ފަސްއަހަރު ނިންމާލިއިރު، ފެނަކައަށް ބޭނުންވާވަރަށްވުރެ 3 ގުނަ އިތުރަށް މުވައްޒަފުން ނަގާފައިހުރި: މުހައްމަދު
ނިމިދިޔަ ފަސް އަހަރު ނިންމާލިއިރު، ފެނަކައަށް ބޭނުންވާ ވަރަށްވުރެ ތިން ގުނަ އިތުރަށް މުވައްޒަފުން ނަގާފައިވާ ކަމަށް ވިލިމާލޭ ދާއިރާގެ މެމްބަރު މުހައްމަދު އިސްމާޢީލް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި، އައްޑޫސިޓީން ކަރަންޓް ކެނޑޭ މައްސަލަ އާއި ގުޅިގެން ހުށަހެޅުނު ކުއްލި މައްސަލައަށް ބަހުސް ކުރައްވަމުން މުހައްމަދު އިސްމާއީލް ވިދާޅުވީ، އެ މައްސަލައަކީ ވަރަށް ޚައްސާސް މައްސަލައެއް ކަމަށެވެ. އަދި އެ މައްސަލަ، ހައްލުކުރުމަށް ނިމިދޔަ ފަސް އަހަރު އެއްވެސް ކަމެއް ކުރެވިފައި ހުރިތޯވެސް ބަލަންޖެހޭ ކަމަށް އޭނާ ވުދާޅުވިއެވެ.
ފަސް އަހަރުގެ ތެރޭގައި މި ބޭފުޅުންގެ ބާރާއި އާރު އޮވެ، ކިހާވަރެއްގެ ކޮރަޕްޝަންގެ އަމަލެއް ހިންގާފައިވޭތޯ. ކުއްލި މައްސަލައެއް ހުށަހަޅާފައި ރައްޔިތުންނަށް ލައިވް ޓީވީ ތަކުގައި މެންބަރުން ވާހަކަ ދައްކަވާއިރު، މި ފަސްބައިގައި ހުރި ކިލާވެސް ބަލާލަން އެބަޖެހޭ. ކިހާވަރަކަށްތޯ ކިލާ ހޭކިފައި ހުރީ
ވިލިމާލޭ ދާއިރާގެ މެމްބަރު މުހައްމަދު އިސްމާޢީލް
މުހައްމަދު އިސްމާޢީލް އިތުރަށް ވިދާޅުވީ، ރައީސް މުޢިއްޒު ވެރިކަމާއި ހަވާލުވެވަޑައިގެން ފުރަތަމަ ދުވަހުން ފެށިގެން އައްޑޫގެ ކަރަންޓްގެ މައްސަލައަށް ހައްލެއް ގެނައުމުގެ މަސައްކަތް ފެއްޓެވި ކަމަށެވެ.
ރައީސް ޑރ މުހައްމަދު މުޢިއްޒު ވެރިކަމާއި ހަވާލުވިއިރުގައި، ތަނުގެ ހާލަތު ފުރަތަމަ ދެނެގަތީ. އެތައް ބިލިއަން ރުފިޔާ އަކުން ދަރާފައި. އެތައް ހާސް މުވައްޒަފުންނެއް، 3000 މުވައްޒަފުން ގޮވައިގެން ހިންގޭނެ ކުންފުންޏަކަށް 9000 މުވައްޒަފުން ލައިގެން. ތަނުގައި މަރާމާތުގެ އެއްވެސް މަސައްކަތެއް މި ހިނގައިދިޔަ 5 އަހަރު ނުކޮށް، އިންގީނެއްގައި އޯވާހޯލް ކުރީކީއެއްނޫން. ސްޕެއާރ އެއް ގަތީކީނޫން. އިސްކޫރެއް ހޯދީކީއެއްނޫން. ނަޓެއް ހޯދީކީނޫން
ވިލިމާލޭ ދާއިރާގެ މެމްބަރު މުހައްމަދު އިސްމާޢީލް
މުހައްމަދު އިސްމާޢީލް ވިދާޅުވީ، ނިމިދިޔަ ފަސް އަހަރުގައި ފެނަކައިން ކުރި މަސައްކަތަކީ އެތަނުގެ އިސްވެރިންނާއި ގުޅުންހުރި ފަރާތްތަކަށް އިންޖީނުގެ އަޅަން ހަވާލުކުން ކަމަށާ، އެގޮތުން ފަންސާސް އެއްހާ އިންޖީނުގެ އަޅަން ހަވާލުކުރެވުނު ކަމަށެވެ. އަދި އިންޖީނުގެތަކުން ދެމުންދާ ޚިދުމަތްތައް ނުދީވެސް ކޮރަޕްޝަނުން ވެރިންގެ ޖީބުތައް ފުރުމަށް މަސައްކަތް ކޮށްފައުވާ ކަމަށް މުހައްމަދު ވިދާޅުވިއެވެ.
އެކަން ކޮށްފި. ވަރަށް ފުރިހަމައަށް، ނިޒާމަށް ނާރާ ގޮތަށްވެސް ކޮށްފައި އެބަހުރި. މިއީ ހިތާމަހުރި ކަންކަން
ވިލިމާލޭ ދާއިރާގެ މެމްބަރު މުހައްމަދު އިސްމާޢީލް
ކުރީ ސަރުކާރުގައި ފެނަކައިން ވީ އިހުމާލުތައް ރަނގަޅުކޮށް، ކަންކަން ރަނގަޅުކުރަން މި ސަރުކާރުން މަސައްކަތް ކުރަން ފެށުމުން އެއީ ނުކުރާ ކަމެއް ކަމަށް ހެދުމަށް ކުއްލި މައްސަލަތައް ހުށަހަޅައި ވަގުތު ބޭކާރު ކުރަން އިދިކޮޅުން މަސައްކަތް ކުރާ ކަމަށާ، އެއީ ހިތާމަ ހުރި ކަމެއް ކަމަށް މުހައްމަދު ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
