ދިރާގުން މީޑިއާނެޓުގެ އަންލިމިޓެޑް ސްޕޯޓްސްޕާސް އެކްޓިވޭޓްކުރެވޭ ގޮތަށް ތަޢާރަފުކޮށްފި

ދިރާގުން، މީޑިއާނެޓުގެ "އަންލިމިޓެޑް ސްޕޯޓްސްޕާސް"ގެ ޚިދުމަތް ތަޢާރަފްކޮށްފިއެވެ.

ދިރާގުން ބުނި ގޮތުގައި އެ ޚިދުމަތް މެދުވެރިކޮށް ދުނިޔޭގެ އެންމެ މަގުބޫލު މުބާރަތްތައްކަމުގައިވާ ޕްރިމިއާ ލީގު، ޗެންޕިއަންސް ލީގު އަދި އެހެނިހެން ބޮޑެތި ފުޓްބޯޅަ މުބާރަތްތައް ވަގުތުން ބެލޭނެއެވެ. އަދި އިތުރު ކުޅިވަރުތައް ކަމުގައިވާ ކްރިކެޓް، ވޮލީ ބޯޅަ، ބެޑްމިންޓަން، ޓެނިސް އަދި އިތުރު ކުޅިވަރުތައް ވެސް ބަލައިލެވޭނެ ކަމަށް ދިރާގުން ބުންޏެވެ.

ދިރާގުން ފާހަގަކުރި ގޮތުގައި މިއީ ދިރާގު އެޕް މެދުވެރިކޮށް މީޑިއާ ނެޓުގެ ޕެކޭޖެއް އެކްޓިވޭޓްކުރެވޭ ގޮތަށް ދިރާގުން ތަޢާރަފުކުރި ފުރަތަމަ ޚިދުމަތެވެ. އަދި މި ޚިދުމަތް އެކްޓިވޭޓްކޮށްގެން އަންނަ އަހަރުގެ މޭއި މަހުގެ ނިޔަލަށް ބޭނުންކުރެވޭނެ ކަމަށް ވެސް ދިރާގުން ބުންޏެވެ.

އެ ޚިދުމަތް ހޯދަން ބޭނުންވާ ކަސްޓަމަރުން ދިރާގު އެޕް މެދުވެރިކޮށް 450 ރުފިޔާ އަށް އަންލިމިޓެޑް ސްޕޯޓްސްޕާސް އެކްޓިވޭޓްކުރުމުން ވާނެ ކަމަށް ދިރާގުން ބުންޏެވެ.

އަދި އެ ޕެކޭޖަށް ފައިސާ ދެއްކުމަށް ޕޯސްޓް ޕެއިޑް ކަސްޓަމަރުންނަށް އެ ކަސްޓަމަރެއްގެ ބިލާއި އެކު ފައިސާ ދެއްކޭނެއިރު، ޕްރިޕެއިޑް ކަސްޓަމަރުންނަށް ވެސް އެ ކަސްޓަމަރުންގެ އެކައުންޓްގެ ބެލޭންސް ބޭނުންކޮށްގެން ދެއްކޭނެ ކަމަށް ވެސް އެ ކުންފުނިން ބުންޏެވެ.