ވޮލީބޯޅަ: ގައުމީ ތަށި ކުލަބު ވެމްކޯ އިން ދިފާއުކޮށްފި

ގައުމީ އަންހެން ވޮލީބޯޅަ މުބާރާތުގެ ފައިނަލްގައި އަންގާރަ ދުވަހުގެ ރޭ ޕޮލިސް ކުލަބާއި ދެކޮޅަށް ކުޅުނު މެޗު ވާދަވެރި ކުޅުމަކަށްފަހު 3-1 ސެޓުން ކާމިޔާބުކޮށް ކުލަބު ވެމްކޯ އިން މުބާރާތުގެ ތަށި ދިފާއުކޮށްފި އެވެ.

ޕޮލިސް ކްލަބް ފައިނަލުން ޖާގަ ހޯދީ ސެމީ ފައިނަލްގެ ފުރަތަަމަ މެޗުގައި ވޮލީބޯލް ޔޫތު ނިއު ޖެނެރޭޝަނާއި ވާދަކޮށް 3-1 ސެޓުން މެޗު ކާމިޔާބު ކޮށްގެންނެވެ. އަދި މިއީ 2019 ވަނަ އަހަރުގެ ފަހުން މުބާރަތުގެ ފައިނަލުން އެޓީމު ޖާގަ ހޯދި ފުރަތަަމަ ފަހަރެވެ. އަދި އެއަހަރު ޕޮލިހުން ވަނީ ކްލަބް ވެމްކޯ ބަލިކޮށް މުބާރާތް ކާމިޔާބުކޮށްފައެވެ.

ވެމްކޯ ފައިނަލުން ޖާގަ ހޯދީ މުބާރާތުގެ ތިންވަނަ ސެމީގައި ވޮލީބޯލް ޔޫތު ނިއު ޖެނެރޭޝަނާއި ވާދަކޮށް ސީދާ ތިން ސެޓުން މޮޅުވެގެންނެވެ. އަދި މިއީ ވެމްކޯ ގައުމީ މުބާރާތުގެ ފައިނަލުން ވިދިވިދިގެން ޖާގަ ހޯދި ތިންވަނަ ފަހަރެވެ. އެންމެ ފުރަތަމަ 2019 ވަނަ އަހަރުގެ ފައިނަލްގައި ޕޮލިސް ކްލަބް އަތުން އެޓީމު ބަލިވި ނަމަވެސް، މިދިޔަ އަހަރު ޖެނުއަރީ މަހު ކުޅުނު 2022 ވަނަ އަހަރުގެ މުބާރާތް ވެމްކޯ އިން ކާމިޔާބު ކުރީ ފައިނަލްގައި ކްލަބް ވޮލީބޯލް ބަލިކޮށްފަ އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަަމަ ދެ ސެޓް ވެސް 21-25 އިން ކާމިޔާބުކުރީ ވެމްކޯ އިންނެވެ. ނަމަވެސް މެޗުގެ ތިންވަނަ ސެޓުގައި ޕޮލިސް ކުލަބުން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން މިސެޓުގައި އެޓީމުން 8 ޕޮއިންޓްގެ ލީޑެއް ހޯދިއެވެ. އަދި މިސެޓް އެޓީމުން ކާމިޔާބުކުރީ 19-25 އިންނެވެ.

ނަމަވެސް މެޗުގެ ހަތަރުވަނަ ސެޓުގައި ވަރަށް ވާދަވެރި ކުޅުމަކަށްފަހު 23-25 ގެ ނަތީޖާއަކުން މޮޅުވެ، ކުލަބް ވެމްކޯ އިން ވަނީ 3-1 ސެޓުން މޮޅުވެ މުބާރާތުގެ ޗެމްޕިއަންކަން ހޯދާފައެވެ. އަދި ފައިނަލް މެޗުގެ މޮޅު ކުޅުންތެރިޔަކަށް ހޮވުނީ ކުލަބު ވެމްކޯގެ ކީޝާ ރިކޯލް ހަންޓް އެވެ.