ތެލުގެ ޚަރަދަށް ލުޔެއް ހޯދުމަށް އޭޑީބީން 50 މިލިއަން ޑޮލަރުގެ ލޯނެއް

ދުނިޔޭގެ ބާޒާރުގައި ތެލުގެ އަގު އުފުލުމާ ގުޅިގެން ދައުލަތުގެ ބަޖެޓަށް ކުރިމަތިވެފައިވާ ބުރައަށް ލުޔެއް ހޯދުމުގެ ގޮތުން އޭޝިއަން ޑިވެލޮޕްމަންޓް ބޭންކް (އޭޑީބީ) ގެ 50 މިލިއަން ޑޮލަރުގެ ލޯނު އެއްބަސްވުމެއްގައި މިއަދު ސޮއިކޮށްފިއެވެ.

އެނާޖީ ސެކިއުރިޓީ އެމަޖެންސީ އެސިސްޓެންސް ޕްރޮޖެކްޓުގެ ނަމުގައި ހިންގުމަށް ރާވާފައިވާ މި މަޝްރޫޢުގެ ލޯނު އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ ފިނޭންސް މިނިސްޓަރު ޙަސަން ޒަރީރެވެ. ޕްރޮޖެކްޓް އެގްރީމެންޓުގައި ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ތަމްސީލުކުރައްވައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަދި ޗީފް އެގްޒެކެޓިވް އޮފިސަރު ޝިމާދު އިބްރާހީމެވެ. އޭޑީބީގެ ފަރާތުން ދެ އެއްބަސްވުމުގައި ވެސް ސޮއިކުރެއްވީ އެ ބޭންކުގެ ރީޖަނަލް ކޯޕަރޭޝަން އެންޑް އިންޓިގްރޭޝަން ޔުނިޓުގެ ރީޖަނަލް ހެޑް ޑރ. ތިއަމް ހީ އަންގެވެ.

ފިނޭންސް މިނިސްޓްރީން ބުނީ މެދުއިރުމަތީގެ ހަމަނުޖެހުންތަކާ ހެދި ބައިނަލްއަޤުވާމީ ބާޒާރުގައި ތެލުގެ އަގު މައްޗަށް ގޮސް ތެލަށް ސަރުކާރުން ހޭދަކުރަންޖެހޭ މިންވަރު ބޮޑުވެފައިވާ ދަނޑިވަޅެއްގައި ދައުލަތުގެ ބަޖެޓަށް ލުޔެއް ހޯދައިދިނުމަކީ މި މަޝްރޫޢުގެ އެންމެ މައިގަނޑު މަޤުޞަދު ކަމަށެވެ.

މި ރަސްމިއްޔާތުގައި ފިނޭންސް މިނިސްޓްރީ އާއި އެސްޓީއޯ އަދި އޭޑީބީގެ އިސް ބޭފުޅުން ބައިވެރިވެވަޑައިގެންނެވިއެވެ.

ބައިނަލްއަޤުވާމީ ބޭންކުތައް މެދުވެރިކޮށް ކޮންސެޝަނަލް ފައިނޭންސިން ހޯދުމަށް ސަރުކާރުން ކުރަމުންދާ މަސައްކަތުގެ ތެރެއިން ހަމަޖެހުނު މި ލޯނަކީ ދަރަނީގެ ދެމެހެއްޓެނިވިކަން ޔަޤީންކުރުމަށް އެހީތެރިވެދޭނެ ފެސިލިޓީއެއް ކަމަށް ސަރުކާރުން ވަނީ ބުނެފައެވެ.