ވިލާކޮލެޖް އަބަދުވެސް ދެމިއޮންނާނީ ފެންވަރު ރަނގަޅު މަތީތަޢުލީމު ފޯރުކޮށްދިނުމަށް: ގާސިމް

ވިލާކޮލެޖް އަބަދުވެސް ދެމިއޮންނާނީ ދަރިވަރުންނަށް ފެންވަރު ރަނގަޅު މަތީތައުލީމު ފޯރުކޮށްދިނުންމަތީގައިކަމަށް އެ ކޮލެޖްގެ ޗެއާމަން ގާސިމް އިބްރާހީމް ވިދާޅުވެއްޖެއެވެ.

ގާސިމް މިހެން ވިދާޅުވީ ވިލާކޮލެޖަށް އަދި ވިލާ އިންޓަރނޭޝަނަލް ހައި ސްކޫލަށް މިއަދު 17 އަހަރު ފުރުން ފާހަގަކުރާ މުނާސަބާއާ ގުޅިގެން އެކްސްގައި ކުރެއްވި ޕޯސްޓެއްގައެވެ. ގާސިމް ވިދާޅުވީ، އިއްޔެއާއި މިއަދުވެސް ވިލާކޮލެޖުން އަހްމިއްޔަތުކަންދީފައިވާނީ ދަރިވަރުންނަށް ފެންވަރުރަނގަޅު މަތީތަޢުލީމުގެ ނަމޫނާ ފުރުޞަތުތައް ފޯރުކޮށް ދިނުމަށް ކަމަށެވެ. ހަމަ އެހެންމެ، މާދަމާވެސް ވިލާކޮލެޖް ދެމި އޮންނާނީ އެގޮތުގައިކަމަށް ގާސިމް ވިދާޅުވިއެވެ.

ވިލާކޮލެޖް ވުޖޫދަށް ގެނައުމުގެ މައިގަނޑު މަގްސަދަކީ ދިވެހިދަރިވަރުންނަށް، ދިވެހިރާއްޖޭގައި މަތީ ތަޢުލީމުގެ ޒަމާނީ ފެންވަރުގެ ފުރިހަމަ ފުރުޞަތު ފޯރުކޮށްދިނުމެވެ. ގާސިމް ވަނީ ވިލާކޮލެޖަށް އަދި ވިލާ އިންޓަރނޭޝަނަލް ހައި ސްކޫލަށް މިއަދު 17 އަހަރު ފުރުމާ ގުޅިގެން ދުވަހުގެ ތަހްނިޔާ އާއި ހެޔޮ އެދުންތައް ވިލާކޮލެޖާއި ވިލާ އިންޓަރނޭޝަނަލް ހައިސްކޫލުގެ ގެ މެނޭޖްމަންޓާއި، އޭރާއި މިހާރުގެ އެންމެހާ ދަރިވަރުންނަށް އަރިސްކޮށްފައެވެ.

ވޭތުވި 17 އަހަރުގައި ވިލާކޮލެޖުން ވަނީ މަތީތަޢުލީމުގެ، ފެންވަރުރަނގަޅު އެތަކެއް ފުރުޞަތުތަކެއް ދިވެހިދަރިވަރުންނަށް ފޯރުކޮށްދީފައެވެ. ދުނިޔޭގެ ނަން ހިނގާ ޔުނިވަރސިޓީތައް ޤަބޫލު ކުރާ އެންމެ މަތީ މިންވަރަށް އަދި ރާއްޖޭގެ ކޮލިފިކޭޝަން އޮތޯރިޓީ ޤަބޫލު ކުރާ އެންމެ މަތީ މިންގަނޑުތަކަށް ފެތިފައިވާ އޭލެވަލް އާއި، ސެޓްފިކޭޓްލެވަލް ޕްރޮގްރާމްތަކާއި، ޑިޕޮލޮމާއާއި، ބެޗްލާސް ޑިގްރީގެ އިތުރުން މާސްޓާސް ޑިގްރީގެ އެތަކެއް ހާސް ދަރިވަރުންވަނީ ވިލާކޮލެޖުން ދަސްވެނިވިފައެވެ.

އެކްސްގެ މި ޕޯސްޓްގައި ގާސިމް ވަނީ ވިލާ ކޮލެޖު ހިންގެވުމުގައި ފުރަތަމަ ދުވަހުން ފެށިގެން ރެކްޓަރ ޑރ އަޙްމަދު އަންވަރު ކުރައްވާފައިވާ އަދި ކުރައްވަމުން ގެންދަވާ މަސައްކަތްޕުޅުތަކަށާއި އަދި ކޮލެޖުގެ ވައިސްރެކްޓަރުން، ފެކަލްޓީތަކުގެ ޑީނުންނާއި، ކޮލެޖުގެ އިދާރީ އެންމެހާ މުއައްޒަފުންނާއި، ލެކްޗަރަރއިންގެ އިތުރުން ވިލާ އިންޓަރނޭޝަނަލް ހައިސްކޫލު ހިންގަވަމުން ގެންދަވާ އެންމެހާ ފަރާތްތަކަށް ޝުކުރު އަދާކުރައްވާފައެވެ.

ވިލާ ކޮލެޖަކީ 2007 ވަނަ އަހަރު ވުޖޫދަށް އައި ކޮލެޖެކެވެ. އެންމެ 4 ކްލާސްރޫމާއި، 54 ދަރިވަރުންނާއެކު ކިޔަވައިދޭން ފެށި ވިލާ ކޮލެޖަކީ މިއަދު ރާއްޖޭގައި ހުރި އެންމެ ބޮޑު އަމިއްލަ ކޮލެޖެވެ. ވިލާ ކޮލެޖުން 150 ހަށްވުރެ ގިނަ ޕްރޮގްރާމް ހިންގަމުން އަންނައިރު، މީގެ ތެރޭގައި މެލޭޝިއާ އަަދި އިނގިރޭސިވިލާތުގެ ޔުނިވަރސިޓީތަކުގެ ޕްރޮގްރާމްތައް ހިމެނޭކަން ފާހަގަކޮށްލެވެއެވެ.

މިހާތަނަށް ވިލާކޮލެޖުން 21،000 ހާހަށްވުރެ ގިނަ ދަރިވަރުން ވަނީ ދަސްވެނިވިފައިވާކަމަށް އެ ކޮލެޖުން ބުނެއެވެ.