"ސިލޯނާއެކު ދިވެހިން" ތެލެތޯން، މާދަމާ ދޭއް ޖެހުމާ ހަމަޔަށް ކުރިއަށްގެންދަން ނިންމައިފި

އަވައްޓެރި ސްރީލަންކާއަށް އެހީވުމުގެ ގޮތުން ދިވެހި މީޑިއާތަކުން ކުރިއަށްގެންދާ "ސިލޯނާއެކު ދިވެހިން" ތެލެތޯން މާދަމާ 2 ޖެހުމާ ހަމަޔަށް ކުރިއަށްގެންދިއުމަށް ނިންމައިފިއެވެ.

ތެލެތޯން އިންތިޒާމްކުރާ ކޮމިޓީގައި އިސްކޮށް ހުންނަވާ އަދި ޕީއެސްއެމްގެ ޑެޕިއުޓީ މެނޭޖިން ޑިރެކްޓަރު ޔާމިން ރަޝީދު ވިދާޅުވީ ތެލެތޯންގެ މުއްދަތު އިތުރުކުރީ އަދިވެސް އެހީވާން ބޭނުންވާ ފަރާތްތައް ތިބުމާއެކު އެފަރާތްތަކަށް ފުރުސަތު ދިނުމުގެ ބޭނުމުގައި ކަމަށެވެ. އެންމެ ފުރަތަމަ ރާވާފައި އޮތީ މިރޭގެ 1 ޖެހުމާ ހަމަޔަށް ތެލެތޯން ކުރިއަށްގެންދާ ގޮތަށެވެ.

ތެލެތޯނަށް މިހާތަނަށް 2.3 މިލިއަން ދިވެހި ރުފިޔާ ލިބިފައިވާއިރު، އެމެރިކާ ޑޮލަރުގެ ގޮތުގައި ވަނީ 38 ހާހށްވުރެ ގިނަ ޑޮލަރު ލިބިފައެވެ. މި ޓެލެތޯނަށް ފަންޑު އެއްކުރުމަށްޓަކައި މާލެ، ހުޅުމާލެ އަދި ވިލިމާލޭގެ އެކި ސަރަޙައްދުތަކުގައި ފަންޑު ފޮށިތައް ބެހެއްޓުމުގެ އިތުރުން، ފައިސާ ޖަމާކުރުމަށް އިންތިޒާމްވެސް ވަނީ ހަމަޖައްސާފައެވެ.

މިގޮތުން، ޓީވީ ސްކްރީނަށް އަރާ ކިއުއާރްކޯޑު ސްކޭންކޮށްގެން، ނަގުދު ފައިސާ، ޓްރާންސްފަރ، އަދި ބޭންކް ޗެކް މެދުވެރިކޮށްވެސް ފައިސާ ހަދިޔާ ކުރެވޭނެއެވެ.

'ސިލޯންއާއެކު ދިވެހިން ޓެލެތޯން' އަށް އެހީވެވޭނީ:-

ރުފިޔާ އެކައުންޓު ނަމްބަރު :7730000796107

ރުފިޔާ އެކައުންޓު ނަން: ސިލޯންއާ އެކު ދިވެހިން

ޑޮލަރު އެކައުންޓު ނަމްބަރު: 7730000796106

ޑޮލަރު އެކައުންޓު ނަން: ސިލޯންއާ އެކު ދިވެހިން

ޓެލެތޯނުން ލިބޭ ފައިސާ ޖަމާކުރުމަށް ވަކި ޚާއްސަ އެކައުންޓެއް ވެސް ހަދާފައިވާއިރު މި މަސައްކަތް ދެފުށް ފެންނަ ގޮތަކަށް ކުރިއަށް ގެންދިއުމަށްޓަކައި، މިނިވަން އޮޑިޓް ފަރމެއްގެ ބެލުމުގެ ދަށުން މަސައްކަތް ކުރުމަށްވެސް ވަނީ ހަމަޖައްސާފައެވެ.

މި ތެލެތޯނުގައި 37 މީޑިއާއަކުން ބައިވެރިވާއިރު، މިކަމުގައި ދައުލަތުގެ ކަމާބެހޭ އިދާރާތަކުގެ ވަރަށްބޮޑު އެއްބާރުލުމެއް ލިބެމުންދާކަމަށް ތެލެތޯން އިންތިޒާމްކުރާ ކޮމިޓީން ބުނެއެވެ.