ރައްޔިތަކު ނިސްބަތްވާ ސިޔާސީ ފިކުރެއް ސަރުކާރަށް މުހިންމެއް ނޫން: ރައީސް މުޢިއްޒު
ރައްޔިތަކު ނިސްބަތްވާ ސިޔާސީ ފިކުރެއް އެމަނިކުފާނާއި ސަރުކާރަށް މުހިންމު ނޫންކަމަށް ރައިސުލްޖުމުހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
މިހާރު ރާއްޖޭގެ ދެކުނުގެ އަތޮޅުތަކަށް ކުރައްވަމުން ގެންދާ ދަތުރުފުޅުގައި ފުވައްމުލައް ސިޓީ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން ރައީސް ޑރ.މުހައްމަދު މުއިއްޒު ވިދާޅުވީ މި ސަރުކާރުން އެއްވެސް ކުލަޔަކަށް ނުވަތަ ފިކުރަކަށް ބެލުމެއްނެތި ހުރިހާ ރައްޔިތުންނަށްވެސް ޚިދުމަތް ފޯރުކޮށްދޭނީ ހަމަހަމަ ކަމާއި އިންސާފުވެރިކަމާއެކީ ކަމަށެވެ.
"އަޅުގަނޑު ދަންނަވާލަން ބޭނުންވަނީ ރާއްޖޭގެ ހުރިހާ ރައްޔިތުންނަށްވެސް މި ސަރުކާރުގެ ކިބައިން ފެންނާނީ މި ދެންނެވި ހަމަހަމަކަމާއި އިންސާފު. އެނޫން އެއްވެސް މަންޒަރެއް އެއްވެސް ދިމާލަކުން ނުފެންނާނެ. އެ ރައްޔިތަކު ނިސްބަތްވަނީ ކޮން ފިކުރެއްތޯ އަޅުގަނޑު ބަލާކަށް ބޭނުމެއް ނޫން."
ރައީސް ވިދާޅުވިއެވެ.
ރައީސް ވިދާޅުވީ، އެމަނިކުފާނު ޤަބޫލުފުޅު ކުރައްވާގޮތުން އިންތިހާބުތަކުގެ ކެމްޕެއިންތަކުގައި ސިޔާސީ ހިޔާލުތަފާތުވުންތަކާއި ބަހުގެ ހަމަލާތައް އައި ނަމަވެސް އިންތިހާބުގެ ފަހުން ހުރިހާ ރައްޔިތުން ހަމަހަމަކޮށް ޚިދުމަތް ކުރަންޖެހޭނެ ކަމަށެވެ
ފުވައްމުލަކު ސިޓީ ކައުންސިލާއި އައްޑޫ ސިޓީ ކައުންސިލުގެ އިތުރުން ރާއްޖޭގެ ގިނަ ކައުންސިލްތަކުންވެސް އެ އެއްބައިވަންތަކަން ފެނިގެންދާ ކަމަށާއި، ރާއްޖޭގެ ހުރިހާ ރަށެއްގެ ކައުންސިލްތަކުގެ ވެރިންވެސް އެގޮތަށް އަމަލުކުރަމުންދާތަން ފެންނާނެ ކަމަށް އުއްމީދު ކުރައްވާ ކަމަށްވެސް ރައީސް ވިދާޅުވިއެވެ
އެމަނިކުފާނުގެ ވަޢުދުތައް ފުރިހަމަކުރުމަށް ކުރިއަށް އޮތް ރައްޔިތުން މަޖިލިހުގެ މެޖޯރިޓީ ސަރުކާރަށް ބޭނުންވާ ކަމަށާއި މިއަދުގެ މަޖިލީސް ތެރެއިން ބައެއް ކަންކަން ހިނގާތަން ފެންނަނީ ދުނިޔޭގެ އެހެން ގައުމެއްގައި ކަންކަން ހިނގާ ގޮތަކަށް ނޫންކަމަށްވެސް ރޭގެ ޖަލްސާގައި ރައީސް ފާހަގަ ކުރެއްވިއެވެ.
އެގޮތުން މިދިޔަ 13 ހަފްތާތެރޭގައި މިހާރު މިއޮތް މަޖިލިހުން ސަރުކާރާއި މެދު ކަންތައްތައް ކޮށްފައިވަނީ އެއްވެސް އަސާސެއްގެ މައްޗަށް ބިނާކޮށްގެން ނޫންކަމަށްވެސް އެމަނިކުފާނު ފާހަގަކުރެއްވިއެވެ.
"އަޅުގަނޑުމެން އެއްވެސް ކަމެއް ނުކޮށް ފަރުވާ ކުޑަކޮށް އެއްވެސް ކަހަލަ ޕާފޯމަންސެއް ނެތި ދިޔަ ނަމަ މައްސަލައެއް ނެތް. އެހެނެއް ނޫން، ކަންކަން އިރާދަ ކުރެއްވިއްޔާ ކުރެވޭތޯ ބަލާ ކުރަމުން މި ދަނީ. އަދި އިރާދަ ކުރެއްވިއްޔާ ކުރިއަށް އޮތްތާ ވެސް އެކަން ކުރާނަން،"
ރައީސް ޑރ.މުހައްމަދު މުއިއްޒު ވިދާޅުވިއެވެ.
ރައްޔިތުން އެދޭ ކަންކަން ބާރު ސްޕީޑްގައި ކުރެވޭނީ މަޖިލީހުން ދޭ އެއްބާރުލުމެއްގެ މައްޗަށް ކަމަށާއި، އަދި އެފަދަ ކަންކަން ކުރެވޭނީ މަޖިލީސް އެއީ ރައްޔިތުންގެ ވިންދާ އެއްގޮތަށް ހިނގާ ތަނަކަށް ވެގެން ކަމަށްވެސް ރައީސް ޑރ.މުހައްދު މުއިއްޒު ވިދާޅުވިއެވެ. އެ
އެމަނިކުފާނު މިފަދައިން ވިދާޅުވެފައިވާއިރު އިދިކޮޅު އެންޑީޕީގެ މެޖޯރިޓީ އޮތް މިހާރުގެ ރައްޔިތުން މަޖިލިހުން ވަނީ ރައީސް ޑރ. މުހައްމަދު މުއިއްޒުގެ ސަރުކާރުގެ 3 ވަޒީރަކަށް ރުހުން ނުދިނުމުގެ އިތުރުން އެމަނިކުފާނުގެ ފުރަތަމަ ރިޔާސީ ބަޔާން އިއްވެވި ޖަލްސާވެސް ބޮއިކޮޓް ކޮށްފައެވެ. އޭގެ އިތުރުން ޤަނޫނު އަސާސީގެ މާއްދާތަކަށް ބަދަލުގެނެސްގެން މަޖިލިހުން މިހާރު އަންނަނީ ރައީސާއި ނައިބު ރައީސް އަޒުލްކުރުމަށް ފަސޭހަ ކުރަންވެސް މަސައްކަތް ކުރަމުންނެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
