ދިވެހިޤައުމީ ފުޓްސަލް ޓީމަށް ރައީސުލްޖުމްހޫރިއްޔާގެ ތައުރީފް

ސާފް ފުޓްސަލް ޗެމްޕިއަންޝިޕްގެ އެއްވަނަ ހޯދުމާއި ގުޅިގެން ރައީސުލްޖުމްހޫރިއްޔާ ދިވެހި ފުޓްސަލް ޓީމަށް ތައުރީފް ކުރައްވައި  އައްސަރިބަހާއި ޝުކުރު އަދާކުރައްވައިފިއެވެ.

ޤައުމީ ފުޓްސަލް ޓީމް ޗެމްޕިއަންކަން ހޯދުމާ ގުޅިގެން އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ، މިއީ ތާރީހީ ފަހްރެއްކމަަށެވެ. ރައީސް ވިދާޅުވީ، ކުޅިވަރުގެ މައިދާނުގައި ދިވެހި ހިތްވަރުގަދަ ދަރީން ހޯދަމުންދާ ރަންވަނަތައް އިތުރުވުމަކީ، ޤައުމުގެ މުސްތަޤްބަލަށް އުޖާލާކަމެއް ކަމަށެވެ.

ވަކީން ޚާއްޞަކޮށް، ކުޅުނު ކޮންމެ މެޗަކުން ވަރަށް ފުރިހަމަ މޮޅަކާއެކު ބައިނަމްއަޤްވާމީ މިފަދަ މުބާރާތެއްގެ އެއްވަނަ ހޯދުމަކީ ތާރީޚީ ފަޚުރެއްކަން ފާހަގަކުރައްވަމުން ރައީސް ވިދާޅުވީ، މިއީ ޤައުމީ ރޫޙާއި ޢަޒުމުގައި ހިތްވަރުކޮށް ކާމިޔާބު ހޯދުމުގައި ދެވަނައެއް ނެތް ރީތި ނަމޫނާއެއް ކަމަށެވެ.

ރައީސްގެ ޕޯސްޓްގައި ވަނީ ޤައުމީ ފުޓްސަލް ޓީމުގެ ހުނަރުވެރި ކުޅަދާނަ ކުޅުންތެރީންނަށް އައްސަރިބަހާއި ޝުކުރު ތަކުރާރުކުރައްވާފައެވެ.

ޤައުމީ ފުޓްސަލް ޓީމް ޗެމްޕިއަންކަން ކަށަވަރުކުރީ މިއަދު ބޫޓާނާ ދެކޮޅަށް ކުޅުނު މެޗުން މޮޅުވެގެންނެވެ. މިމެޗް 3-1 ގެ ނަތީޖާއިން ދިވެހިން ކާމިޔާބުކުރިއިރު، މުބާރާތުގެ ޗެމްޕިއަންކަން ހޯދީ މޮޅު ކުޅުމެއް ދައްކައި އެއްވެސް މެޗަކުން ބަލިނުވެއެވެ. މި މުބާރާތުގެ ޗެމްޕިއަންކަން ރާއްޖެ ހޯދާފައިވަނީ ކުޅެންޖެހޭ އެއްމެޗް އޮއްވައެވެ. މުބާރާތުގައި ދެން ރާއްޖެއަށް އޮތީ އަވައްޓެރި ސްރީލަންކާ އާ ދެކޮޅަށް ނިކުންނަ މެޗެވެ.