ބަޖެޓް ފާސްކޮށްދީފައި އޮތް ގޮތުން ބޭނުންވާ ގޮތަށް މި އަހަރު ކުރިއަށް ގެންދެވޭކަށް ނެތް: ރައީސް ޑރ.މުޢިއްޒު
މިހާރު ކުރިއަށްދާ 19 ވަނަ ރައްޔިތުންގެ މަޖިލީހުން ބަޖެޓް ފާސްކޮށްދީފައިވާ ގޮތުން ބޭނުންވާ ގޮތަށް މަޝްރޫއުތައް މި އަހަރު ކުރިއަށް ގެންދެވެން ނެތް ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
ރައީސް ޑރ.މުއިއްޒު މިހާރު ލ އަތޮޅަށް ކުރައްވާ ދަތުރުފުޅުގެ ތެރެއިން އެ އަތޮޅު އިސްދޫ އަދި ކަލައިދޫ ރައްޔިތުންނާ ބައްދަލު ކުރައްވައި ވާހަކަފުޅުދައްކަވަމުން އެމަނިކުފާނު ވަނީ މަޝްރޫއުތައް ހިންގުމުގައި މައިގަނޑު ދަތިތައް ދިމާވަނީ ބަޖެޓުގެ ސަބަބުންކަން ފާހަގަކުރައްވާފައެވެ.
އެގޮތުން ރައީސް ޑރ.މުޢިއްޒު ވިދާޅުވީ، މަޖިލީހުން ބަޖެޓް ފާސްކޮށްފައިވަނީ މި ސަރުކާރުން ބޭނުންވާ ގޮތަށް ނޫން ކަމަށާއި މިހާރު ބޭނުން ކުރާ ބަޖެޓަކީ މި ސަރުކާރުން ފާސްކުރި ބަޖެޓެއް ނޫންކަމަށެވެ. އަދި ރައީސް ޑރ.މުޢިއްޒު ވައުދުވެވަޑައިގެންނެވި ކަންތައްތަކުގެ ތެރެއިން މިއަހަރު ތެރޭގައި ފުރިހަމަ ކުރައްވަން ބޭނުންފުޅުވާ ހުރިހާ ކަމެއް އެމަނިކުފާނު ލިސްޓު ކުރެއްވި ނަމަވެސް ބަޖެޓުގައި ހިމެނީ ވަރަށް މަދު މަޝްރޫއެއް ކަމަށް ވެސް އެމަނިކުފާނު ވިދާޅުވިއެވެ.
ރައީސް ޑރ.މުޢިއްޒު ވިދާޅުވީ، މި ސަރުކާރުން ބަޖެޓުގައި ހިމެނި މަޝްރޫއުތަކަށް ކަނޑައަޅާފައި ހުރީ ވަރަށް މަދު އަދަދެއްގެ ފައިސާކަމަށްވާތީ މިމަހާއި އަންނަ މަހުގެ ތެރޭގައި މަޝްރޫއުތައް ފަށަން ބޭނުންވި ނަމަވެސް ގިނަ މަޝްރޫއުތައް ފެށޭނީ އަހަރުގެ ފަހުކޮޅު ކަމަށެވެ.
"އެހެންވީމާ އަޅުގަނޑުމެން ބޭނުންވާ ގޮތަށް މި އަހަރުގެ ތެރޭގައި މިހާރު މި އޮތް މަޖިލީހުން ފާސްކޮށްދީފައި އޮތް ބަޖެޓު އޮތް ގޮތުން ގެންދެވޭކަށް ނެތް. އެހެންނަމަވެސް މި ބަލަނީ ވީހާވެސް އަވަހަކަށް ގިނަ މަސައްކަތްތަކެއް ފެށޭތޯ،"
ރައީސް ޑރ.މުޢިއްޒު ވިދާޅުވިއެވެ.
ބަޖެޓް ގެ ދަތިކަމުގެ އިތުރުން، ގިނަ ރަށްރަށުގެ މަޝްރޫތަކަށް ފައިސާ ނުދީ ހުރުމުގެ ސަބަބުންވެސް މަސައްކަތްތައް ހުއްޓިފައިހުރި ކަމަށާއި، ހުރިހާ މަސައްކަތްތައް ފެށޭނެ ގޮތް ހަމަޖައްސަމުންދާ ކަމަށް ވެސް ރައީސް ޑރ.މުޢިއްޒު ވިދާޅުވިއެވެ. އެގޮތުން ރަށްރަށުގައި ހުރި ވަރަށް ގިނަ މަޝްރޫއުތައް މިހާރު ފެށިފައިވާ ކަމަށާއި ގިނަ މަސައްކަތްތަކެއް މިހާރު ހުރީ ފެށޭ ހިސާބުގައި ކަމަށް ވެސް ރައީސް ޑރ.މުޢިއްޒު ވަނީ ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
