ރ. އަތޮޅުގެ ހަ ރަށެއްގައި ފަސް ބާވަތެއްގެ ކެންސަރަށް ސްކްރީން ކުރުމުގެ ބޮޑު ޕްރޮގްރާމެއް ފަށަނީ

ކެންސަރަށް ހޭލުންތެރިކަން އިތުރުކުރުމާއި، ބަލި އަވަހަށް ދެނެގަތުމަށް ބާރުއެޅުމުގެ ގޮތުން ކެންސަރ ސޮސައިޓީ އޮފް މޯލްޑިވްސް (ސީ.އެސް.އެމް) އިން ރ. އަތޮޅުގެ ހަ ރަށަކަށް އަމާޒުކޮށްގެން ޚާއްޞަ ސްކްރީނިންގ ޕްރޮގްރާމެއް ބާއްވަން ނިންމައިފިއެވެ.

މި ޖޫން މަހުގެ 25 އިން 27 އަށް ކުރިއަށް ގެންދާ މި ޕްރޮގްރާމުގައި ފަސް ބާވަތެއްގެ ކެންސަރަށް ސްކްރީން ކުރާނެއެވެ. އެއީ އުރަމަތީގެ ކެންސަރާއި، އަނގައިގެ ކެންސަރާއި، ރަހިމުގެ ދޮރަށް ޖެހޭ ކެންސަރާއި، ޕްރޮސްޓޭޓް ކެންސަރުގެ އިތުރުން ބޮޑު ގޮހޮރާއި ފުރަގަސްފަރާތުގެ ކެންސަރެވެ.

މި ޕްރޮގްރާމް ކުރިއަށް ގެންދިއުމަށް ހަމަޖެހިފައިވާ ތާވަލަށް ބަލާއިރު:

ޖޫން 25: ރ. މަޑުއްވަރީ ސިއްޙީ މަރުކަޒުގައި އެ ރަށުގެ ރައްޔިތުންނަށް.

ޖޫން 26: ރ. މީދޫ ސިއްޙީ މަރުކަޒުގައި މީދޫ އަދި އިންނަމާދޫ ރައްޔިތުންނަށް.

ޖޫން 27: ރ. އިނގުރައިދޫ ސިއްޙީ މަރުކަޒުގައި އިނގުރައިދޫ، ފައިނު އަދި ކިނޮޅަހު ރައްޔިތުންނަށް.

ކެންސަރ ސޮސައިޓީގެ ޗެއާޕާސަން ޖުވޭރިއާ ސައީދު ވިދާޅުވި ގޮތުގައި، މިފަހަރު ރ. އަތޮޅުގެ މި ރަށްތައް ޚިޔާރުކުރީ 2023 ވަނަ އަހަރު ބޭއްވި ސްކްރީނިންގ ޕްރޮގްރާމްތަކުގައި ޕްރޮސްޓޭޓް އަދި ކޮލޮރެކްޓަލް ކެންސަރު ސްކްރީނިންގ އެ ރަށްތަކަށް ނުގެންދެވި އޮތުމުންނެވެ.

"އަޅުގަނޑުމެންގެ އަމާޒަކީ މި އަހަރުގެ ތެރޭގައި ރާއްޖޭގެ ހުރިހާ ރަށަކަށް މި ޚިދުމަތް ފޯރުކޮށްދިނުން،" ޖުވޭރިއާ ވިދާޅުވިއެވެ.

2014 ވަނަ އަހަރުން ފެށިގެން މެދުކެނޑުމެއްނެތި ކުރިއަށްގެންދާ މި މަސައްކަތުގައި ހުރި ގޮންޖެހުންތަކަށް އަލިއަޅުއްވާލައްވަމުން ޖުވޭރިއާ ވިދާޅުވީ، ޑޮކްޓަރުންގެ ޓީމުތަކަށް ލިބެނީ މަހަކު އެންމެ ވީކެންޑެއް ކަމަށާއި، ދަތުރުފަތުރާއި ލޮޖިސްޓިކް ކަންކަން ހުންނަގޮތުން އެއް ފަހަރާ ގިނަވެގެން ދެވޭނީ ތިން ރަށަށް ކަމަށެވެ.

މި ޕްރޮގްރާމަކީ ރ. އަތޮޅުގެ ސިއްޙީ މަރުކަޒުތަކާއި ރަށު ކައުންސިލްތަކުގެ ފުރިހަމަ އެއްބާރުލުމާއެކު ކުރިއަށްގެންދާ ހަރަކާތެކެވެ. ކެންސަރ ސޮސައިޓީން މިހާތަނަށް ވަނީ ރާއްޖޭގެ ހުރިހާ އަތޮޅެއްގައި މިފަދަ ސްކްރީނިންގ ޕްރޮގްރާމްތައް ހިންގާފައެވެ.