މިނިވަން ކަމާއެކު އީޕީއޭއަށް މަސައްކަތް ކުރެވޭގޮތް ހެދުމަށްޓަކައި ބޭނުންވާ ވަސީލަތްތައް ފޯރުކޮށްދޭނަން: ތޯރިގު

ތިމާވެއްޓާ ގުޅުންހުރި މައްސަލަތައް ބެލުމަށް އުފައްދާފައިވާ، އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ) މިނިވަން ކަމާއެކު އީޕީއޭއަށް މަސައްކަތް ކުރެވޭގޮތް ހެދުމަށްޓަކައި ބޭނުންވާ ވަސީލަތްތައް ސަރުކާރުން ފޯރުކޮށްދޭނެ  ކަމަށް މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވަޒީރު ތޯރިގް އިބްރާހިމް ވިދާޅުވެއްޖެއެވެ.

ވަޒީރު ތާރިގް މިފަދައިން ވިދާޅުވީ، ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ކ. ގުޅީފަޅު ހިއްކުން މަޑުޖައްސައިލަން އަންގައި ހައިކޯޓުން ނެރުނު ވަގުތީ އަމުރު ބާތިލުކުރަން ސުޕްރީމް ކޯޓުން ހުކުމްކުރިއިރު، އެ ހުކުމުގައި، އީޕީއޭ ބާރުވެރިކޮށް ގާނޫނީގޮތުން މިނިވަން ކުރުމާބެހޭގޮތުން ފަނޑިޔާރު ދެއްކެވި ވާހަކަފުޅާ ގުޅިގެން، ނޫސްވެރިއަކު ކުރި ސުވާލަށް ޖަވާބުދެއްވަމުންނެވެ.

"އަދިއެއް ގާނޫނީ ގޮތުން އީޕީއޭ މިނިވަންކުރުމުގެ ވިސްނުމެއް ނެތް،"

ވަޒީރު ތާރިގު ވިދާޅުވިއެވެ.

ވަޒީރު ތާރިގު ވިދާޅުވީ، އީޕީއޭ މިނިވަން ކުރުމުގެ ވިސްނުން ނެތް ނަމަވެސް މިނިވަން ކަމާއެކު އީޕީއޭއަށް މަސައްކަތް ކުރެވޭގޮތް ހެދުމަށްޓަކައި، އެތަނަށް ބޭނުންވާ އިންސާނީ ވަސީލަތްތައް ހޯދަމުންދާ ކަމަށެވެ.

"އީޕީއަށް ބޭނުންވާ މުހިއްމު މަސައްކަތްތައް އަޅުގަނޑުމެން މިދަނީ ފޯރުކޮށްދެމުން، އެތަނަށް ބޭނުންވާ އިންސާނީ ވަސީލަތްތަކާއި އިކުއިޕްމެންޓްތައް ހޯދައިދީ އެތަނުން ވީހާވެސް އިންޑިޕެންޑެންޓްކޮށް މަސައްކަތް ކުރެވޭގޮތަށް،"

ވަޒީރު ތޯރިގު ވިދާޅުވިއެވެ.

އީޕީއޭ ގާނޫނީގޮތުން މިނިވަން ކުރުމުގެ ވާހަކަތައް ނިމިދިޔަ ސަރުކާރުން ދައްކާފައިވާއިރު، ސަރުކާރު ނިމުނުއިރު ވެސް އެކަން ކުރެވިފައެއް ނުވެއެވެ.

ރިޔާސީ ގަރާރަކުން 2008 ވަނަ އަހަރު އުފެއްދި އީޕީއޭ މިހާރު ހިންގަނީ އެންވަޔަރަމަންޓު މިނިސްޓްރީގެ ދަށުންނެވެ.