ވެލިދޫގައި ސީޕްލޭން ޕްލެޓްފޯމެއް ގާއިމްކޮށް، ސީޕްލޭން އޮޕަރޭޝަން ފަށައިދޭނަން: ރައީސް
ލިޔުންތެރިޔާ
އަބްދުﷲ ހުސައިން
ނއަތޮޅު ވެލިދޫއަށް ހާއްސަކޮށް ސީޕްލޭން ޕްލެޓްފޯމެއް ގާއިމްކޮށް، އެރަށަށް ސީޕްލޭން އޮޕަރޭޝަން ފަށައިދޭނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ނ.އަތޮޅަށް ކުރައްވަމުން ގެންދަވާ ޒިޔާރަތުގައި މިއަދު އެރަށަށް ވަޑައިގެން، ރައްޔިތުންނާ ބައްދަލުކުރެއްވުމަށް މިރޭ ބޭއްވި ޖަލްސާގައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ އަންނަ ޖެނުއަރީމަހުގެ ތެރޭގައި ވެލިދޫއަށް ސީޕްލޭން އޮޕަރޭޝަން ފަށައިދޭނޭކަމަށެވެ. ރައީސް ވިދާޅުވީ، މި ސަރުކާރުން ވެލިދޫގެ ތަރައްޤީއަށް ވަރަށްގިނަ ކަންކަން ކުރުމަށް ރާވާފައިވާކަމަށެވެ. މިގޮތުން ކުޅިވަރުގެ ދާއިރާއާއި، ތައުލީމާއި، ސިއްހަތުގެ އިތުރުން އުމްރާނީ ތަރައްޤީގެ ކަންކަން ހިމެނެއެވެ.
ރައީސް ވިދާޅުވީ ވިހަފަރުގައި އެއާޕޯޓެއް އެޅުމަކީ އެމަނިކުފާނުގެ ރިޔާސީ ވައުދެއްކަމަށާއި، އެ އެއާޕޯޓްގެ މަސައްކަތް އަންނަ އަހަރުގެ ކުރީކޮޅު ފަށައި ބާރު ސްޕީޑުގައި އެއާޕޯޓްގެ މަސައްކަތްތައް ކުރިއަށްގެންދާނޭކަމަށެވެ. ރައީސް ވިދާޅުވީ އެ އެއާޕޯޓް ވެގެންދާނީ ވެލިދޫ އާއި ވަށައިގެންވާ ރަށްތަކުގެ އިތުރުން ޓޫރިޒަމް ދާއިރާއަށް އިންވެސްޓްކޮށްގެން ތިބި ފަރާތްތަކަށް އަދި ޖުމްލަކޮށް މުޅި އަތޮޅަށްވެސް ފައިދާވާނޭ މަޝްރޫޢުއަކަށްކަމަށެވެ.
އަދި ވިހަފަރު އެއާޕޯޓް މަޝްރޫޢުއަކީ ދެކޮޅުޖެހޭނޭ މަޝްރޫޢުއެއްކަމަށްވެސް ރައީސް ފާހަގަކުރެއްވިއެވެ.
ރައީސް ވިދާޅުވީ އެ އެއާޕޯޓް ގާއިމްކުރެވެންދެން އަދި ފަހުން ބޭނުންކުރުމަށް ނަމަވެސް ވެލިދޫގައި ސީޕްލޭން ޕްލެޓްފޯމެއް ގާއިމްކޮށް ޖެނުއަރީމަހުގެ ތެރޭގައި މޫދަށްޖައްސާ ބޯޓުގެ އޮޕަރޭޝަންތައް ފައްޓަވައިދެއްވާނޭކަމަށެވެ.
އަދި ހަމަ އެގޮތަށް އަންނަ އަހަރުގެ ޖެނުއަރީމަހަށް ވެލިދޫއަށް ހާއްސަކޮށް މިރަށުގައި ސްޓޭޝަންކޮށް ބާއްވާ ސީ އެމްބިއުލާންސެއް ގާއިމްކޮށްދޭނަން
ރައީސްަ ޑރ.މުއިއްޒު ވިދާޅުވިއެވެ.
މީގެ އިތުރުންވެސް ރައިސް ވަނީ ވެލިދޫގައި ބޯހިޔާވަހިކަން ފޯރުކޮށްދިނުމަށް އެރަށުގައި ހައުސިން މަޝްރޫޢުއަކާއި، ތައުލީމީ މަރުކަޒަށް ބޭނުންވާ އިތުރޔު ކްލާސްރޫމްތައް އެޅުމާއި އެތަނަށް ބޭނުންވާ ވަސީލަތްތައް ގާއިމްކޮށްދެއްވާނޭކަމަށެވެ. މީގެ އިތުރުން ވެލިދޫ މަގުތައް ހެދުމުގެ މަސައްކަތާއި، އޮޑިދޯނިފަހަރު އެހެލައި ބޭލުމުގެ އިތުރުން ފައިބަރު މަސައްކަތަށް ބޭނުންވާ ބިން ހިއްކުމުގެ މަސައްކަތްވެސް ބާރު ސްޕީޑުގައި ކުރިއަށްގެންދަވާނޭކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
