އެއް މަސްދުވަސްތެރޭގައި، ރާއްޖޭގެ ހުރިހާ ކައުންސިލަކާއި ބައްދަލު ކުރަން ރަށް ރަށަށް ދާނަން: ރައީސް މުޢިއްޒު

އެއް މަސް ދުވަސް ތެރޭގައި ރާއްޖޭގެ ހުރިހާ ރަށެއްގެ، ހުރިހާ ކައުންސިލަކާއި ބައްދަލު ކުރައްވާނެ ކަމަށް ރައީސުލްޖުމުހޫރިއްޔާ ޑރ މުހައްމަދު މުޢިއްޒު މިއަދު ވިދާޅުވެއްޖެއެވެ.

ތ އަތޮޅަށް މިހާރު ކުރައްވަމުންދާ ދަތުރުފުޅުގެ ތެރެއިން، އެ އަތޮޅު ކިނބިދޫ އަށް ވަޑައިގެން، ރަށުގެ ރައްޔިތުންނާއި ބައްދަލު ކުރައްވައި ވާހަކަ ދައްކަވަމުން ރައީސް ތ އަތޮޅުގެ އެ ދަތުރުފުޅުގައި އެ އަތޮޅުގެ ހުރިހާ ރަށެއްގެ ހެން ކައުންސިލާއި އަންހެންނުންގެ ތަރައްގީއަށް މަސައްކަތް ކުރާ ކޮމިޓީއާ ބައްދަލު ކުރެވިފައިވާ ކަމަށެވެ.

އަދި އެމަނިކުފާނު ބޭނުންފުޅުވަނީ ރައްޔިތުންނާއި ވޭހާވެސް ގާތުން މަސައްކަތް ކުރައްވަން ކަމަށާ, މާލޭ މޭޔަރ ކަމުގައި ހުންނެވިއިރުވެސް ކަން ކުރެއްވީ ރައްޔިތުންނާއި ސީދާ ބައްދަލު ކުރައްވައި ވީ އެންމެ ގާތުން ކަމަށް ރައީސް ވިދާޅުވި އެވެ.

"އެގޮތަށް އަޅުގަނޑު މިހާރުވެސް މަސައްކަތް ކުރަން ބޭނުންވަނީ. އަޅުގަނޑު ހުންނަ ތަނަށް، އޮފީހަށް ކައުންސިލް ގެނެސްގެން ކައުންސިލާއި ބައްދަލު ކުރާކަށް ނޫން ބޭނުމީ. ކައުންސިލް އޮތް ތަނަށް އަޅުގަނޑު ދާން ބޭނުންވަނީ. އެހެންވީމާ މި އަތޮޅު މި ނިމެނީ. ދެން އަންނަ ހަފްތާގައި ރާއްޖެއިން ބޭރަށް ދަތުރެއް އެބައޮތް. އެ ދަތުރު ނިންމާފައި އަންނަ ގޮތަށް، މަސް ދުވަސް މި ކަނޑަ އަޅަނީ. އެއް މަސް ތެރޭގައި، ހުރިހާ ކައުންސިލް ތަކަށް އަޅުގަނޑު ބައްދަލު ކުރާން ރަށް ރަށަށް ދާނަން. ހުރިހާ ކައުންސިލް ތަކާއި ޑަބްލިޔު ޑީސީ އާއި."

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

ރައީސް މުޢިއްޒު ވިދާޅުވީ، އެފަދައިން ކައުންސިލް ތަކާއި ބައްދަލު ކުރައްވަން ހުރިހާ ރަށަކަށް ވަޑައި ނުގެންނެވި ނަމަވެސް، އަތޮޅު ތަކަށް ބަހާލައިގެން، އަތޮޅު ތެރޭގެ އެކި ރަށްރަށަށް ޒިޔާރަތް ކުރައްވައި، އެ ޒިޔާރަތް ކުރައްވާ ރަށަކަށް ރަށަކާއި ކައިރި ރަށްތަކުގެ ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ މެންބަރުން ވަޑައިގެން ބައްދަލު ކުރައްވާނެ ގޮތަކަށް ކަންކަން ރާވައި އިންތިޒާމް ކުރެއްވިގެންދާނެ ކަމަށެވެ.

އޭރުން އަޅުގަނޑާއި ބައްދަލު އެ ވަނީ ހުރިހާ ރައްޔިތުން ރަމްޒުކޮށްދޭ ހުރިހާ މުއައްސަސާއަކާ. ހުރިހާ ކައުންސިލް ތަކާއި. އޭރުން ގާތުން ރައްޔިތުންނާއި އެކީގައި އެ މަސައްކަތް ކުރުމުގެ ފަސޭހަ އަޅުގަނޑަށް ލިބިގެންދޭ. އެ ހިތްހަމަ ޖެހުން ލިބިގެންދޭ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

ކައުންސިލް ތަކާއި ބައްދަލު ކުރައްވައި، ރައްޔިތުން ބޭނުންވާ ކަންކަން އަޑުއައްސަވައި، އެ ކަންކަން ފަސޭހައިން ފަހިވާނެ ގޮތަށް ކަންކަން ބައްޓަން ކޮށްދެއްވާނެ ކަމުގެ ޔަގީންކަން ރައީސް މުޢިއްޒު ވަނީ ދެއްވާފައެވެ.