އިދިކޮޅު ކޮންޒަވޭޓިވް ޕާޓީން މަސައްކަތް ކުރަނީ މުސްލިމުންނާމެދު ނަފްރަތް އުފެއްދުމަށް: ސްޓާމާ

އިނގިރޭސިވިލާތުގެ އިދިކޮޅު ކޮންޒަވޭޓިވް ޕާޓީން މުސްލިމުންނާ މެދު ނަފުރަތު އުފެއްދުމުގެ މަސައްކަތްކުރަމުންދާ ކަމަށްބުނެ ބޮޑުވަޒީރު ކެއަރ ސްޓާމަރ އެ ޕާޓީއަށް ވަރަށް ބޮޑަށް ފާޑުވިދާޅުވެއްޖެއެވެ.

ސްޓާމަރ މިފަދައިން ވިދާޅުވީ، ކޮންޒަވޭޓިވް ޕާޓީގެ އިސް މެންބަރެއް ކަމަށްވާ ނިކް ޓިމޮތީ، ލަންޑަނުގެ މޭޔަރު ސާދިގު ޚާން ބައިވެރިވެވަޑައިގެން އާއްމު ތަނެއްގައި ބޭއްވި އިފްތާރުއަކާ ގުޅޭގޮތުން ކުރި ޓްވީޓަކާ ގުޅިގެންނެވެ.

އެގޮތުން، ލަންޑަނުގެ ޓްރަފަލްގާ ސްކުއަރގައި ބޭއްވި މި އިފްތާރަށްފަހު މުސްލިމުން ނަމާދުކުރާ މަންޒަރު ފެންނަ ވީޑިއޯއެއް ހިއްސާކުރަމުން، އާންމު ތަންތަނުގައި ޖަމާއަތުގައި ނަމާދުކުރުމަކީ "ގަދަބާރު ދެއްކުމުގެ އަމަލެއް" ކަމަށް ޓިމޮތީ ވަނީ ސިފަކޮށްފައެވެ.

އަދި އާންމު ތަންތަނަށް ގަދަވެގަތުމަކީ "އިސްލާމިސްޓުންގެ" އުކުޅެއް ކަމަށްވެސް އޭނާ ބުނެފައިވެއެވެ.

އެކަމާ ގުޅިގެން މަޖިލީހުގައި ވާހަކަދައްކަވަމުން ބޮޑުވަޒީރު ސްޓާމަރ ވަނީ، ކޮންޒަވޭޓިވް ޕާޓީގެ ލީޑަރު ކެމީ ބޭޑެނޮކް އަރިހުން ޓިމޮތީ މަގާމުން ވަކިކުރުމަށް ގޮވާލައްވާފައެވެ.

ސްޓާމަރ ވިދާޅުވީ، މުސްލިމުން ނަމާދުކުރުމަކީ ބަލައިގަނެވޭނެ ކަމެއް ނޫން ކަމަށް ބުނާ މީހަކު އޭނާގެ ޓީމުގައި ހުރިނަމަ، ވަގުތުން ވަކިކުރާނެ ކަމަށެވެ. "އަހަރެންނަށް ފެންނަނީ ކޮންޒަވޭޓިވް ޕާޓީން މުސްލިމުންގެ ހަރަކާތްތަކަށް ފާޑުކިޔާތަން. މީގެން ދޭހަވަނީ އެ ޕާޓީގައި މުސްލިމުންނާ މެދު މައްސަލަތަކެއް ހުރިކަން،" ސްޓާމަރ ވިދާޅުވިއެވެ.

ނަމަވެސް، ކެމީ ބޭޑެނޮކް ވަނީ ޓިމޮތީގެ ދިފާއުގައި ވާހަކަދައްކަވާފައެވެ. އޭނާ ވިދާޅުވީ ޓިމޮތީ މަސައްކަތްކުރީ އެގައުމުގެ އުސޫލުތައް ދިފާއުކުރުމަށް ކަމަށެވެ.

މި މައްސަލައިގައި ކޮންޒަވޭޓިވް ޕާޓީގެ ކުރީގެ އިސް ބައެއް މެންބަރުންވެސް ވަނީ ކަންބޮޑުވުން ފާޅުކޮށްފައެވެ. އެގޮތުން ބަރޮނެސް ސައީދާ ވަރްސީ ވިދާޅުވީ، މިފަދަ ވާހަކަތަކުގެ ސަބަބުން އިނގިރޭސި މުސްލިމުންނަށް އެގައުމުގައި ބަލައިނުގަންނަ ކަމުގެ އިހުސާސް ކުރެވޭ ކަމަށެވެ.

ދީނީ އިލްމުވެރިންނާއި އިމާމުންވެސް ވަނީ ޓިމޮތީގެ ވާހަކަތަކަށް ރައްދު ދެއްވާފައެވެ. އިނގިރޭސިވިލާތުގެ އެންމެ ބޮޑު އެއް މިސްކިތުގެ އިމާމް ގާރީ އާސިމް ވިދާޅުވީ، ބަންގިއަކީ "ގަދަބާރު ދެއްކުމެއް" ނޫން ކަމަށާއި، އެއީ އަޅުކަމަށް ގޮވައިލާ ދައުވަތެއް ކަމަށެވެ. އަދި މިފަދަ ކަންކަމަކީ ނުރައްކަލެއްގެ ގޮތުގައި ސިފަކުރުމަކީ މުސްލިމުންނާ މެދު ނަފުރަތު އުފެއްދުމަށް ދެވޭ ފުރުސަތެއް ކަމަށް އޭނާ ފާހަގަކުރެއްވިއެވެ.

ލަންޑަނުގެ މޭޔަރު ސާދިގު ޚާން ޓްވިޓަރގައި ކުރެއްވި ޕޯސްޓެއްގައި ވިދާޅުވީ، ލަންޑަނަކީ ހުރިހާ ދީންތަކެއްގެ މީހުންނަށްވެސް އޮތް ތަނެއް ކަމަށާއި، އެކި ދީންތަކުގެ މުނާސަބަތުތައް އެ ސިޓީގައި ފާހަގަކުރަމުންދާ ކަމަށެވެ.