ލިވަޕޫލްއިން އެންމެ އަވަސް ގޯލުގެ ރިކޯޑް މުގުރާލުމާއެކު މުޅި ސްޓޭޑިއަމްގައި ރާއްޖޭގެ ބްރޭންޑިން ވިދާލައިފި

އިނގިރޭސި ޕްރިމިއަރ ލީގުގެ މި ސީސަންގެ އެންމެ އަވަސް ގޯލުގެ ރިކޯޑު ލިވަޕޫލް އެފްސީއިން މުގުރާލި ދަނޑިވަޅު މުޅި އެންފީލްޑް ސްޓޭޑިއަމްގައި ދިވެހިރާއްޖޭގެ ބްރޭންޑިންގ އަނެއްކާވެސް ވިދާލައިފިއެވެ.

މިހާރު ކުރިއަށްދާ އިނގިރޭސި ޕްރިމިއާ ލީގުގައި އެންފީލްޑް ސްޓޭޑިއަމްގައި ލިވަޕޫލް އެފްސީ އާއި ބްރައިޓަން ވާދަކުރި މެޗުގައި، އެލްއެފްސީއިން މި ސީޒަނުގެ އެންމެ އަވަސް ގޯލުގެ ރިކޯޑް މުގުރާލީ ހިއުގޯ އެކިޓީކޭ މެޗު ފެށިތާ އެންމެ 46 ސިކުންތުތެރޭގައި ޖެހި ގޯލާއެކުއެވެ. މި ދަނޑިވަޅު ދިމާވީ ދިވެހިރާއްޖޭގެ ބްރޭންޑިންގ މުޅި ދަނޑުގައި ދިއްލާލާފައިވި ދަނޑިވަޅާވެސް މެއެވެ.

ލިވަޕޫލް ފުޓްބޯޅަ ކްލަބާއެކު ގާއިމްކޮށްފައިވާ "ޑެސްޓިނޭޝަން ޕާޓްނާޝިޕްގެ" ދަށުން ވިޒިޓް މޯލްޑިވްސްގެ ބްރޭންޑިންގ އެންފިލްޑްގެ އެލްއީޑީ ބޯޑުތަކާއި ޑިޖިޓަލް ސްކްރީންތަކުގައި އެޓީމުގެ ކޮންމެ މެޗެއްގައިވެސް ދައްކާލައެވެ.

2024/2025 ސީޒަން ލިވަޕޫލް އެފްސީއިން ކާމިޔާބު ކުރި ތާރީޚީ ލަނޑު ޖެހި ވަގުތަކީވެސް ހަމަ މިފަދައިން ރާއްޖޭގެ ބްރޭންޑިންގ ސްޓޭޑިއަމްގައި ދިއްލާލި ވަގުތެވެ.

ވިޒިޓް މޯލްޑިވްސް ކޯޕަރޭޝަނުން ބުނި ގޮތުން، އެ ކޯޕަރޭޝަނުން ލިވަޕޫލް އެފްސީއާ އެކު ގާއިމްކޮށްފައިވާ ޕާޓްނާޝިޕްގެ ދަށުން ރާއްޖޭގައި ފަތުރުވެރިންނަށް ހުރި ތަފާތު ފުރުސަތުތަކާއި ލަގްޒަރީ ރިސޯޓްތައް މުޅި ދުނިޔެއަށް ދައްކާލެވޭނެއެވެ. އެގޮތުން، ސްޓޭޑިއަމްގެ ލެޑް ބޯޑުތަކުގައި ތަފާތު ގޮތްގޮތަށް ރާއްޖޭގެ ބްރޭންޑިންގ ދައްކާލުމަށް ވިޒިޓް މޯލްޑިވްސް ކޯޕަރޭޝަނުން ގިނަ ކެމްޕޭންތައް ހިންގަމުންދާއިރު، މިދިޔަ މަހު 10 ބަހަކުން ރާއްޖެ އިސްތިހާރުކުރުމަށް ލެޑް ބޯޑުތައް ވަނީ ބޭނުންކުރެވިފައެވެ.

ލިވަޕޫލް އެފްސީއާ އެކު ގާއިމްކުރެވުނު ޕާޓްނާޝިޕްގެ ދަށުން އެ ކްލަބުގެ ލެޑްބޯޑްތަކާއި ސޯޝަލް މީޑިއާގެ އެކި ކެމްޕޭންތަކާއި ޕޯސްޓްތައް މެދުވެރިކޮށް ރާއްޖެ އިޝްތިހާރުކުރުމުގެ އެކި ފުރުސަތުތައް  ހޯދައިދެމުންދާ ކަމަށް ވިޒިޓް މޯލްޑިވްސް އިން ބުނެއެވެ. 180 ގައުމެއްގައި ދައްކާ މި މެޗުތަކުގެ ޒަރިއްޔާއިން އެތައް ބަޔަކަށް ރާއްޖޭގެ ސަމާލުކަން ލިބި ދުނިޔޭގެ އެންމެ ގިނަ ބަޔަކު އަންނަ ފަތުރުވެރިކަމުގެ މަންޒިލެއްގެ ގޮތުގައި ޤާއިމްވުމަކީ އެ ކޯޕަރޭޝަނުގެ އަމާޒެކެވެ.

ވިޒިޓް މޯލްޑިވްސް ކޯޕަރޭޝަން އަކީ "މޯލްޑިވްސް" ބްރޭންޑާއި "މާލްޑިވްސް ދަ ސަނީ ސައިޑް އޮފް ލައިފް" ޝިއާރުގެ ދަށުން ދުނިޔޭގެ އެކި ކަންކޮޅުތަކުގައި ފަތުރުވެރިކަމުގެ މަންޒިލެއްގެ ގޮތުގައި ރާއްޖެ ޕްރޮމޯޓް ކުރުމަށް ކަނޑައަޅާފައިވާ ދައުލަތުގެ ކުންފުންޏެކެވެ.