ގެމަނަފުށީ ނަރުދަމާ ނިޒާމުގެ މަސައްކަތްތައް ނިންމުމަށް އެމްޑަބްލިޔުއެސްސީއަށް

ގއ. ގެމަނަފުށީގައި ކުރިން ގާއިމުކުރަން ފަށާފައިވާ ނަރުދަމާ ނިޒާމުގެ ނުނިމި ހުރި މަސައްކަތްތައް ނިންމުމަށް މާލޭ ވޯޓަރ އެންޑް ސްވަރޭޖް ކޮމްޕެނީ ( އެމްޑަބްލިޔުއެސްސީ) އާ މިއަދު ހަވާލުކޮށްފިއެވެ.

މި މަޝްރޫއުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި، މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ ސްޓޭޓް މިނިސްޓަރ ހަސަން ރަޝީދު އެވެ. އަދި އެމްޑަބްލިޔުއެސްސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަބްދުލް މަތީން މުޙައްމަދު އެވެ.

ޖުމްލަ 17,675,432.34 (ސަތާރަ މިލިއަން، ހަ ސަތޭކަ ހަތްދިހަ ފަސް ހާސް، ހަތަރު ސަތޭކަ ތިރީސް ދެ ރުފިޔާ، ތިރީސް ހަތަރު ލާރި) ރުފިޔާއަށް ހަވާލުކުރި މި މަޝްރޫއު ނިންމުމަށް ދީފައިވަނީ 180 ދުވަހުގެ މުއްދަތެކެވެ.

މި މަޝްރޫޢުގެ ދަށުން ކުރަން ހަމަޖެހިފައިވާ މައިގަނޑު މަސައްކަތްތަކުގެ ތެރޭގައި، ރަށުގައި ކުރިން މަސައްކަތް ފަށާފައިވާ ނަރުދަމާ ނިޒާމުގެ ބާކީ ހުރި މަސައްކަތްތައް ނިންމައި، ނިޒާމު ޓެސްޓްކޮށް ކަމިޝަން ކުރުން ހިމެނެއެވެ. މީގެ އިތުރުން ނަރުދަމާގެ ޕަންޕްސްޓޭޝަން ބެހެއްޓުމާއި، ރަށުގައި މީހުން އާބާދުވެފައިވާ ހުރިހާ ސަރަހައްދެއްގައި ނަރުދަމާ ހޮޅި އެޅުމުގެ މަސައްކަތް ކުރިއަށްދާނެއެވެ.

ހަމައެއާއެކު، ސީ އައުޓް ފޯލް އެޅުމާއި، ގޭބީސީތަކާއި އެހެނިހެން އިމާރާތްތަކުގެ ތެރޭގައި ކެޗްޕިޓް ބަހައްޓައި، ނަރުދަމާ ނިޒާމާ ގުޅައިދިނުމުގެ މަސައްކަތްވެސް މި މަޝްރޫއުގެ ތެރެއިން ކުރިއަށްދާނެ ކަމަށް އެ މިނިސްޓްރީން މައުލޫމާތު ދެއެވެ.

މި މަޝްރޫއަކީ ގެމަނަފުށީގެ ރައްޔިތުންނަށް ދިމާވެފައިވާ ނަރުދަމާގެ މައްސަލައަށް ދާއިމީ ހައްލެއް ހޯދައިދިނުމަށްޓަކައި ސަރުކާރުން އިސްކަންދީގެން ކުރިއަށްގެންދާ މުހިންމު މަސައްކަތެކެވެ. އެއްބަސްވުމުގައި ސޮއިކުރެވުނީ 1 ފެބުރުވަރީ 2026 ގައެވެ.