މަންފާއިން މާފުށީގައި ޑިޖިޓަލް އިސްލާމިކް އިންފޮމޭޝަން ބޫތުތަކެއް ބަހައްޓަނީ، އެއްބަސްވުން ގާއިމުކޮށްފި

ދިވެހީންގެ ދީނީ ހޭލުންތެރިކަމަށް ވަރަށް ފުޅާ ދާއިރާއެއްގައި މަސައްކަތް ކުރާ މަންފާއިން ރާއްޖޭގައި ރަށު ފަތުރުވެރިކަން ފުޅާ ރަށްރަަށުގައި ޑިޖިޓަލް އިސްލާމިކް އިންފޮމޭޝަން ބޫތުތަކެއް ބަހައްޓަން ނިންމާފައިވާ ނިންމުމުގެ ދަށުން ފުރަތަމަ ބޫތުތައް ކ. މާފުށީގައި ބެހެއްޓުމަށް ނިންމާ އެއްބަސްވުން ގާއިމުކޮށްފި އެވެ.

މިއަދު މާލޭގައި އޮތް ރަސްމިއްޔާތެއްގައި މި އެއްބަސްވުމުގައި މަންފާގެ ފަރާތުން ސޮއިކުރެއްވީ އެ ޖަމިއްޔާގެ ރައީސް އަލީ ރަމީޒެވެ. މާފުށީ ކައުންސިލްގެ ފަރާތުން ސޮއިކުރެއްވީ ކައުންސިލްގެ ރައީސް އަލީ ޝަމްއޫން އެވެ.

މާފުއްޓަކީ ރާއްޖޭގެ އެއް ނަންބަރު ރަށު ފަތުރުވެރިކަމުގެ ރަށެވެ. ރާއްޖެ އަންނަ ފަތުރުވެރީންގެ ތެރެއިން އެންމެ ގިނަ ބަޔަކު ޒިޔާރަތް ކުރާ ރަށަކީ އެއީ އެވެ.

މީގެ އިތުރުން މިއަދުގެ ރަސްމިއްޔާތުގައި ޕައި ނެޓްވޯކާ އެކުވެސް ވަނީ އެއްބަސްވުމެއް ގާއިމުކޮށްފަ އެވެ. ޕައި ނެޓްވޯކުން އެކަމަށް ބޭނުންވާ ތަކެތި ފޯރުކޮށް ދިނުމާއި ޓެކްނިލަކް ސަޕޯޓް ދޭނެ އެވެ.

ރާއްޖޭގައި ރަށު ފަތުރުވެރިކަން ފުޅާ ރަށްރަަށުގައި ޑިޖިޓަލް އިސްލާމިކް އިންފޮމޭޝަން ބޫތުތަކެއް ބަހައްޓަން ނިންމާ މަންފާއިން އެންމެ ފުރަތަމަ ބައްދަލުކުރީވެސް މާފުށީ ކައުންސިލާ އެވެ.

ކުރިއަށް އޮތްތާ އެ ޖަމިއްޔާއިން ރަށު ފަތުރުވެރިކަން އެންމެ ފުޅާކޮށް ހިންގާ ރަށްރަށުގެ ކައުންސިލްތަކާއި ބައްދަލްކޮށް ޑިޖިޓަލް އިސްލާމިކް އިންފޮމޭޝަން ބޫތުތައް ބެހެއްޓުމަށް މަޝްވަރާ ކުރާނެ ކަމަށް ބުންޏެވެ.

މަންފާ ޖަމިއްޔާއިން ގެންދަނީ މުޅި ރާއްޖޭގައި ދައުވަތުގެ މަސައްކަތް ވަރަށް ފުޅާކޮށް ކުރިއަށް ގެންދަމުންނެވެ. އެ ޖަމިއްޔާއިން އަމާޒު ހިފާފައިވަނީ ދައުވަތުގެ މަސައްކަތް އެހެން ލެވެލްއަކަށް ގެންދިއުމަށެވެ. އެކަމަށް މަގު ފަހިކުރުމުގެ ގޮތުން ތަފާތު ކޮންސެޕްޓަށް ދީނީ އެކި ހަރަކާތްތައް ދަނީ ހިންގަމުންނެވެ.

އެ ހަރަކާތްތަކަށް އާންމުންގެ ފަރާތުން ވަރަށް ބޮޑު ތަރުހީބެއް ލިބެމުން ދެ އެވެ. މަންފާ އުފެދި މިވީ އެއް އަހަރުތެރޭ އެ ޖަމިއްޔާ ވެފައިވަނީ ދައުވަތުގައި އެންމެ މަގުބޫލު ޖަމިއްޔާއަށެވެ.