ލ.ގަމަށް ޖަނަރޭޓަރެއް ގެންގޮސްގެން ކަރަންޓް ދިނުމަށް މަސައްކަތްކުރަނީ

ލ.ގަމަށް ޖަނަރޭޓަރެއް ގެންގޮސްގެން ކަރަންޓްގެ ހިދުމަތް ދިނުމަށް މސައްކަތް ފަށާފައިވާކަމަށް ފެނަކައިން ބުނެފިއެވެ.

ގަމު ފެނަކަ އިންޖީނުގޭގައި މިއަދު މެންދުރުފަހު 14:45 ގައި ހިނގި އަލިފާނުގެ ހާދިސާގައި ޖަނަރޭޓަރުތަކަށް ގެއްލުންވެ، ފޮނަދޫ ފިޔަވައި ގުޅިފައިވާ ރަށްތަކުން ވަނީ ކަރަންޓް ކަނޑައިގެން ގޮސްފައެވެ. އަލިފާނުގެ ހާދިސާގައި ކަރަންޓް ދިނުމަށް ބޭނުންކުރަމުންއައި ދެ އިންޖީނުގެ ތެރެއިން އެއް އިންޖީނު ވަރަށްބޮޑަށް ހަލާކުވެފައިވާކަމަށް ފެނަކައިން ވަނީ ބުނެފައެވެ.

އަލުން ކަރަންޓް ދިނުމަށް ކުރަމުންގެންދާ މަސައްކަތްތަކާ ބެހޭގޮތުން ދައުލަތުގެ މީޑިއާގައި ފެނަކައިން ބުނެފައިވަނީ، އެމްއެންޑީއެފްގެ އެހީގައި އިތުރު ޖަނަރޭޓަރެއް ގަމަށް ގެންގޮސްގެން ކަރަންޓް ދިނުމަށް މަސައްކަތްކުރަމުންދާކަމަށެވެ. އެގޮތުން ވީހަވެސް އަވަހަކަށް ކަރަންޓް ދިނުމަށް މަސައްކަތް ކުރަމުންދާކަމަށް ފެނަކައިން ބުނެއެވެ.

ގަމު ފެނަކަ އިންޖީނުގޭގައި ރޯފި އަލިފާންގަނޑު ނިއްވާލާފައިވަނީ 15:50 ހާއިރުކަމަށް ފުލުހުން ވަނީ ބުނެފައެވެ. އިންޖީނުގައި ރޯވެފައިވަނީ ކީއްވެގެންކަމެއް އަދި ސާފެއް ނުވެއެވެ. މި ހާދިސާގައި އެންމެފުރަތަމަ އަލިފާން ހިފާފައިވަނީ އިންޖީނުގެ ސައިލެންސަރުގައެވެ.

އަލިފާނުގެ ހާދިސާގައި އެއްވެސް މީހަކަށް އަނިޔާވެފައި ނުވާއިރު، ފުލުހުން ދަނީ މި މައްސަލަ ބަލަމުންނެވެ.