ކޮޅުވެއްޓިން ގެއްލުނު ދެ މީހުން ހޯދުމަށް ކަނޑާއި ވައިގެ މަގުން ބޮޑު ސަރަހައްދެއް ބަލައިފި؛ އަދިވެސް ނުފެނޭ

ކ. ގާފަރު ކައިރިން ބަންޑުންޖަހާލި އެލްސީވީން ގެއްލިގެން ހޯދަމުންދާ ދެ މީހުން ހޯދުމުގެ މަސައްކަތް އެމްއެންޑީއެފް ކޯސްޓްގާޑުން ކަނޑާއި ވައިގެ މަގުން ކުރިއަށްގެންދާ ކަމަށާ އެހެން ނަމަވެސް އަދި އެމީހުން ނުފެންނަ ކަމަށް އެ އިދާރާއިން ބުނެފިއެވެ.

އެމްއެންޑީއެފުން މައުލޫމާތު ދީފައިވާ ގޮތުގައި، ޖުލައި 31 ވަނަ ދުވަހު ހިނގި މި ހާދިސާގައި ގެއްލުނު ދެ ބިދޭސީން ހޯދުމަށް އެ ދުވަހުން ފެށިގެން މެދުކެނޑުމެއްނެތި ދަނީ މަސައްކަތް ކުރަމުންނެވެ. މި އޮޕަރޭޝަންގައި އެމްއެންޑީއެފް އެއަރ ކޯރގެ އެހީތެރިކަމާއެކު ވައިގެ މަގުން މިހާތަނަށް 3580 އަކަ ކިލޯ މީޓަރުގެ ސަރަހައްދެއް ވަނީ ބަލާފައެވެ.

މީގެ އިތުރުން، ކަނޑުމަގުން ކުރިއަށްގެންދާ ހޯދުންތަކުގައި އެމްއެންޑީއެފް ކޯސްޓްގާޑް ޝިޕް 'ޢިމާދުއްދީން' އާއި ފާސްޓް އިންޓަސެޕްޓަރ ކްރާފްޓްތައް ބޭނުންކޮށްގެން 441 އަކަ ނޯޓިކަލް މޭލްގެ ސަރަހައްދެއް ބަލާފައިވާ ކަމަށް އެމްއެންޑީއެފުން ބުނެއެވެ. އަދި ކޯސްޓްގާޑުގެ ހުނަރުވެރި ޑައިވަރުން ވަނީ ކަނޑުގެ އަޑިން 675,120 އަކަ މީޓަރުގެ ސަރަހައްދެއްވެސް ބަލާ ފާސްކޮށްފައެވެ.

ނަމަވެސް، މިހާތަނަށް ކުރެވުނު އެއްވެސް މަސައްކަތަކުން އެ ދެ މީހުން ފެނިފައެއް ނުވެއެވެ.

އެމްއެންޑީއެފުން ވަނީ އެ ސަރަހައްދުން ދަތުރުކުރާ އުޅަނދުފަހަރާއި ކައިރި ރަށްތަކުން މި ދެ މީހުންނާ ބެހޭ އެއްވެސް މައުލޫމާތެއް ލިބޭތޯ ބަލައިދިނުމަށް އިލްތިމާސްކޮށްފައެވެ. މި ހާދިސާއާ ގުޅުންހުރި އެއްވެސް މައުލޫމާތެއް ލިބިއްޖެނަމަ، ލަސްނުކޮށް ކޯސްޓްގާޑުގެ ހިލޭ ގުޅޭ ނަންބަރު 191 ނުވަތަ 3395981 އަދި 3398898 އަށް ގުޅުއްވައި ހިއްސާކޮށްދެއްވުމަށް އެމްއެންޑީއެފުން އެދެއެވެ. އަދި ފެކްސް މެދުވެރިކޮށް މައުލޫމާތު ހިއްސާކުރައްވާނަމަ 3391665 ނަންބަރު ބޭނުންކުރެއްވުމަށްވެސް ވަނީ އެދިފައެވެ.