ފަސޭހަކަމާއި އެކު ޕޮލިސް ބަލިކޮށް ފައިނަލްގެ ދެވަނަ ޖާގަ ޓީމު ހިޔާ ބޮޓްލިންއަށް

ހޯރަފުށީގައި މިހާރު ކުރިއަށްދާ "ޖީއެސް އަންހެން ވޮލީބޯޅަ ޓޯނަމަންޓް 2024" ގެ ޕްލޭއޮފް މެޗުގައި ޓީމު ހިޔާ ބޮޓްލިން އާއި ހޯރަފުށީ ޕޮލިސް ކުލަބު ވާދަކުރި މެޗު ސީދާ ތިން ސެޓުން ކާމިޔާބުކޮށް ޓީމު ހިޔާ ބޮޓްލިން ވަނީ މުބާރާތުގެ ފައިނަލުގެ ދެވަނަ ޖާގަ ހޯދައިފިއެވެ.

މެޗުގެ ފުރަތަަމަ ސެޓުގައި ދެޓީމުގެ ފަރާތުން ވަރަށް ވާދަވެރި ކުޅުމެއް ފެނިގެންދިޔަ އިރު މި ސެޓް ޓީމު ހިޔާ ބޮޓްލިން ކަމިޔާބުކުރީ 23-25 އިންނެވެ. އަދި އެޓީމުން ދެވަނަ ސެޓް 20-25 އިން ކާމިޔާބުކުރި އިރު، ތިންވަނަ ސެޓުގައި ޕޮލިސް ޓީމުގެ ފަރާތުން ފެނިގެންދިޔައީ ވަރަށް އާދައިގެ ކުޅުމެކެވެ.

މިއާއެކު ޓީމު ހިޔާ ބޮޓްލިން މިސެޓް ކާމިޔާބުކުރީ ފަސޭހަކަމާއި އެކު 11-25 ގެ ތަފާތުބޮޑު ނަތީޖާއަކުންނެވެ. އަދި މިމެޗުގެ ކުއީން އޮފްދަ މެޗަކަށް ހޮވުނީ ޓީމް ހިޔާ ބޮޓްލިންގެ ޖާޒީ ނަމްބަރ 10 މާޖިދާއެވެ.

ޗެންޕިްއަން ޓީމަށް 10,000 ރުފިޔާ އަދި ރަނަރަޕް ޓީމަށް 5,000 ގެ ފައިސާގެ އިނާމެއް ހުށަހަޅާފައިވާ މިމުބާރާތުގައި ހަތަރު ޓީމަކުން ބައިވެރިވެފައިވާ އިރު މުބާރަތުގެ މެޗުތައް ކުރިއަށް ގެންގޮސްފައިވަނީ ލީގު އުސޫލުންނެވެ.

އެގޮތުން ލީގު ބުރުގައި ކޮންމެ ޓީމެއް ކޮންމެ ޓީމަކާއި އެއް މެޗު ކުޅެ އެންމެ ގިނަ ޕޮއިންޓް ހޯދި އެފްސީ ފްރިގޭޓާ އިން ފައިނަލުގެ ފުރަތަމަ ޖާގަ ހޯދި އިރު، ލީގު ބުރުގެ ދެވަނަ ޓީމު ހިޔާ ބޮޓްލިން އާއި ތިންވަނަ ހޯރަފުށީ ޕޮލިސް ކުލަބު ވާދަކުރި ޕްލޭއޮފް މެޗުން މޮޅުވެ ފައިނަލުގެ ދެވަނަ ޖާގަ ހޯދީ ޓީމު ހިޔާ ބޮޓްލިން އެވެ.

މުބާރާތުގެ ފައިނަލް މެޗުގައި ޓީމު ހިޔާ ބޮޓްލިން މިމަހުގެ 16 ވަނަ ދުވަހުގެ ރޭ ނުކުންނާނީ އެފްސީ ފްރިގޭޓާ އާއި ދެކޮޅަށެވެ. އަދި މިމެޗު ފެށުމަށް ހަމަޖެހިފައިވާ ހުކުރު ދުވަހުގެ ރޭ 20:30 ގައެވެ.

މިމުބާރާތަކީ ކުލަބު ޖީއެސްގެ ފަރާތުން އިންތިޒާމްކޮށްގެން ހއ. ހޯރަފުށީގައި ހަރަކާތްތެރިވާ ކުލަބު ޖަމިއްޔާތަކާއި، ސަރުކާރުގެ އޮފީސްތަކާއި ސަރުކާރު ހިއްސާވާ ކުންފުނިތަކާއި، އަމިއްލަ ކުންފުނިތަކުގެ އިތުރުން އަމިއްލަ ވިޔަފާރިތަކަށް ބައިވެރިވުމުގެ ފުރުސަތު ހުޅުވާލައިގެން ބާއްވާ މުބާރާތެކެވެ. އަދި މިއަހަރުގެ މުބާރާތުގެ މެއިން ސްޕޮންސަރ އަކަށް އުރިދޫ މޯލްޑިވްސް އިތުރުން ވިއޭނާ ސްޕޯޓްސް ކުލަބު ހަމަޖައްސާފައިވާ އިރު، މުބާރާތްގެ އޮފިޝަލް މީޑިއާ ޕާޓްނަރަކީ ވޮއިސް އެވެ.