ރައީސް މުޢިއްޒާއެކު މިހުރީ ކަމެއް ބޭނުންވެގެންނެއް ނޫން؛ ފަޅެއް ދޭކަށް ވެސް ނާހާނަން: ސިޔާމް

ރައީސުލްޖުމްހޫރިއްޔާ ޑރ މުހައްމަދު މުޢިއްޒު އާއި އެކު ހުންނެވީ އެއްވެސް އަމިއްލަ އެދުމެއްގައި، ކަމެއް ބޭނުން ވެގެން ނޫން ކަމަށާއި، އަދި މިހާތަނަށްވެސް އެއްވެސް ފަޅެއް ނޫނީ އެހެންވެސް އެއްޗެއް ދޭން އެދިވަޑައިގެންފައި ނުވާނެ ކަމަށް މި ސަރުކާރުގެ ކޯލިޝަންގެ ބައިވެރިއެއް ކަމަށްވާ އެމްޑީއޭގެ ރައީސް، މީދޫ ދާއިރާގެ މެންބަރު އަހްމަދު ސިޔާމް މުހައްމަދު ރޭ ވިދާޅުވެއްޖެ އެވެ.

ރައީސުލްޖުމްހޫރިއްޔާ ދ އަތޮޅަށް ކުރައްވަމުންދާ ދަތުރުފުޅުގެ ތެރެއިން އެ އަތޮޅު މީދޫއަށް ވަޑައިގެން، އެ ރަށު ރައްޔިތުންނާއި ބައްދަލު ކުރެއްވުމަށް ބޭއްވި ޖަލްސާގައި ވާހަކަ ދައްކަވަމުން ސިޔާމް ވަނީ، ރައީސް މުޢިއްޒަށް ވަރަށް ބޮޑަށް ތަޢުރީފް ކުރައްވާފައެވެ.

އެގޮތުން، އޭނާ ވިދާޅުވި ގޮތުގައި، ރައީސުލްޖުމްހޫރިއްޔާ ޑރ މުޢިއްޒަކީ ރައްޔިތުންގެ ހައްގުގައި ވަރަށް ބުރަކޮށް މަސައްކަތް ކުރައްވާ ބޭފުޅެކެވެ. ރައްޔިތުންގެ ކަންބޮޑުވުންތައް އައްސަވައި، އެމަނިކުފާނުގެ ސްޕީޑްގައި މަސައްކަތް ކުރިއަށް ގެންދެވުމަށް ޓަކައި، ރޭގަނޑު ގިނަ ވަގުތެއްގައި، ދަންވަންދެންވެސް ހޭލާ ހުންނަވާ ކަމަށް ސިޔާމް ވިދާޅުވި އެވެ.

ރައީސުލްޖުމްހޫރިއްޔާ އެ ވެލެއްވި ވަޢުދުތަކަކީ، އަޅުގަނޑު ދެކޭ ގޮތުގައި ފުލޯކު ވަޢުދުތަކެއް ނޫން. ހަގީގީ ވަޢުދު. ރައީސުލްޖުމްހޫރިއްޔާ ވަޢުދެއް ކޮށްފިނަމަ، އެ ވަޢުދު ފުއްދާނެ ކަމީ، އަޅުގަނޑު ޝައްކު ކުރާ ކަމެއްނޫން.

އަހުމަދު ސިޔާމް

އެހެންކަމުން ރައީސުލްޖުމުހޫރިއްޔާ އަށް އެއްބާރުލުން ދެއްވައިފި ނަމަ، ރައްޔިތުން ބޭނުންވާ ކަންކަން އެމާނިކުފާނު ކޮށްދެއްވާނެ ކަމަށް ސިޔާމް ވިދާޅުވި އެވެ. އަދި އެކަންކަން ކޮށްދެވޭނީ އެމާނިކުފާނަށާއި ސަރުކާރަށް އެއްބާރުލުން ދީގެން ކަމަށާ އެކަން ނުކޮށް ކުރިއަށް ނުދެވޭނެ ކަމަށެވެ.

އެހެންކަމުން، ސިޔާމް ވެސް ރައީސުލްޖުމްހޫރިއްޔާ އާއި އެކު ހުންނެވީ ދިވެހިން ބޭނުންވާ ތަރައްގީ ގެނެސްދިނުމަށްޓަކައި ކަމަށް އޭނާ ވިދާޅުވި އެވެ.

"އަޅުގަނޑު އެމްޑީއޭގައި ރައީސުލްޖުމްހޫރިއްޔާއާ އެކު މިހުރީ، ދިވެހި ރާއްޖޭގެ ރައްޔިތުން ބޭނުންވާ ތަރައްގީ ކުރުމަށްޓަކައި. އެނޫން އެއްވެސް ބޭނުމެއް އަޅުގަނޑުމެންގެ ނެތް. އަޅުގަނޑު ރައީސުލްޖުމްހޫރިއްޔާ ކައިރިއަށް ގޮސް ނާހާނަން އަޅުގަނޑަށް ކަމެއް ކޮށްދޭކަށް، ރަށެއް ދޭކަށް، ފަޅެއް ދޭކަށް [އަދި] އެހެން ކަމެއް ކޮށްދޭކަށް. އަދިވެސް ނާހަން. އަހާކަށް ނުވެސް ޖެހޭ. އެއަށް ވުރެ ގިނައިން الله ދެއްވާފައި އޮތީ އަޅުގަނޑަށް. އެހެންވީމާ މީހެއް ކައިރީ އެއްޗެއް އާހަކަށް އަޅުގަނޑަކަށް ނުޖެހޭ."

އަހުމަދު ސިޔާމް

ސިޔާމް މިހެން ވިދާޅުވެފައި ވާއިރު، ރިޔާސީ އިންތިހާބުގެ ފުރަތަަމަ ބުރުގައި އޭނާ ހުންނެވީ ކުރީގެ ރައީސް އިބްރާހިމް މުހައްމަދު ޞާލިހާއިއެކު ކޯލިޝަން ހައްދަވައިގެންނެވެ. އޭރު އޭނާ ވަނީ ރައީސް ޞާލިހަށް ވަރަށް ބޮޑަށް ހުޝާމަދު ކޮށް ވާހަކަ ދައްކަވާފައެވެ.

އެހެންނަމަވެސް، އިންތިޚާބުގެ ފުރަތަމަ ބުރުން، އެމަނިކުފާނަށް ލިބިލެއްވި ނާކާމިޔާބީއާއެކު ސިޔާމް ވަނީ ރައީސް މުޢިއްޒުގެ ކޮޅަށް ޖެހިވަޑައިގެންފައެވެ.