މޯލްޑިވްސް ޓުއަރިޒަމް އެވޯޑްސް: 8 ފެސިލިޓީއަކަށް 10 އެވޯޑް

ތިންވަނަ މޯލްޑިވްސް ޓުއަރިޒަމް އެވޯޑްސް ދިނުމުގެ ރަސްމިއްޔާތު ބާއްވައިފި އެވެ.

މިއަދު ބާސެލޯ ނަސަންދުރާ މާލޭގައި އޮތް މި އަހަރުގެ އެވޯޑު ދިނުމުގެ ރަސްމިއްޔާތުގައި ފަތުރުވެރިކަމުގެ ހިދުމަތްދޭ 8 ފެސިލިޓީއަކަށް ޖުމްލަ 10 އެވޯޑު ވަނީ ދީފަ އެވެ. އެގޮތުން އެވޯޑް ލިބިފައިވަނީ ޖޯލި މޯލްޑިވްސް އާއި ކޮންރަޑް މޯލްޑިވްސް އާއި ޖޯލި ބީން އާއި ޖެން ހޮޓެލް އާއި ކާނި ހޮޓެލްސްގެ އިތުރުން ޓްރައިޓަން ޕްރިސްޓީޖް އާއި ވޮޔޭޖަސް މޯލްޑިވްސް އާއި ބެސްޓް ޑައިވް ހިމެނެ އެވެ.

މި އެވޯޑުތަކަކީ ދިވެހިރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުން ކުރައްވާ މަސައްކަތްތައް ފާހަގަކޮށް، ހިތްވަރުދިނުމުގެ ގޮތުން 2022 ގައި ތައާރަފުކޮށްފައިވާ އެވޯޑެކެވެ. މި އެވޯޑުތަކުގައި ހިމެނޭ ދާއިރާތަކަކީ އިންސާނީ ވަސީލަތްތައް ތަރައްގީކުރުމާއި، މުޖުތަމައު ބާރުވެރިކުރުވުމާއި، އަދި ތިމާވެށި ރައްކާތެރިކުރުމެވެ.

އެވޯޑު ދިނުމުގެ ރަސްމިއްޔާތުގައި ވާހަކަފުޅު ދައްކަވަމުން، ފަތުރުވެރިކަމާއި ތިމާވެއްޓާ ބެހޭ ވަޒީރު ޠާރިޤު އިބްރާހީމް ވަނީ އެވޯޑު ހާސިލްކުރެއްވި ފަރާތްތަކަށް މަރުޙަބާ ދަންނަވައި، ރާއްޖޭގެ ފަތުރުވެރިކަމުގެ ސިނާއަތު ކުރިއަރުވައި ތަރައްގީކުރުމަށް އެންމެހައި ފަރާތްތަކުން ގުޅިގެން މަސައްކަތްކުރުމަށް ގޮވާލައްވާފައެވެ. އަދި މި ކަމުގައި ސަރުކާރުގެ ފުރިހަމަ އެއްބާރުލުން ލިބޭނޭކަން ޔަގީންކޮށްދެއްވާފައެވެ. އެގޮތުން، ސަރުކާރުގެ އަމާޒަކީ ފަތުރުވެރިކަމުގެ ސިނާއަތު ތަރައްގީކުރުމަށް މަގު ފަހިކޮށްދީ، މި ސިނާއަތަށް ސަރުކާރުގެ ފަރާތުން ބޭނުންވާނޭ އެހީތައް ފޯރުކޮށްދިނުންކަން ވަޒީރު ފާހަގަކުރެއްވިއެވެ.

