޤުރާރުވެފައެވެ.

މި މައްސަލައިގައި ގާޒީ ނެރުއްވި އަމުރުގައި ބަޔާންކޮށްފައިވަނީ، ޒުވާނާގެ މައްޗަށް ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ޤާނޫނުގެ 33 ވަނަ މާއްދާގެ ދަށުން ކުށްކުރަން އުޅުނުކަމުގެ ތުހުމަތާއި، 35 ވަނަ މާއްދާގައި ބަޔާންކުރާ ކުށް ކުރިކަމަށް ތުހުމަތުކުރެވޭ މިންވަރަށް ހެކި ލިބިފައިވާ ކަމަށެވެ.

އަދި އޭނާ ކުށުގެ ވެށީގައި މަސްތުގެ ހާލަތުގައި ހުރެ އެންމެ އިސް ދައުރެއް އަދާކޮށް ހަމަލާދޭން އުޅެފައިވާތީ، ޤާނޫނު ނަންބަރު 7/2015 ގެ 58 ވަނަ މާއްދާގެ (ޅ) ގެ ދަށުން އޭނާއަކީ ބަންދުގައި ބަހައްޓަންޖެހޭ މީހެއް ކަމަށް ޝަރީޢަތުން ވަނީ ނިންމާފައެވެ.

އެހެންކަމުން، 22 އަހަރުގެ މީހާގެ ބަންދަށް 12 ދުވަސް ޖަހައިދީފައިވެއެވެ. ނަމަވެސް 31 އަހަރުގެ މީހާ ބަންދުގައި ބެހެއްޓޭ ވަރަށް ހެކި ނެތް ކަމަށް ކަނޑައަޅައި ކޯޓުން ވަނީ އޭނާ ދޫކޮށްލައިފައެވެ.