އިލެކްޝަންސް ކޮމިޝަންގެ 2024 ހަރަދުތައް ކޮށްފައިހުރީ ރަނގަޅަށް: އޮޑިޓް

އިލެކްޝަންސް ކޮމިޝަން (އީސީ) އިން 2024 ވަނަ އަހަރު ކޮށްފައިވާ ޚަރަދުތަކަކީ ދައުލަތުގެ މާލިއްޔަތުގެ ގަވާއިދާއި އުސޫލުތަކާ އެއްގޮތަށް ކޮށްފައިވާ ޚަރަދުތަކެއް ކަމަށް އޮޑިޓަރ ޖެނެރަލްގެ އޮފީހުން ހާމަކޮށްފިއެވެ.

އޮޑިޓަރ ޖެނެރަލްގެ އޮފީހުން ނެރުނު އިލެކްޝަންސް ކޮމިޝަންގެ 2024 ވަނަ އަހަރުގެ އޮޑިޓް ރިޕޯޓުގައި ބަޔާންކޮށްފައިވާ ގޮތުގައި، އެ ކޮމިޝަނަށް ފާސްކޮށްދީފައިވާ ބަޖެޓުގެ ޚަރަދުތައް މައިގަނޑު ގޮތެއްގައި ހިންގާފައިވަނީ ދައުލަތުގެ މާލިއްޔަތުގެ ގާނޫނާއި ގަވާއިދާ އެއްގޮތަށެވެ.

މި އޮޑިޓްގައި އެންމެ ބޮޑު އިސްކަމެއް ދީގެން ބަލާފައިވާ "ކީ އޮޑިޓް މެޓަރސް" ތަކުގެ ތެރޭގައި އިންތިޚާބުތަކަށް ކުރެވުނު ޚަރަދާއި ސިޔާސީ ޕާޓީތަކަށް ދޫކޮށްފައިވާ ފައިސާ ހިމެނެއެވެ.

އިންތިޚާބުތަކަށް ކުރި ޚަރަދު

2024 ވަނަ އަހަރު ބޭއްވުނު އިންތިޚާބުތަކަށް ޖުމުލަ 68,525,472 (ފަސްދޮޅަސް އަށް މިލިއަން ފައްސަތޭކަ ފަންސަވީސް ހާސް ހަތަރު ސަތޭކަ ހަތްދިހަ ދެ) ރުފިޔާ ޚަރަދުކޮށްފައިވެއެވެ. މިކަން ޚާއްސަ ގޮތެއްގައި ބަލާފައިވަނީ އިންތިޚާބާ ގުޅިގެން ގިނަ އަދަދެއްގެ ވަގުތީ މުވައްޒަފުން ނަގައި، މުސާރައާއި ދަތުރުފަތުރުގެ ޚަރަދުތައް ބޮޑުވެފައިވާތީއެވެ.

އޮޑިޓްގައި ބަލާފައިވަނީ މި ޚަރަދުތައް ކޮށްފައިވަނީ މާލިއްޔަތު ގަވާއިދާ އެއްގޮތަށްތޯއާއި، އިތުރުގަޑީގެ ފައިސާއާއި އިނާޔަތްތައް ދީފައިވަނީ ކަނޑައެޅިފައިވާ ރޭޓުތަކުގައިތޯއެވެ.

ސިޔާސީ ޕާޓީތަކަށް ދޫކުރި ފައިސާ

މިއަހަރުގެ ތެރޭގައި ސިޔާސީ ޕާޓީތަކަށް ޖުމުލަ 44,099,905 (ސާޅީސް ހަތަރު މިލިއަން ނުވަދިހަ ނުވަ ހާސް ނުވަސަތޭކަ ފަސް) ރުފިޔާ ދޫކޮށްފައިވެއެވެ. މިއީ ދައުލަތުގެ ބަޖެޓުގެ އާމްދަނީގެ %0.1 އާއި %0.2 އާ ދެމެދުގެ އަދަދަކަށް ވާންޖެހޭތީއާއި، މިއީ ހިރާސް އެކުލެވޭ ކަމަކަށްވާތީ، އޮޑިޓަރުން ވަނީ މި ފައިސާ ދޫކޮށްފައިވަނީ ސިޔާސީ ޕާޓީތަކުގެ ގާނޫނާ އެއްގޮތަށްތޯ ކަށަވަރުކޮށްފައެވެ.

އޮޑިޓްގެ ނިންމުމުގައި ބަޔާންކޮށްފައިވަނީ އިލެކްޝަންސް ކޮމިޝަންގެ 2024 ވަނަ އަހަރުގެ ބަޖެޓުން ޚަރަދުކޮށްފައިވަނީ ފާސްކޮށްފައިވާ މިންވަރަށް، ދައުލަތުގެ މާލިއްޔަތުގެ ގާނޫނާއި ގަވާއިދާ އެއްގޮތަށް ކަމަށެވެ.

އަދި ކޮމިޝަންގެ އެހެނިހެން މާލީ ކަންކަންވެސް ބަލަހައްޓާފައިވަނީ ގާނޫނީ އިމުގެ ތެރެއިންކަން އޮޑިޓުން ވަނީ ބުނެފައެވެ.