އެމްޑީޕީގެ ރިޔާސީ ޓިކެޓް ހޯދަން މަސައްކަތް ކުރަން: ފައިސަލް

އިދިކޮޅު އެމްޑީޕީގެ ރިޔާސީ ޓިކެޓަށް ޝައުގުވެރިކަން ހުރިކަން ހާމަކުރައްވާ އެކަމަށް މަސައްކަތް ވެސް ކުރަމުންދާ ކަމަށް ކުރީގެ ނާއިބު ރައީސް ފައިސަލް ނަސީމް ވިދާޅުވެއްޖެ އެެވެ.

ފައިސަލް މިހެން ވިދާޅުވީ އަދަދު ނޫހުން ގެނެސްދޭ ޕްރަގްރާމެއްގައި ވާހަކަ ދައްކަވަމުންނެވެ. އޭނާ ވިދާޅުވީ އެ ޝައުގުވެރިކަން ނެތް ކަމަށް ވިދާޅުވިޔަސް ގަބޫލުކުރާނެ ބަޔަކު ނުތިބޭނެ ކަމަށެވެ. އަދި ވިދާޅުވީ އެމްޑީޕީގެ ރިޔާސީ ޓިކެޓަށް ޝައުގުވެރިކަން އެބަހުރި ކަމަށެވެ.

އެ އުންމީދުގައި މަސައްކަތް ކުރައްވާ ކަމުގައި ވެސް ވިދާޅުވި އެވެ.

"އެ ޝައުގުވެރިކަން އެބަ އޮތޭ, އެ އުންމީދު އެބަ އޮތޭ. އެ މަސައްކަތް އެގޮތަށް އެބަ ކުރެވޭ," ފައިސަލް ވިދާޅުވި އެވެ.

ފައިސަލް ވިދާޅުވީ ނާއިބު ރައީސްގެ މަގާމުގައި ހުންނެވިއިރު ވެސް ގައުމަށް ގެންނަން ބޭނުންވި ބަދަލުތަކެއް ހުރި ކަމަށެވެ. އެ ބަދަލުތައް ގެންނަވަން ބޭނުންވާ ކަމުގައި ވެސް ވިދާޅުވި އެވެ.

އަދި ވިދާޅުވީ 2028 ކާމިޔާބު ކުރަން ޖެހޭ ކަމަށާ އެކަން ކާމިޔާބު ކުރެވެން އޮތް ގޮތަކަށް އިޖާބަ ދޭން ޖެހޭ ކަމަށެވެ.

2018 ވަނަ އަހަރުން 2023 ވަނަ އަހަރަށް ހިނގި ރައީސް އިބްރާހިމް މުހައްމަދު ސޯލިހްގެ ވެރިކަމުގައި ފައިސަލް ނާއިބް ރައީސް ކަމަށް ވަޑައިގަތީ ޖުމްހޫރީ ޕާޓީން ތަނަވަސްކޮށްދިން ފުރުސަތެއް ގަ އެވެ. ނަމަވެސް ވެރިކަމަށް ވަޑައިގެން އެ ޕާޓީއާ ފެއަށް ޖެހިވަޑައިގަތެވެ. އަަދި ފަހުން އެމްޑީޕީއާ ގުޅިވަޑައިގަތެވެ.

އޭގެ ފަހުން 2023 ގެ ރިޔާސީ އިންތިހާބުގައި ވެސް ފައިސަލް އުންމީދު ކުރެއްވީ އަދި ގިނަ ބަޔަކު ގަބޫލުކުރީވެސް ރައީސް ސޯލިހްގެ ރަނިންމޭޓަކަށް އަލުން ފައިސަލް ހަމަޖައްސަވާނެ ކަމަށެވެ. ނަމަވެސް ރައީސް ސޯލިހް, އެ ފަހަރު ނެންގެވީ މެންބަރު އަސްލަމް އެވެ.