މިއަދުގެ ރަސްމިއްޔާތުގައި، ކުރިއަށް އޮތް އަހަރުގައި އިތުރު އެވޯޑުތަކެއް ތައާރަފުކުރާނެ ކަން ވަޒީރު އިއުލާނުކުރެއްވި އެވެ. މިގޮތުން، އަންހެނުން ބާރުވެރިކުރުވުމާއި، ރާއްޖޭގެ ސަގާފީ އަދި އަތްތެރި މަސައްކަތްތައް ކުރިއެރުވުމަށް އެހީތެރިކަން ފޯރުކޮށްދޭ ފަރާތްތަކުގެ މަސައްކަތް ފާހަގަކޮށް، އެވޯޑު ދޭނޭކަމަށް ވަޒީރު ދެންނެވިއެވެ. އަދި މީގެ އިތުރުން، ޕްރޮފެޝަނަލް ދާއިރާއިން ވަކިވަކި ފަރުދުން ހޯދާ ކާމިޔާބާއި ކުރައްވާ މަސައްކަތްތައް ފާހަގަކޮށް އެވޯޑު ދިނުމަށް ހަމަޖެހިފައިވާކަން ވަޒީރު ފާހަގަކުރެއްވި އެވެ.

ދިވެހިރާއްޖޭގެ ތިންވަނަ އަހަރީ ފަތުރުވެރިކަމުގެ އެވޯޑަށް، ފަތުރުވެރިކަމުގެ ހިދުމަތްދޭ 43 ފެސިލިޓީއަކުން 19 އެވޯޑަށް ޖުމްލަ 84 އެޕްލިކޭޝަން ވަނީ ލިބުނު ކަމަށާ މީގެ ތެރޭގައި ޓޫރިސްޓު ރިސޯޓުތަކަށާއި، ޓޫރިސްޓު ހޮޓާތަކަށާއި،ޓޫރިސްޓު ގެސްޓްހައުސްތަކަށާއި، އަދި ޓޫރިސްޓު އުޅަނދުތަކުގެ ކެޓަގަރީއިން، ކޮންމެ ކެޓެގަރީއަކަށް 5 އެވޯޑު ހިމެނޭ ކަަމަށް އެ ވުޒާރާއިން ވަނީ ފާހަގަކޮށްފަ އެވެ.

އަދި މީގެ އިތުރުން ޓްރެވަލްއޭޖެންސީތަކަށާއި، ރިސޯޓުތަކާއި ރަށްރަށުގައި ހުންނަ ޑައިވް ސެންޓަރުތަކަށްފަތުރުވެރިކަމާއި ތިމާވެއްޓާ ބެހޭ ވުޒާރާއިން ދޭ އެކްސެލެންސް އެވޯޑް ވެސް ހިމެނެ އެވެ. މި އެވޯޑުތަކަށް ހުށަހަޅާފައިވާ އެޕްލިކޭޝަންތައް ވަޒަން ކުރީ މި ދާއިރާތަކުން ތަޖުރިބާ ލިބިފައިވާ ތިން މެމްބަރުގެ ޕެނަލްއަކުންނެވެ.

މި ރަސްމިއްޔާތުގައި، ފަތުރުވެރިކަމާ ބެހޭ ވަޒީރުކަން ކުރިން ކުރައްވާފައިވާ، ނިޝާން އިއްޒުއްދީނުގެ އިއްޒަތުގެ ވެރިޔާ އަލްމަރުޙޫމް ޙަސަން ސާބިރު އާއި، މިސިނާޢަތުގެ ރާއިދެއްކަމުގައިވާ ނިޝާން މުލީގެ ޝަރަފުގެ އިއްޒަތުގެ ވެރިޔާ އަލްމަރުޙޫމް މުޙައްމަދު ޢުމަރު މަނިކުގެ ހަނދާނުގައި ސުކޫތެއް ވަނީގެނެސްފައެވެ.

ދިވެހިރާއްޖޭގެ ފަތުރުވެރިކަމުގެ އެވޯޑު ތައާރަފުކޮށްފައިވަނީ 2022 ވަނައަހަރު އެވެ. މިއަދުގެ ރަސްމިއްޔާތަކީ 2024 ވަނަ އަހަރުގެ އެވޯޑުތައް ދިނުމުގެ ރަސްމިއްޔާތެވެ. މިއަދު އެވޯޑު ހަވާލުކޮށްފައިވަނީ 2023 ވަނަ އަހަރުގެ ޖޫންމަހުން ފެށިގެން 2024 ވަނަ އަހަރުގެ މެއި މަހާ ހަމައަށް ހިންގާފައިވާ މަސައްކަތްތަކަށް ބިނާކޮށެވެ.