އެމެރިކަން އެކްސްޕްރެސް އާ ގުޅިގެން، ބީއެމްއެލުން ޕްރޮމޯޝަނެއް

ބޭންކް އޮފް މޯލްޑިވްސް އާއެކު ގާއިމްކޮށްފައިވާ އެކްސްކުލޫސިވް ޕާޓްނަރޝިޕްގެ ދަށުން އެމެރިކަން އެކްސްޕްރެސްގެ ހިދުމަތް ރާއްޖޭގައި ދެމުން އަންނަތާ 20 އަހަރު ފާހަގަކުރުމުގެ ގޮތުން ބީއެމްއެލުން ހަރަކާތްތަކެއް ފަށައިފިއެވެ.

މި ހަރަކާތްތައް މިދިޔަ ޖުލައި މަހު ބޭއްވި އިވެންޓަކުން ފަށާފައިވާއިރު، މިއަދު ވަނީ އެމެރިކަން އެކްސްޕްރެސް ކްރެޑިޓް ކާޑު މެންބަރުންނަށް ޚާއްސަ ޕްރޮމޯޝަނެއް ފަށާފައެވެ.

މި ޕްރޮމޯޝަނުގެ ދަށުން ކާޑު މެންބަރުން މަދުވެގެން 3،000 ރުފިޔާގެ ވިޔަފާރިކުރުމުން 20،000 ބީއެމްއެލް ރިވޯޑްސް ޕޮއިންޓް ހޯދުމަށް ގުރުއަތެއްގައި ބައިވެރިވެވޭނެއެވެ. ފްލައިޓް، ކާރު ނުވަތަ ހޮޓެލް ބުކް ކުރުމަށް ނުވަތަ ރާއްޖޭގެ ވިޔަފާރިތަކުންނާއި ނުވަތަ އެމެޒޯން، އެޕަލް އަދި ސްޕޮޓިފައި ފަދަ ރާއްޖޭން ބޭރުގެ މަރޗަންޓްތަކުން ގިފްޓް ކާޑު ގަތުމަށްވެސް ބީއެމްއެލް ރިވޯޑް ޕޮއިންޓް ބޭނުންކުރެވޭނެއެވެ.

މިކަމާ ގުޅުވައި ބީއެމްއެލްގެ ޑައިރެކްޓާ އޮފް ރީޓެއިލް ބިޒްނަސް އެންޑް އެސްއެމްއީ ބޭންކިން މޫސާ ނިމާލް ވިދާޅުވީ، 2004 ވަނަ އަހަރު ރާއްޖެއަށް އެމެރިކް އެކްސްޕްރެސްގެ ކްރެޑިޓް ކާޑު ތައާރަފްކޮށް، ދުނިޔޭގެ ފުރަތަމަ އެމެރިކަން އެކްސްޕްރެސް ޑެބިޓް ކާޑު ތައާރަފް ކުރެވުމަކީ ބީއެމްއެލަށް ލިބުނު ފަޚުރެއް ކަމަށެވެ.

މީގެއިތުރުން، ޕާޓްނާޝިޕަށް 20 އަހަރުވެފައިވާކަން ފާހަގަކުރައްވައި ނިމާލް ވިދާޅުވީ، އެމެރިކަން އެކްސްޕްރެސްއަކީ ދިވެހިންގެ މެދުގައި މަގުބޫލު އަދި އިތުބާރު ކުރާ ބްރޭންޑެއް ކަމަށެވެ.

އެމެރިކަން އެކްސްޕްރެސް އިން އަބަދުވެސް ކާޑު މެންބަރުންނަށް ޚާއްސަ އޮފާތައް ފޯރުކޮށްދޭކަމަށާއި މި ފަހުން ތައާރަފްކުރި ރާއްޖޭގެ ފުރަތަމަ ޝަރުއީ ހަމަތަކަށް ފެތޭ ކްރެޑިޓް ކާޑުކަމަށާއި މިކާޑުން ލިބޭ ޚާއްސަ ފައިދާތަކާއެކު، ކަސްޓަމަރުން ނުހަނު ބޮޑަށް ބޭނުންވާ ޕްރޮޑަކްޓަކަށްވާނޭ ކަމަށްވެސް އޭނާވަނީ ވިދާޅުވެފައެވެ.

ބީއެމްއެލްއަކީ 345،000 އަށްވުރެ ގިނަ ކަސްޓަމަރުންނާއެކު، ރާއްޖޭގައި އެންމެ ގިނަ ކާޑު ދޫކޮށް، ކާޑުގެ ޚިދުމަތްތައް ބަލައިގަންނަމުން އަންނަ ބޭންކެވެ.