ސިއްރުން ރާއްޖެ އެތެރެކުރަން އުޅުނު 8.5 މިލިއަނަށްވުރެ ގިނަ ސިނގިރޭޓް އަތުލައިގެންފި

ކަނޑުމަގުން ރާއްޖެއަށް ސިއްރުން އެތެރެކުރަން އުޅުނު 8 މިލިއަނަށްވުރެ ގިނަ ސިނގިރޭޓް މޯލްޑިވްސް ކަސްޓަމްސް ސަރވިސްއިން އަތުލައިގެންފިއެވެ.

ކަސްޓަމްސްއިން ބުނީ، ކަނޑުމަގުން ރާއްޖެ ގެނައި މުދާ ޝިޕްމެންޓެއްގައި ޤާނޫނާއި ޤަވާޢިދާ ޚިލާފު ތަކެތި ހުރެދާނެކަމަށް ބެލެވިގެން ހިންގި ޚާއްޞަ އޮޕަރޭޝަނެއްގައި މި ތަކެތި އަތުލައިގެންފައިވަނީ މިމަހުގެ 27 ވަނަ ދުވަހު މާލެ ކޮމާޝަލް ހާބަރުން ކަމަށެވެ.

މާލެ ކޮމާޝަލް ހާބަރުގައި ހިންގި މި އޮޕަރޭޝަންގައި، "ޖެނެރަލް ކާގޯ" ގެ ގޮތުގައި ޑިކްލެއަރކޮށްފައިވާ ޝިޕްމަންޓެއް ބަލައިފާސްކުރިއިރު، އޭގެ ތެރޭގައި ގިނަ އަދަދެއްގެ ސިނގިރޭޓް ފޮރުވާފައި ހުއްޓާ ވަނީ ފެނިފައެވެ.

މިގޮތުން ޖުމްލަ 8,527,480 (އަށް މިލިއަން ފަސްލައްކަ ސައްބީސް ހާސް ހަތަރުސަތޭކަ އައްސި) ސިނގިރޭޓް ސްޓިކްސް ފެނިފައިވާ ކަމަށާއި، އެ ތަކެތި މިހާރު ކަސްޓަމްސްގެ ބެލުމުގެ ދަށަށް ގެނެސްފައިވާ ކަމަށް އެ އިދާރާއިން މަޢުލޫމާތު ދެއެވެ.

ކަސްޓަމްސްއިން އިތުރަށް ބުނެފައިވަނީ، ޤަވާޢިދާ ޚިލާފަށް އެތެރެކުރަން އުޅުނު މި ސިނގިރޭޓްތަކުގެ މައްސަލަ އެ އިދާރާއިން މިހާރު އިތުރަށް ތަޙުޤީޤު ކުރަމުން އަންނަ ކަމަށެވެ.