ހުޅުމާލޭގެ ފަރަށް އެރި ދެ އުޅަނދެއް, 29 މިލިޔަން ރުފިޔާއިން ޖޫރިމަނާކޮށްފި

ހުޅުމާލޭގެ ފަރަށް އެރި ދެ އުޅަނދެއް 29 މިލިޔަން ރުފިޔާއިން ޖޫރިމަނާކޮށްފިއެވެ.

މިކަމާއި ގުޅިގެން އެންވަރަމެންޓް ޕްރޮޓެކްޝަން އެޖެންސީ (އީޕީއޭ) އިން ބުނީ، ހުޅުމާލޭގެ އުތުރުފަރާތުން މިއަހަރުގެ ފެބްރުއަރީ މަހުގެ 21 ވަނަ ދުވަހު ފަރަށް އެރި ދެ އުޅަނދުކަމަށްވާ ޓަގު އަނާޑީ އަދި ބާޖު އޭއެމް މަނިއުމިޓްއެވެ.

އީޕީއޭއިން ވަނީ ފަރަށް ލިބުނު ގެއްލުމަށް ރިޢާޔަތްކޮށް 29,201,946 ރުފިޔާއިން އެ ދެ އުޅަނދުތަކުގެ އޮޕަރޭޓަރ ކަމުގައިވާ ދި މިޑްލް އީސްޓް މެރިން އެލްއެލްސީ ޖޫރިމަނާ ކުރުމަށް ނިންމާފައެވެ.

މި އުޅަނދުތައް ފަރުމަތިން އޭޕްރީލް މަހުގެ 23 ވަނަ ދުވަހު ނަގާފައިވާއިރު، އީޕީއޭ އިން ބުނީ، ފަރަށް ލިބުނު ގެއްލުންތައް ބެލުމުގެ ގޮތުން ސަރވޭއެއް ކުރިއަށް ގެންގޮސްފައިވާ ކަމަށެވެ. މި ސަރވޭ ކުރިއަށް ގެންގޮސްފައިވަނީ އުޅަނދުތަކުގެ ވެރިފަރާތުން އައްޔަންކޮށްފައިވާ ސަރވޭޔަރުންނާއި އެޖެންސީގެ ސަރވޭޔަރުންނާއެކުގައެވެ.

އީޕީއޭއިން ބުނީ ހެދި ސާވޭއިން ދައްކާގޮތުން ފަރުގެ 1159 އަކަ މީޓަރުގެ ސަރަހައްދަށް ބޮޑެތި ގެއްލުންތަކެއްވެފައިވާ ކަމަށެވެ.