އުއްތަމަ ފަނޑިޔާރާއި އޭޖީގެ ބައްދަލްވުމެއް: ޝަރުއީ ނިޒާމަށް މިނިވަންކަން އޮންނާނެ
އުއްތަމަ ފަނޑިޔާރު އަބްދުލްޣަނީ މުހައްމަދާއި އެޓާނީ ޖެނެރަލް އަހްމަދު އުޝާމް ބައްދަލްކުރައްވައިފި އެވެ.
މި ބައްދަލްވުން ބޭއްވިކަން ސުޕްރީމް ކޯޓާއި އެޓާނީ ޖެނެރަލްގެ އޮފީހުން ވަނީ ހާމަކޮށްފަ އެވެ. ސުޕްރީމް ކޯޓުން ބުނީ އެޓާނީ ޖެނެރަލް އަހްމަދު އުޝާމް އުއްތަމަ ފަނޑިޔާރު އަބްދުލްޣަނީ މުހައްމަދުގެ އަރިހަށް އިހްތިރާމްގެ ޒިޔާރަތެއް ކުރައްވާފައިވާ ކަމަށެވެ.
އެ ބައްދަލްވުމާއި ގުޅޭގޮތުން އެޓާނީ ޖެނެރަލްގެ އޮފީހުން ބުނީ ޝަރުޢީ ދާއިރާގެ މިނިވަންކަން ދެމެހެއްޓުމާއެކު، އަދުލު އިންސާފުގެ ދާއިރާ ކުރިއެރުވުމުގައި ޝަރުޢީ ދާއިރާއަށް އެއްބާރުލުން ދިނުމަށް ސަރުކާރުން ފުރިހަމަ އެހީތެރިކަަމާއި އެއްބާރުލުން ދެއްވާނެ ކަމުގެ ޔަގީންކަން ދެއްވި ކަމަށެވެ.
ޝަރުއީ ނިޒާމު މިނިވަން ކުރުމަކީ މި ސަރުކާރުގެ ވައުދެކެވެ. އެއީ ކޮންމެ ސަރުކާރަކުން ވެސް ވައުދުވާ ކަމެކެވެ. ނަމަވެސް ޝަރުއީ ނިޒާމަށް ސަރުކާރުތަކުން ނުފޫޒު ފޯރުވާ ކަމަށް ގިނަ ބަޔަކު ދެކެ އެވެ. އޭރަކު އޮންނަ އިދިކޮޅު ޕާޓީން އެ ތުހުމަތު އަބަދުވެސް ކުރެ އެވެ.
ކުރީން ފަނޑިޔާރުކަން ކުރެއްވި ބައެއް ބޭފުޅުން ވަނީ އެޓާނީ ޖެނެރަލް އުޝާމަށް ވެސް އެ ތުހުމަތު ކުރައްވާފަ އެވެ. ބައެއް ފަނޑިޔާރުން ވިދާޅުވި ގޮތުގައި އުޝާމް ފަދައިން ފަނޑިޔާރުންނަށް ނުފޫޒު ފޯރުވަން މަސައްކަތް ކުރެއްވި އޭޖީ އެއް އަދި ދެކެވަޑައެއް ނުގަންނަވަ އެވެ. އެ ދަރަޖައަށް ނުފޫޒު ފޯރުވަން މަސައްކަތް ކުރެއްވި ކަމަށް އެ ބޭފުޅުން ތުހުމަތު ކުރައްވާފައިވެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
