ކުޑަހުވަދޫ ރައްޔިތުންގެ އެހީގައި ޣައްޒާގެ 1300 މީހުންނަށް ރޯދަވީއްލުން ދީފި

ދ. ކުޑަހުވަދޫ ރައްޔިތުންގެ ފަރާތުން ފަލަސްޠީނުގެ ޣައްޒާގައި ހާލުގައި ޖެހިފައިވާ މުސްލިމުންނަށް އެހީތެރިވުމަށް ހިންގި ޚާއްޞަ ހަރަކާތެއްގެ ދަށުން، ޣައްޒާގެ 1300 އެއްހާ ފަރާތަކަށް ރޯދަވީއްލުން ފޯރުކޮށްދީފިއެވެ.

"95" ގެ ނަމުގައި ކުރިއަށް ގެންދިޔަ މި ކެމްޕޭނަކީ ޣައްޒާގެ މުސްލިމުންނަށް ރޯދަވީއްލުމުގެ ޕެކޭޖް ފޯރުކޮށްދިނުމަށް އަމާޒުކޮށްގެން ހިންގުނު ކެމްޕޭނެކެވެ. މި ހަރަކާތް ކުރިއަށް ގެންގޮސްފައިވަނީ މިއަހަރުގެ ފެބްރުއަރީ މަހުގެ 26 އިން ފެށިގެން މާޗް މަހުގެ 7 ވަނަ ދުވަހުގެ ނިޔަލަށެވެ.

މި ކެމްޕޭނުގެ ދަށުން ކުރިއަށް ގެންދިޔަ ފަންޑްރެއިސިންގ އިވެންޓުން އެކަނިވެސް 1300 ފަރާތަކަށް ރޯދަވީއްލުން ދެވޭނެ މިންވަރަށް ފައިސާ އެއްކުރެވުނެވެ. އަދި މުޅި ކެމްޕޭނުން ޖުމްލަ 123,500 (އެއްލައްކަ ތޭވީސްހާސް ފަސްސަތޭކަ) ރުފިޔާ ވަނީ ފަންޑު ރެއިސް ކުރެވިފައެވެ. މި އެހީގެ ދަށުން މިހާރު ޣައްޒާގެ މުސްލިމުންނަށް ވަނީ ރޯދަވީއްލުން ފޯރުކޮށްދެވިފައެވެ.

މި އިންސާނީ އެހީގެ ހަރަކާތް ކުޑަހުވަދޫގައި ކުރިއަށް ގެންގޮސްފައިވަނީ އިންޓަނޭޝަނަލް އެއިޑް ކެމްޕެއިން (އައި.އޭ.ސީ) އާ ގުޅިގެންނެވެ. ޣައްޒާގެ ރައްޔިތުންނަށް އިޒްރޭލުން ދެމުންދާ ލާމާނުކަންބޮޑު ހަމަލާތަކުގެ ސަބަބުން ކާބޯތަކެއްޗަށް ޖެހިފައިވާ މި ދަނޑިވަޅުގައި، ކުޑަހުވަދޫ ރައްޔިތުން ދެއްކި މި ދީލަތި އެހީތެރިކަމަކީ އެ ރަށުގެ ރައްޔިތުންނަކީ މިފަދަ އިސްލާމީ އަދި އިންސާނީ ކަންކަމުގައި ނަމޫނާ ބައެއްކަން ހާމަކޮށްދިން ކަމެކެވެ.

ފަލަސްޠީނުގެ އަޚުންނާއި އުޚުތުންނަށް އެހީވުމުގައި ދިވެހި ރައްޔިތުން އަބަދުވެސް ދައްކަމުންދާ ސާބިތުކަމާއި ލޯބި، މި ހަރަކާތުންވެސް ވަނީ ވަރަށް ބޮޑަށް ފެނިގެން ގޮސްފައެވެ.