ޖަބަލިއާ ކޭމްޕަށް އިޒްރާއީލުގެ ނިރުބަވެރިން ހަމަލާދީ، 33 މީހުން ޝަހީދުކޮށްލައިފި

ހައްދުފަހަނައަޅާފައިވާ އިސްރާއީލުގެ ނިރުބަވެރި ފައުޖުން ޣައްޒާގެ އެންމެ ބޮޑު އެއް ރެފިއުޖީ ކޭމްޕްކަމަށްވާ ޖަބަލިއާ ރެފިއުޖީ ކޭމްޕަށް ހަމަލާދީ 33 މީހުން ޝަހީދުކޮށްލައިފިއެވެ.

މި ނިރުބަވެރި ހަމަލާގައި 85 މީހުން ޒަހަމްވެފައިވާއިރު، ޣައްޒާގެ ސިއްހީ މުއައްޒަފުން ބުނީ، އިސްރާއީލުން އެ ސަރަހައްދުގައި ހުރި ގެތަކަށް ހަމަލާދީފައިވާކަމަށާއި، ޓޭންކަރުތައް ބޭނުންކޮށްގެން އެ ސަރަހައްދުގެ މަގުތަކާއި ބައެއް ގެތައް ގޮއްވާލާފައިވާކަމަށެވެ.

ޣައްޒާގެ ހެލްތު މިނިސްޓްރީން ބުނީ، މި ހަމަލާގައި ބައެއް މީހުން އަދިވެސް އިމާރާތްތަކުގެ ދަށުގައި ތާށިވެފައިވާކަމަށް ގަބޫލުކުރެވޭތީ، ޝަހީދުވި މީހުންގެ އަދަދު މިއަށްވުރެ ވެސް އިތުރުވުން އެކަށީގެންވާކަމަށެވެ.

މީގެ އިތުރުންވެސް ޔަހޫދީ ފައުޖުން ވަނީ އިއްޔެ ހިންގި އުދުވާނުގައި 39 މީހުން ޝަހީދުކޮށްލާފައެވެ. މީގެ ތެރެއިން 20 މީހުން ޝަހީދުކޮށްލާފައިވަނީ ޖަބަލިއާގައި ހިންގި އަނިޔާވެރިކަމުގެ ތެރޭގައެވެ.

ޖަބަލިއާގައި ދިރިއުޅެމުންދާ ފަރާތްތަކުން ބުނި ގޮތުގައި، ޔަހޫދީ ފައުޖުގެ ޓޭންކަރުތައް މިހާރު ވަނީ ރެފިއުޖީ ކޭމްޕްގެ މެދަށް ވަދެގެންފައެވެ. އެމީހުން ބުނި ގޮތުގައި ވައިގެ މަގުންނާއި އެއްގަމުންވެސް ޔަހޫދީން ފައުޖުން ދަނީ ކޮންމެ ދުވަހަކުވެސް އެ ސަރަހައްދުގައި ހުރި ގެތައް ސުންނާފަތި ކުރަމުންނެވެ.

މިދިޔަ އަހަރުގެ އޮކްޓޫބަރު މަހު އިސްރާއީލުން ޣައްޒާއަށް ދެމުން އަންނަ އުދުވާނީ ހަމަލާތަކަށް ހުއްޓުމެއް އައިސްފައިނުވާއިރު، މި ގަތުލުއާއްމުގައި މިހާތަނަށް 42,000 އަށްވުރެ ގިނަ މީހުން ވަނީ ޝަހީދުވެފައެވެ.