އަތޮޅުގެ އެހެން ރަށްތަކެކޭ އެއް ހަމައަކުން ކަމަދޫއަށް ތަރައްޤީ ގެނެސްދޭނަން: ރައީސް
ބ.އަތޮޅުގެ އެހެން ރަށްތަކެކޭ އެއްހަމަޔަކުން ކަމަދޫއަށް ތަރައްގީ ގެނެސްދެއްވާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ކަމަދުއަށް ވަޑައިގެން އެރަށުގެ ރައްޔިތުންނާ ވާހަކަދައްކަވަމުން ރައީސް ޑރ.މުއިއްޒު ވިދާޅުވީ އަތޮޅުގެ އެހެން ރަށްތަކާ އަޅާބަލާއިރު، ކަމަދޫ އޮންނަނީ ތަރައްޤީގެ ލިސްޓްގެ އެންމެ ފަހަތުގައިކަމަށާއި، މި ސަރުކާރުން އެ ތަފާތު ނައްތާލައި ހަމަހަމަ ކަމާއެކު ތަރައްޤީ ގެނެސްދިނުމުގެ ސިޔާސަތެއް ތަންފީޒުކޮށްދެއްވާނޭ ކަމަށެވެ.
ކަމަދޫއަށް ކުރެއްވި ޒިޔާރަތުގައި އެރަށުގެ ރައްޔިތުންނާ ބައްދަލުކުރައްވައި ވާހަކަދައްކަވަމުން ރައީސް ޑރ.މުއިއްޒު މިއަދު ވަނީ އެރަށުގެ ތަރައްޤީއަށް ސަރުކާރުން ކުރުމަށް ރާވާފައިވާ ކަންކަމުގެ މައުލޫމާތު ހިއްސާކުރައްވާފައެވެ.
ރައީސް ވިދާޅުވީ މި ދަތުރުފުޅުގެ ތެރެއިން ކަމަދޫ ސްކޫލްގެ އައު އިމާރާތް އެޅުމުގެ އެއްބަސްވުމާއެކު ސްކޫލްގައި ޖާގަ ތަނަވަސްވެގެންދާނޭ ކަމަށާއި، އެއާއެކު ސްކޫލްގެ ވަސީލަތްތައްވެސް އިތުރަށް ފުރިހަމަ ވެގެންދާނޭކަމަށެވެ. ސްކޫލްގެ އިތުރުން ރަށު ސިއްހީ މަރުކަޒުގެ ޖާގަ އިތުރުކޮށްދިނުމުގެ މަސައްކަތާއި، ކުޅިވަރުގެ ދަނޑުތައް ތަރައްޤީކުރުމުގެ މަސައްކަތްވެސް ފެށިގެންދާނޭކަމަށް ރައީސް ވަނީ ވިދާޅުވެފައެވެ.
މީގެ އިތުރުން ހޯކްސް ހޮޓެލް އާއެކު ސީޕްލޭންގެ ހިދުމަތް ފެށުމަށް ވެފައިވާ އެއްބަސްވުމުގެ ދަށުން ކަމަދުއަށް އިތުރު ތަރައްޤީ ލިބިގެންދާނޭކަމަށް ރައީސް ފާހަގަކުރެއްވިއެވެ. ރައީސް ވަނީ ކަމަދޫގައި ލޯކަލް ޓޫރިޒަމް ފުޅާވަމުން އަންނައިރު އިތުރު ސިނާއަތްތައް ތަރައްޤީވެގެން ދިއުމުގެ މުހިއްމު ކަމުގެ މައްޗަށް އަލިއަޅުވާ ވާހަކަދައްކަވާފައެވެ.
ރައީސް ޑރ.މުއިއްޒު ކަމަދޫއަށް ކުރެއްވި ޒިޔާރަތަށްފަހު ދެން ވަޑައިގަންނަވާނީ، ކުދަރިކިލަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
