މާލޭގައި ދުވަހަކު ނޫޅޭ މީހުން ހިމެނޭހެން ކުރީ ސަރުކާރުން ޢާންމުކުރި ލިސްޓަށް ފްލެޓު ދީގެންނުވާނެ: ސައިފް
މާލޭގައި ދުވަހަކު ނޫޅޭ މީހުން ހިމެނޭހެން ކުރީގެ ރައީސް އިބްރާޙިމް މުހައްމަދު ޞާލިހުގެ ސަރުކާރުން ޢާންމުކުރި ލިސްޓަށް ފްލެޓު ދީގެންނުވާނެކަމަށް ގަލޮޅު އުތުރު ދާއިރާގެ ކައުންސިލް މެންބަރު މުޙައްމަދު ސައިފް ފާތިޙް ވިދާޅުވެއްޖެއެވެ.
މާލެ ސިޓީ ކައުންސިލްގެ 4 ވަނަ ދައުރުގެ 154 ވަނަ ރަސްމީ ޖަލްސާގައި ވާހަކަފުޅު ދައްކަވަމުން ސައިފް ވިދާޅުވީ، ފުރަތަމަ މި ލިސްޓް ކުރީ ސަރުކާރުން އެކުލަވާލި ގޮތުގެ މައްޗަށް ފްލެޓް ދޫކުރެވެން ނެތްކަން ގަބޫލުކުރާ ކަމަށެވެ.
"އަޅުގަނޑުވެސް ބެލި ބައެއް ބެލުންތަކުން އިނގޭ ދަރިއަކު ނެތް މީހުންނަށް މެނުއަލީ ދަރިއަކު ހުރިކަމަށް މެނުއަލީ ބަދަލުކޮށްގެން ފްލެޓް ދީފައި އެބަހުރި. އަޅުގަނޑަށް އެނގިގެން ނ އަތޮޅުގެ ސްކޫލް ގެ ޓީޗަރަކަށް، އެތައް އަހަރަކު، ޓެން އިޔާޒް އަށް ވުރެ ގިނަ ދުވަހު މަސައްކަތް ކުރައްވާފައި ހުރި ބޭފުޅަކަށް މާލޭގައި 15 އަހަރު ދިރިއުޅުކަމުގެ ލިޔުންދީގެން ފްލެޓް ލިބޭނެ ކަމުގެ ލިސްޓްގައި ހިމެނިފައި އެބަހުރި."
ސައިފް ވިދާޅުވިއެވެ.
އެހެންކަމުން ކުރީ ސަރުކާރުން އެކުލަވާލި ލިސްޓްގައިވާގޮތަށް ފްލެޓްތައް ނުބެހޭނެ ކަމަށާއި، އެ ފްލެޓްތައް ލިބޭނީ މާލޭގެ ސަރަހައްދުގައި ނުވަތަ މާލޭގައި ހަގީގަތުގައި ވެސް ދިރިއުޅޭ ރައްޔިތުންނަށް ކަމަށް ސައިފް ވިދާޅުވިއެވެ.
ފްލެޓްތަކަކީ ސިޔާސީ ގޮތުން މަންފާއެއް ހޯދަން އިންތިހާބަކާއި ދިމާކޮށް ބަހާލާއެއްޗަކަށް އެއްވެސް އިރެއްގައި ފްލެޓްވެސް ގޯތިވެސް ވެގެންނުވާނެ ކަމަށް ވެސް ސައިފް ވިދާޅުވިއެވެ.
ސައިފް ވިދާޅުވީ، މި ލިސްޓަށް ވަރަށް ގިނަ ދުވަސްވެފައިވާ ކަމަށާއި، ނުގަވައިދުން ބަޔަކަށް ލިސްޓްގައި ނަންތަކެއް ހިމެނިފައި ހުރިކަމަށް ވިޔަސް އެ ލިސްޓްގައި ގިނަ ވާނީ ރަނގަޅަށް ހިމެނިފައި ހުރި ނަންތައް ކަމަށެވެ. އަދި ހައްގުވެރިންގެ ނަންތައް ހިމެނިފައި އޮތްލެއް ގިނަވާނެ ކަމަށާއި، އެހެންކަމުން ރަނގަޅަށް އެވޯޑްކޮށްފައި ހުރި ފަރާތްތަކަށް އަވަހަށް ފްލެޓް ހަވާލުކުރުމަކީ ވަރަށް މުހިންމު ކަމެއްކަން ސައިފް ފާހަގަކުރެއްވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
