އެސްއޯއީތަކުގެ އޯޓީ އެއްހަމަ ކުރުމުން ހިންގުމުގެ ނިޒާމް އިތުރަށް ހަރުދަނާވެގެންދާނެ: ޕީސީބީ
ސަރުކާރު ހިއްސާވާ ކުންފުނިތަކުގެ މުއައްޒަފުންގެ އޯވަރ ޓައިމް އެއްހަމަ ކުރުމުން އެސްއޯއީތަކުގެ ހިންގުމުގެ ނިޒާމް އިތުރަށް ހަރުދަނާވެގެންދާނެކަމަށް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ބުނެފިއެވެ.
ސަރުކާރު ކުންފުނިތަކުގެ ބަލަދުވެރިފަރާތް ޕީސީބީން މިއަދު ވަނީ އެސްއޯއީތަކުގެ މުއައްޒަފުންގެ އިތުރުގަޑީގެ ފައިސާ ދިނުމުގެ އުސޫލްތަކަށް ބަދަލުގެނެސް އައު ބަދަލަށް އަމަލުކުރަން އަންގާފައެވެ. އަލަށް ގެނައުމަށް ނިންމި ބަދަލުތަކުގެ ތެރޭގައި، ކަނޑައެޅިފައިވާ ރަސްމީ ގަޑީގެ އިތުރުން ހަފްތާއަކު 48 ގަޑިއިރަށްވުރެ އިތުރަށް ގުނޭ ވަގުތުތަކަށެވެ. އަދި އިތުރުގަޑީގައި އެންމެ ގިނަވެގެން ފައިސާ ދެވޭނެ މިންވަރު ކަނޑައެޅުމަށްވެސް ވަނީ އަންގާފައެވެ.
މިކަމާ ގުޅިގެން ޕީސީބީން ބުނެފައިވަނީ، މި ބަދަލުތަކުގެ ސަބަބުން ކުންފުނިތަކުގެ މަސައްކަތްތައް ރޭވުންތެރިކަމާއެކު ކުރިއަށްގެންދިއުމަށާއި، މުވައްޒަފުންގެ މެދުގައި މަސައްކަތްތައް ހަމަހަމައަށް ބެހުމަށާއި، ބޭކާރު ގޮތުގައި އިތުރުގަޑީގެ މަސައްކަތަށް ބަރޯސާވުން ކުޑަވެގެންދިއުމަށް މަގުފަހިވެގެންދާނޭކަމަށެވެ. އަދި އިތުރުގަޑީގެ ޚަރަދުތައް ހަރުދަނާކޮށް ބެލެހެއްޓުމުން، ކުންފުނީގެ މުހިންމު މަސައްކަތްތަކަށާއި، ޚިދުމަތްތައް ރަނގަޅުކުރުމަށް އިތުރު ވަސީލަތްތައް ބޭނުންކުރުމުގެ ފުރުސަތު ލިބިގެންދާނޭކަމަށްވެސް ބުންޏެވެ.
ޕީ.ސީ.ބީން ކުންފުނިތަކަށް ފޮނުވި ސާކިއުލާގައި އަންގާފައިވަނީ މިހިނގާ ޖުލައި ނިމުމުގެ ކުރިން ކުންފުނިތަކުގެ އޯޓީ ދިނުމުގެ އުސޫލަށް ގެންނަންޖެހޭ ބަދަލުތައް ގެނެސް ނިންމުމަށެވެ. އެގޮތުން އަލަށް އަމަލުކުރަން ނިންމި އުސޫލަށް އަންނަ އޮގަސްޓްމަހުގެ އެއްވަނަ ދުވަހުން ފެށިގެން އަމަލުކުރަން ފަށާނޭކަމަށްވެސް ޕީސީބީން ވަނީ އަންގާފައެވެ.
ޕީސީބީން ވަނީ އެސްއޯއީތަނުގައި މަސައްކަތްކުރާ މުއައްޒަފުންގެ ތެރެއިން 33 އިންސައްތަ މުއައްޒަފުން ކުރިއަށްއޮތް ތިންމަސްދުވަހުގެ ތެރޭގައި ހަމަޖެހިފައިވާ އުސޫލްގެ މަތިން ވަކިކޮށް ނިންމުމަށް ކުންފުނިތަކަށް އަންގާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
