މިމަހު 2 ގައި މަރުވި ދެ ގައިދީންގެ ހަށިގަނޑު ޕޯސްމޯޓަމް ހަދަން ބޭރަށް ފޮނުވައިފި
ލިޔުންތެރިޔާ
ޚަދީޖާ އަރުފާ
ކަރެކްޝަނަލް ސާވިސްގެ ބެލުމުގެ ދަށުން ހިންގާ ހުޅުމާލޭ ޖަލުގައި ހުކުމް ތަންފީޒު ކުރަމުން ދަނިކޮށް މިމަހު ދެވަނަ ދުވަހު މަރުވި ދެ ގައިދީންގެ ޕޯސްޓްމޯޓަމް ހެދުމަށް ހަށިގަނޑު އިންޑިއާއަށް ފޮނުވާލާފައިވާ ކަމަށް ފުލުހުން މިއަދު ބުނެފި އެވެ.
އެގޮތުން ޕޯސްޓްމޯޓަމް ހަދަން ފޮނުވާފައިވަނީ، ދަފްތަރު ނރ. 439، އިބްރާހިމް ސުހެއިލް، (53އ) އާއި ސ. ހިތަދޫ، ދިއްގާގަސްދޮށުގެ، ހަސަން ނިޔާޒް، (45އ) ގެ ހަށިގަނޑެވެ.
އެމީހުންގެ މަރާއި ގުޅޭ ގޮތުން މައުލޫމާތު ދެމުން ކަރެކްޝަންސް އިން މީގެ ކުރިން ބުނީ، ނިޔާޒު މަރުވީ މި މަހުގެ 2 ވަނަ ދުވަހުގެ މެންދުރު ފަހު، ހުޅުމާލޭ ޖަލުގައި ކުއްލިއަކަށް މެޑިކަލް އެމަޖެންސީއެއް ދިމާވެގެން ކަމަށެވެ.
މަރުވީ ހޮސްޕިޓަލަށް ގެންގޮސް އަވަސް ފަރުވާ ދެމުން ދަނިކޮށެވެ. އޭނާ އަކީ އުމުރު ދުވަހަށް ޖަލަށްލާފައިވާ މީހެކެވެ. އޭނާ މަރުވީ ހުކުމްކޮށް ޖަލަށް ގެންދިޔަތާ ދެ ދުވަހެއް ތެރޭގަ އެވެ.
ސުހެއިލް މަރުވީ ނިއުމޯނިޔާ ޖެހި އޭނާގެ ސިއްހީ ހާލު ދެރަވުމުން އައިޖީއެމްއެޗްގައި އެޑްމިޓްކޮށްގެން ފަރުވާ ދެމުން ގެންދާތާ ހަފްތާއެއް ވެފައިވަނިކޮށެވެ. ކުރީން ވެސް ސްޓްރޯކެއް ޖެހިގެން ފަރުވާ ހޯދި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
