ހިޔާގެ ހަތަރު ޓަވަރުގައި އިތުރު 8 ލިފްޓް ހަރުކޮށްފި، ޓެސްޓް ކުރަނީ

ހިޔާ ޓަވަރުގައި އިތުރަށް ހަރުކުރަން ނިންމި ލިފްޓްތަކުގެ ތެރެއިން ހަތަރު ޓަވަރެއްގައި 8 ލިފްޓް ބަހައްޓައިފި އެވެ.

ހިޔާ ފްލެޓުގައި އިތުރު ލިފްޓު ހަރުކުރުމުގެ މަސައްކަތް ހަވާލުކޮށްފައި ވަނީ މިކަމުގެ ތަޖުރިބާ ހުރި ޗައިނާގެ ކުންފުންޏެއް ކަމަށްވާ ޝެންޔަންގް ޔުއާންޑް އިންޓެލެކްޗުއަލް ގުރޫޕާއެވެ.

މި މަޝްރޫޢުގެ ދަށުން، ކޮންމެ ޓަވަރަކަށް އިތުރު ޕެސެންޖާ އަދި ސްޓްރެޗާ ލިފްޓެއް ހަރުކުރާނެ އެވެ. އަދި ޕެސެންޖާ ލިފްޓުގައި 14 މީހުންގެ ޖާގަ ހިމެނެ އެވެ.

އެޗްޑީސީން މިރޭ ބުނީ ހަތަރު ޓަވަރުގައި އިތުރު 8 ލިފްޓް ހަރުކޮށް ޓެސްޓް ކުރަމުންދާ ކަަމަށެވެ.

ހިޔާ ޓަވަރުތަކުގައި އިތުރު ލިފްޓް ހަރުކުރުމަކީ ރައީސް މުއިއްޒުގެ ރިޔާސީ ވައުދުފުޅެކެވެ. އެ ވައުދުވެވަޑައިގެންނެވީ ހިޔާ ގައި ދިރިއުޅޭ މީހުންނަށް އަރާ ފޭބުމަށް އޮތް ދަތިކަން ހައްލު ކުރުމުގެ ގޮތުންނެވެ.

އަލަށް ހަރުކުރާ 32 ލިފްޓަށް 18 މިލިއަން ޑޮލަރު

ހިޔާ ޓަވަރުތަކުގައި އިތުރަށް ހަރުކުރާ 32 ލިފްޓަށް 18 މިލިއަން ޑޮލަރު (278 މިލިއަން ރުފިޔާ) އަށްވުރެ ގިނައިން ޚަރަދުވާ ކަމަށް އެޗްޑީސީން ކުރީން ވަނީ ބުނެފަ އެވެ.

މި ޓަވަރުތަކުގައި މިހާރު ހުރި ލިފްޓްތައް މަދުވުމުން ބައެއް ވަގުތުތަކުގައި ބޮޑެތި ކިއުތައް އޮވެ އެވެ. ހިޔާ ޕްރޮޖެކްޓް ގައި ޖުމްލަ 16 ޓަވަރު އިމާރާތް ކުރި އެވެ. އެއީ 7,000 ވުރެ ގިނަ އެޕާޓްމަންޓެވެ. އެ ތަންތަނުގައި މިހާރު 40,000 އާ ގާތް ކުރާ އަދަދަކަށް މީހުން ދިރިއުޅެ އެވެ.