އިސްރާއީލް ސިފައިން އެމްބިޔުލާންސްއަށް ހުރަސް އެޅުމުން، ފަރުވާ ލަސްވެ ބަނޑުގައި އޮތް ދަރިފުޅު މަރުވެއްޖެ

އިސްރާއީލުން ހިފާފައިވާ ހުޅަނގު އައްސޭރީގެ އަސްކަރީ ޗެކްޕޮއިންޓެއްގައި އިސްރާއީލް ސިފައިން އެމްބިއުލާންސް ހުއްޓުވައި ލަސްކުރުމުގެ ސަބަބުން، ބަނޑަށް ހަ މަސްވެފައިވާ ފަލަސްތީނުގެ އަންހެނެއްގެ ބަނޑުގައި އޮތް ދަރިފުޅު މަރުވެއްޖެއެވެ.

ގަރްޔޫތު އެމްބިއުލާންސް އޮފިސަރު ބަޝާރު އަލް-ގަރްޔޫތީއާ ހަވާލާދީ ވަފާ ނޫހުން ބުނީ، ނާބްލަސްގެ ދެކުނުގައި އޮންނަ އަވާރްތާ އަސްކަރީ ޗެކްޕޮއިންޓުގެ ގޭޓުތައް ބަންދުކޮށް، އެމްބިއުލާންސް ދަތުރުކުރުމަށް އިސްރާއީލް ސިފައިން ހުރަސްއެޅި ކަމަށެވެ. އެ ވަގުތަކީ ބަނޑަށް ހަ މަސްވެފައިވާ އެ އަންހެންމީހާގެ ހަށިގަނޑުން އިންތިހާއަށް ލޭ ފައިބަމުންދިޔަ، އޭނާގެ ހާލަތު ނާޒުކު ވަގުތެކެވެ.

އަލް-ގަރްޔޫތީ ހާމަކުރި ގޮތުގައި، އެމްބިއުލާންސްގެ ކުރޫއިން 30 މިނެޓަށްވުރެ ގިނަ އިރު ހިފެހެއްޓިއެވެ. އަދި އަންހެންމީހާގެ ހާލަތު ގޯސްވެފައިވީ ނަމަވެސް، އިސްރާއީލް ސިފައިން ވަނީ އޭނާ ފާސްކުރުމަށް މަޖުބޫރުކޮށްފައެވެ. މީގެ އިތުރުން، އެމްބިއުލާންސްގެ އިންޖީނު ނިއްވާލުމަށް ސިފައިން އަމުރުކުރުމުގެ ސަބަބުން، އެމްބިއުލާންސްގައި ހުރި މެޑިކަލް ސަޕޯޓް އިކުއިޕްމަންޓްތަކުގެ މަސައްކަތްވެސް ހުއްޓުނު ކަމަށް އޭނާ ބުންޏެވެ.

ގިނަ ވަގުތުތަކަކަށްފަހު ހޮސްޕިޓަލަށް ދިއުމުގެ ހުއްދަ ލިބުނުއިރު، ޑޮކްޓަރުންނަށް އަންހެންމީހާގެ ފުރާނަ ސަލާމަތް ކުރެވުނު ނަމަވެސް، އޭނާގެ ބަނޑުގައި އޮތް ދަރިފުޅު ވަނީ މަރުވެފައެވެ. މި ހާދިސާއާ ގުޅިގެން އިސްރާއީލްގެ އަސްކަރިއްޔާއިން އަދި އެއްވެސް އެއްޗެއް ބުނެފައެއް ނުވެއެވެ.

މި ހާދިސާ ހިނގާފައިވަނީ އިސްރާއީލުން ހުޅަނގު އައްސޭރީގެ އެކި ސަރަހައްދުތަކުގައި ދަތުރުފަތުރު ކުރުން ވަރަށް ބޮޑަށް ހަނިކޮށްފައިވާ ދަނޑިވަޅެއްގައެވެ. ވޭތުވެދިޔަ ދެ ދުވަހު އިސްރާއީލް ސިފައިން ވަނީ ރާމަالله، ނާބްލަސް އަދި ހެބްރޯންގެ އިތުރުން ގުދުސްގެ އުތުރުގައިވާ ބައެއް ޗެކްޕޮއިންޓްތައް ބަންދުކޮށް، ފަލަސްތީނު ރައްޔިތުންގެ ދަތުރުފަތުރަށް ބޮޑެތި ހުރަސްތަކެއް ކުރިމަތިކޮށްފައެވެ.

ހުޅަނގު އައްސޭރީގައި ނުތަނަވަސްކަން އިތުރުވެފައިވަނީ މިދިޔަ ހުކުރު ދުވަހު އިސްރާއީލް ސިފައިންގެ އެހީތެރިކަމާއެކު ޔަހޫދީ ވަޒަންވެރިން ދިން ހަމަލާތަކެއްގައި ފަލަސްތީނުގެ ހަތަރު މީހަކު ޝަހީދުކޮށްލުމާ ގުޅިގެންނެވެ.

މީގެ އިތުރުން ނިރުބަވެރި އިސްރާއީލްގެ ބޮޑުވަޒީރު ބެންޖަމިން ނަތަންޔާހޫ ވަނީ ހުޅަނގު އައްސޭރީގައި ދޭ ހަމަލާތައް އިތުރަށް ފުޅާކުރާނެ ކަމުގެ އިންޒާރު ދީފައެވެ.