2028 ގައި މާލެ ސަރަހައްދުން ގިނަ ބަޔަކަށް ފްލެޓް ލިބޭނެ: ރައީސް
ދެހާސްއަށާވީސް ވަނަ އަހަރު މާލެ ސަރަހައްދުން ގިނަ ބަޔަކަށް ފްލެޓް ލިބޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެެއްޖެ އެވެ.
އެމަނިކުފާނު މިހެން ވިދާޅުވީ ރައީސްއާ ބައްދަލުކުރައްވަން އެދޭ ފަރާތްތަކާ ވަކިވަކިން ބައްދަލުކުރައްވާ، ވީހާވެސް ފުޅާ ދާއިރާއެއްގައި އެފުރުޞަތު ދެއްވުމަށްޓަކައި ފަށްޓަވާފައިވާ "ރައްޔިތުންގެ އަޑު" ސިލްސިލާގެ އިތުރު ބައްދަލުވުންތަކެއް ބާއްވަވާ ދެއްކެވި ވާހަކަފުޅުގަ އެވެ.
މި ބައްދަލްވުންތަކުގައިވެސް ރައްޔިތުންގެ އެންމެ ބޮޑު ކަންބޮޑުވުމަކަށްވީ ބޯހިޔާވަހިކަން ނެތުމުގެ މައްސަލަ އެވެ. އެ މައްސަލައާ ގުޅޭގޮތުން ވާހަކަ ދައްކަވަމުން ރައީސް ވިދާޅުވީ އެންމެ ދަތިވާ މައްސަލަ އަކީ ބޯހިޔާވަހިކަން ކަން އެނގިވަޑައިގަންނަވާ ކަމަށާ އެކަމަށް ހައްލު ހޯއްދަވައިދެއްވުމަކީ އެންމެ ބޮޑު އަމާޒު ކަމަށެވެ.
އަދި ވިދާޅުވީ ކުރިއަށް އޮތް އަހަރުތަކުގައި ގިނަ ރައްޔިތުންތަކަކަށް ފްލެޓް ލިބޭނެ ކަމަށެވެ.
"2028ގެ ތެރޭގައި ވަރަށް ގިނަ ބަޔަކަށް ލިބޭނެ ފްލެޓް މި ސަރަހައްދުން [މާލެ ސަރަަހައްދުން] އިރާދަކުރެއްވިއްޔާ," ރައީސް ވިދާޅުވި އެވެ.
މާލޭގައި ދިރިއުޅޭތާ އެތައް އަހަރެއްވީއިރު ވެސް އަދި ރާއްޖޭގެ އެެއްވެސް ތަނެއްގައި ބޯހިޔާވަހިކަމެއް ނެތްއިރު ފްލެޓަށް ޝަރުތު ހަމަނުވާތީ ބައެއް ރައްޔިތުން ކަންބޮޑުވުން ނުފާޅުކުރި އެވެ. އެހެން ދިމާވަނީ ފްލެޓް ކަނޑައަޅާއިރު ނުފޫޒު ވަންނާތީކަން ފާހަގަ ކުރައްވާ ރައީސް ވިދާޅުވީ މި ފަހަރު އެފަދަ އެއްވެސް ނުފޫޒެއް ވަނަނުދޭނެ ކަމަށެވެ. އަދި އިންސާފުން ހަމަހަމަކަމާއެކު ކުރިއަށް ގެންދަވާނެ ކަމުގެ ޔަގީންކަން ދެއްވި އެވެ.
"މި ފަހަރު ގޯސްތަކެއް ނުހަދާނެ. އިރާދަކުރެއްވިއްޔާ އެކަހަލަ ކަމެއް ވިޔަކަ ނުދޭނަން," ރައީސް ވިދާޅުވި އެވެ.
ރައީސް ވިދާޅުވީ އަމާޒަކީ ވީހާވެސް ގިނަ ހައުސިން މަޝްރޫއުތައް މާލެ އާއި އަތޮޅުތެރޭގައި ކުރިއަށް ގެންދިއުން ކަމަށާ އެ މަޝްރޫއުތައް ނިމި ވަރަށް ގިނަ ބަޔަކަށް ފުރުސަތު ފަހިވެގެންދާނެ ކަމުގެ ޔަޤީންކަން އެބަ އޮތް ކަމަށެވެ.
އަދި މި ފަހަރު ފްލެޓް ދޭއިރު ކުރީން ލިޔުން ލިބި ފްލެޓް އަތުލާފައި ތިބި މީހުންނަށް އިސްކަން ދޭނެ ކަމަށްވެސް ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
