އަމާޒަކީ ވީއައިއޭގެ ހަކަތައިގެ %90 އިއާދަކުރަނިވި ހަކަތައަށް ބަދަލުކުރުން: ޝަރީފް

ކުރިއަށް އޮތް 2 އަހަރުގެ ތެރޭގައި ވެލާނާ އިންޓަނޭޝަނަލް އެއާޕޯޓު (ވީއައިއޭ) ގެ ހަކަތައިގެ %90 އިއާދަކުރަނިވި ހަކަތައަށް ބަދަލުކުރުމަކީ އަމާޒެއްކަމަށް  މޯލްޑިވްސް އެއަރޕޯޓްސް ކޮމްޕެނީ ލިމިޑެޓް (އެމްއޭސީއެލް) ގެ ސީއީއޯ އަދި މެނޭޖިންގ ޑިރެކްޓަރ އިބްރާހީމް މުޙައްމަދު ޝަރީފް ވިދާޅުވެއްޖެއެވެ.

ރާއްޖޭން ބޭނުންކުރާ ހަކަތައިގެ ތިންބައިކުޅަ އެއްބައި ނުވަތަ %33 އަކީ އިއާދަކުރަނިވި ހަކަތައަށް ބަދަލުކުރުމަކީ ސަރުކާރުގެ އަމާޒަކަށްވާއިރު، ދައުލަތުގެ މީޑިއާ، ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުން ޝަރީފް ވިދާޅުވީ، މިކަމަށް އެއްބާރުލުންދިނުމަށްޓަކައި އެމްއޭސީއެލުން ގިނަ މަސައްކަތަކެއް ކުރުމަށް ރާވާފައިވާ ކަމަށެވެ.

"ކުރިއަށް އޮތް 2 އަހަރުތެރޭގައި އަޅުގަނޑުމެންގެ އެތެރޭގައި، ބޭނުންކުރާ ހަކަތައިގެ މަދުވެގެން %90 ރިނިއުވަބަލް ސޯސަސްއަށް ބަދަލުކުރާނަން. އަމާޒަކީ ހުރިހާ ހަކަތައެއް ރިނިއުވަބަލްއަށް ބަދަލުކުރުން."

ޝަރީފް ވިދާޅުވިއެވެ.

ޝަރީފް ގެ އިތުރުންވެސް މިކަމާއި ގުޅޭގޮތުން އެމްއޭސީއެލްގެ ޑެޕިއުޓީ މެނޭޖިން ޑިރެކްޓަރ ލަމްއާން މުހައްމަދު ވިދާޅުވީ، އިއާދަކުރަނިވި ހަކަތައާއި ގުޅޭ މަސައްކަތްތަކެއް ވަރަށް އަވަހަށް ފެށިގެންދާނެ ކަމަށާއި، މި މަޝްރޫއު ނިމުމުން ވީއައިއޭ ވެގެންދާނީ މި ސަރަހައްދުގައި ވެސް އިއާދަކުރަނިވި ހަކަތަ ބޭނުން ކޮށްގެން އެންމެ ގިނަ ވަގުތު އޮޕަރޭޓުކުރާ އެއަރޕޯޓަށް ކަމަށެވެ.

އިއާދަކުރަނިވި ހަކަތައިގެ ގޮތުގައި ވީއައިއޭއިން މިހާރު ބޭނުންކުރާ މިންވަރު ހުރީ %4 ގައެވެ.