ޒިންމާ އަދާކުރުމުގައި ސިޔާސީ ފިކުރާ ސިޔާސީ ވިސްނުމަކީ ހުރަހަކަށް ހަދައިގެން ނުވާނެ: ރައީސް ޑރ.މުއިއްޒު
ޒިންމާތައް އަދާކުރުމުގައި ސިޔާސީ ފިކުރާއި، ސިޔާސީ ވިސްނުމަކީ ހުރަހަކަށް ނުހެދުމަށް ރައީސް ޑރ.މުއިއްޒު ވިދާޅުވެއްޖެއެވެ.
ރައީސް ޑރ.މުއިއްޒު ގދ ގައްދޫ އަށް ވަޑައިގެން އެ ރަށުގެ ރައްޔިތުންނާއި ބައްދަލު ކުރައްވާ މިފަދައިން ވިދާޅުވި އިރު، އެ ރަށުގެ ކައުންސިލުންގެ ފަރާތުން އެމަނިކުފާނަށް މާބޮޑު އެއްބާރުލުމެއް ލިބިފައެއް ނުވެއެވެ.
މިހާރު ކުރައްވަމުންގެންދަވާ ދަތުރުފުޅުގައި މިހާތަނަށް ސިޔާސީ ގޮތުން މުޅިން ހިޔާލު ތަފާތު ޕާޓީ، އެމްޑީޕީގެ ކައުންސިލުތަކުގެ ރައީސުން، މޭޔަރުން ހުރިހާ ރަށެއްގައި ވެސް ވަރަށް ފުރިހަމައަށް ބައިވެރިވެވަޑައިގަތްކަމަށް ވިދާޅުވެ، ރައީސް ޑރ.މުއިއްޒު ވަނީ ގައްދޫގެ ކައުންސިލުގެ ފަރާތުން ލިބުނު އެއްބާރުލުން ކުޑަކަން ފާހަގަކުރައްވާ، އެކަމާ ހިތާމަފުޅު ކުރައްވާކަމަށް ވިދާޅުވެފައެވެ.
މިއަދުގެ ޖަލްސާގެ އެޖެންޑާ ގައި ވެސް ގައްދޫ ކައުންސިލްގެ ރައީސް ވާހަކަފުޅު ދެއްކެވުމަށް ހަމަޖެހިފައި އޮތް ނަމަވެސް ފަހު ވަގުތު އެ ޖަލްސާ އަށް އެ ރަށުގެ ކައުންސިލްގެ ރައީސް އާއި ނައިބު ރައީސް ވެސް ހާޒިރުވެފައެއް ނުވެއެވެ.
"މިއަދާ ހަމައަށް އައިރުގަ މި ފެށި ދަތުރުތަކުގަ ވަރަށް ގިނަ ކައުންސިލުތަކަކާ ބައްދަލުވެއްޖެ. އެހެންނަމަވެސް މި ރަށުގެ ކައުންސިލުގެ އެއްބާރުލުން ތަންކޮޅެއް ކުޑަކޮށް މި ލިބުނީ. ވަރަށް ހިތާމަކުރާ ކަމެއް،"
ރައީސް ޑރ.މުއިއްޒު ވިދާޅުވިއެވެ.
ރައީސް ޑރ.މުއިއްޒު ވަނީ އިންތިހާބު ތެރޭގައި އޮންނަ ވާދަވެރިކަން ސިޔާސީ ގޮތުން އޮތް ނަމަވެސް، އެމަނިކުފާނު ވެސް އަދި ކައުންސިލަރުން ވެސް މަގާމާއި ހަވާލުވަމީ ހަމަހަމަކަމާއިއެކީގަ އެމީހަކު ނިސްބަތްވާ ޕާޓީއަކަށް ބެލުމެއްނެތި، ވޯޓް ދިނަސް ނުދިނަސް ރައްޔިތުންނަށް ހިދުމަތް ކުރުމަށް ކަން ހަނދާންކޮށްދެއްވާފައެވެ. އަދި ގައްދޫ އިން ފެނިގެން ދިޔަ މަންޒަރަކީ ލާމަރުކަޒީ އުސޫލު ހިނގަންވާގޮތް ނޫންކަމަށާއި، އެއަށްވުރެ ޒިންމާދާރު ބަޔަކަށް ވުމަށް ރައީސް ޑރ.މުއިއްޒު ވަނީ ނަސޭހަތްތެރިވެފައެވެ.
"އެމީހަކު އެ ނިސްބަތްވާ ޕާޓީއަކަށް ބެލުމެއްނެތި، ހަމަހަމަކަމާއެކީގަ ރައްޔިތުންނަށް ހިދުމަތްކުރުމުގެ ހުވައެއްކޮށްގެން މި ހަވާލުވަނީ. އަޅުގަނޑު ވެސް އެ ހުވާ ކުރީ، ކައުންސިލަރުން ވެސް އެ ހުވާ ކުރައްވަނީ. އެހެންނަމަވެސް މި ރަށުން މި ފެންނަ މަންޒަރާއި ދޭތެރޭ ހިތާމަކުރަން. ލާމަރުކަޒީ ނިޒާމެއް ހިންގަންޖެހޭ އުސޫލެއް ނޫން. އެއަށްވުރެ އަޅުގަނޑުމެން ވާންޖެހޭނީ ޒިންމާދާރު ބަޔަކަށް،"
ރައީސް ޑރ.މުއިއްޒު ވިދާޅުވިއެވެ.
މީގެ އިތުރުންވެސް ރައީސް ޑރ.މުއިއްޒު ވިދާޅުވީ ކައުންސިލް ތަކަކީ ރައްޔިތުންނާއި ސަރުކާރާ ދެމެދުގައި އޮންނަނީ ކައުންސިލް ކަމަށްވިދާޅުވެފައެވެ. އަދި އިންތިހާބު ތަކުގައި މި ކަހަލަ ކަންކަމުން ތަޖުރިބާ ހޯދާ، މަޖިލީހަށް ވިޔަސް، ކައުންސިލަށް ވިޔަސް، ސަރުކާރަށް ވިޔަސް ޕާޓީ އަކަށް ބެލުމެއް ނެތި ތެދުވެރި އަމާނާތްތެރި މީހުން ހޮވުމަށް އެދިވަޑައިގެންފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
